యూటర్న్ తీసుకున్న ట్రంప్.. భారత్-పాక్ వివాదంపై కొత్త వ్యాఖ్యలు!

భారత్, పాకిస్థాన్ మధ్య కాల్పుల విరమణ ఒప్పందానికి తానే మధ్యవర్తిత్వం వహించానని గతంలో గర్వంగా చెప్పుకున్న అమెరికా మాజీ అధ్యక్షుడు డొనాల్డ్ ట్రంప్ ప్రస్తుతం యూటర్న్ తీసుకున్నారు. తాను అలా చెప్పలేదని, కానీ ఇరు దేశాల మధ్య ఉద్రిక్తతలు తగ్గించడానికి మాత్రం ప్రయత్నించానని అంటున్నారు. ఈ తాజా వ్యాఖ్యలు అంతర్జాతీయంగా చర్చనీయాంశంగా మారాయి. ట్రంప్ ఎందుకు మాట మార్చారు? భారత్-పాక్ సంబంధాలపై ఆయన వ్యాఖ్యల ప్రభావం ఏమిటో వివరంగా తెలుసుకుందాం.

గతంలో ట్రంప్ మాట్లాడుతూ.. "భారత్, పాక్ మధ్య యుద్ధం వస్తుందని అందరూ అనుకున్నారు. కానీ నేను జోక్యం చేసుకుని ఆ యుద్ధాన్ని ఆపాను" అని చెప్పుకొచ్చారుక అయితే, ఈ వ్యాఖ్యలను భారత్ తీవ్రంగా ఖండించింది. జమ్మూ కాశ్మీర్ అంశం ద్వైపాక్షిక సమస్య అని, మూడో దేశం జోక్యం అవసరం లేదని స్పష్టం చేసింది. అంతేకాకుండా, కాల్పుల విరమణ ఒప్పందం కూడా భారత్ కోరిక కాదని చెప్పింది. పాకిస్తాన్ కోరిక మేరకే అది జరిగిందని తెలిపింది.

తాజాగా ట్రంప్ తన మాటలను మార్చారు.. ట్రంప్ మాట్లాడుతూ.. "నేను యుద్ధాన్ని ఆపాను అని చెప్పలేదు. కానీ భారత్-పాక్ మధ్య ఉద్రిక్తతలు తగ్గించడానికి నా వంతు ప్రయత్నం చేశాను" అని అన్నారు. ఇరు దేశాల మధ్య సయోధ్య కుదర్చడానికి తాను కృషి చేశానని, కానీ యుద్ధాన్ని ఆపానని చెప్పలేదని ఆయన కొత్త రాగం పాడుతున్నారు.

ఈ వ్యాఖ్యలపై భారత విదేశాంగ మంత్రి జైశంకర్ స్పందించారు. భారత్-పాక్ చర్చల్లో మూడో దేశం జోక్యం అవసరం లేదని, భారత్ కేవలం పీవోకే, ఉగ్రవాదం గురించే మాట్లాడుతుందని మంత్రి తెలిపారు. పాకిస్తాన్ ఉగ్రవాదులను అప్పగించాలని, ఉగ్రవాద శిబిరాలను మూసివేయాలని ఆయన హెచ్చరించారు. సింధు జలాల నుంచి ఒక్క చుక్క నీరు కూడా పాకిస్తాన్‌కు ఇవ్వబోమని, కాల్పుల విరమణ పాకిస్తాన్ కోరుకుంటుంది తప్పా భారత్ కాదని జైశంకర్ స్పష్టం చేశారు.

ట్రంప్ మాట మార్చడం వెనుక రాజకీయ కారణాలు ఉన్నాయంటూ విశ్లేషకులు భావిస్తున్నారు. భారత్‌తో సంబంధాలను దెబ్బతీయడం ఆయనకు ఇష్టం లేదని అంటున్నారు. అంతేకాకుండా, భారత్-పాక్ మధ్య మధ్యవర్తిత్వం వహించడం అంత సులభం కాదని, అది తన వల్ల కాదని ట్రంప్ గ్రహించి ఉండవచ్చని భావిస్తున్నారు. ఏదేమైనా, ట్రంప్ వ్యాఖ్యలు భారత్-పాక్ సంబంధాలపై పెద్దగా ప్రభావం చూపబోవని స్పష్టమవుతోంది. భారత్ తన వైఖరిని స్పష్టంగా తెలియజేసింది. జమ్మూ కాశ్మీర్ అంశం ద్వైపాక్షిక సమస్య అని, ఉగ్రవాదంపై రాజీపడేది లేదని భారత్ తేల్చి చెప్పింది.