ఢిల్లీలో ఏర్పాటు చేస్తున్న ప్రత్యేక మెట్రో కారిడార్ ఎందుకు?

దేశంలోని మిగిలిన మహానగరాల్ని పక్కన పెడితే.. దేశ రాజధాని ఢిల్లీలోని మెట్రో వ్యవస్థ ఎంత పెద్దదన్న విషయం తెలిసిందే. నిజానికి ఢిల్లీ మెట్రో లైన్ గురించి పూర్తి అవగాహన తెచ్చుకోవాలంటే.. కనీసం మూడు నెలల పాటు ఆ మహానగరంలో ఉండి.. అదే పనిగా మెట్రోలో ప్రయణిస్తే తప్పించి ఒక పట్టాన అర్థం కాని పరిస్థితి.అంత భారీగా ఉండే ఢిల్లీ మెట్రో రైలుకారిడార్ కు అదనంగా మరో బుజ్జి మెట్రో కారిడార్ ను ఏర్పాటు చేస్తున్నారు.

ఈ ప్రత్యేక కారిడార్ లో కేవలం మూడు కోచ్ లతో మెట్రోను నడుపుతారు. ఈ కారిడార్ కేవలం 8 కిలోమీటర్ల దూరమే ఉంటుంది. తక్కువ దూరాల్లో ప్రయాణించే వారి కోసం ఈ కారిడార్ ను ఏర్పాటు చేస్తున్నారు. లజపత్ నగర్ - సాకేత్ జీ బ్లాక్ రూట్ లో మూడు కోచ్ లతో ప్రత్యేక రైల్ సర్వీసును ఇందుకోసం నిర్మిస్తున్నారు. ఢిల్లీ మెట్రో నాలుగో దశలో భాగంగా ఈ కారిడార్ ను ఏర్పాటు చేస్తున్నారు.

మిగిలిన కారిడార్ల మధ్య కనెక్టివిటీ పెంచటంతో పాటు.. ప్రస్తుతం ఉన్న కారిడార్లతో సులువుగా ఇంటర్ ఛేంజ్ కోసం ఈ లైన్ ను ఏర్పాటు చేస్తున్నారు.తక్కువ దూరం ప్రయాణం చేసే వారి కోసం ఏర్పాటు చేస్తున్న ఈ కారిడార్ కు ప్రయాణికుల రద్దీ మీద పక్కా అంచనాలతోనే ముందుకు వెళుతున్నారు. ఒక్కో కోచ్ లో దాదాపు 300 మంది ప్రయాణించొచ్చని..అంటే ఒక ట్రిప్ లో 900 మందిని గమ్యస్థానాలకు చేరుకునే వీలు ఉంటుంది. ఈ 8 కి.మీ. కారిడార్ లో మొత్తం 8 స్టేషన్లు ఉంటాయి. ఈ కారిడార్ ను 2028 నాటికి పూర్తి అయ్యేలా పనులు చేపట్టారు.