పాకిస్తాన్ పై సొంత దేశంలోనే వ్యతిరేకత

జమ్ముకశ్మీర్‌లోని పహల్గాం ప్రాంతంలో ఇటీవల చోటుచేసుకున్న ఉగ్రదాడి ఘటనపై పాకిస్థాన్‌ ఉప ప్రధాని ఇషాక్ దార్‌ చేసిన వివాదాస్పద వ్యాఖ్యలు తీవ్ర దుమారం రేపుతున్నాయి. ఉగ్రవాదులను 'స్వాతంత్ర్య సమరయోధులు' అని ఆయన సంబోధించడంపై సొంత దేశంలోనే, ముఖ్యంగా క్రీడా వర్గాల నుంచి తీవ్ర విమర్శలు వెల్లువెత్తుతున్నాయి. ఈ వ్యాఖ్యలపై పాకిస్థాన్ మాజీ క్రికెటర్ డానిష్ కనేరియా తీవ్ర స్థాయిలో మండిపడ్డారు.

ఉప ప్రధాని వ్యాఖ్యలపై స్పందిస్తూ డానిష్ కనేరియా సోషల్ మీడియా వేదికగా ఆగ్రహం వ్యక్తంచేశారు. "పాకిస్థాన్ ఉప ప్రధాని ఉగ్రవాదులను ఫ్రీడమ్‌ ఫైటర్స్‌ అంటూ సంబోధించారు. ఇది అవమానకరమే కాకుండా.. ఉగ్రవాదానికి మేం మద్దతిస్తున్నాం, ప్రోత్సహిస్తున్నామంటూ బహిరంగంగా అంగీకరించినట్లు అయింది" అని డానిష్ పోస్టు పెట్టారు.

-దేశం బాధపడుతోంది, సరైన నాయకత్వం అవసరం:

తాను పాకిస్థాన్‌కు లేదా అక్కడి ప్రజలకు వ్యతిరేకంగా మాట్లాడటం లేదని డానిష్ కనేరియా ఈ సందర్భంగా స్పష్టంచేశారు. ఉగ్రవాదం చేతిలో పాక్ తీవ్రంగా బాధపడుతోందని, నష్టపోతోందని ఆయన పేర్కొన్నారు. ఉగ్రవాదులకు ఆశ్రయం కల్పించేవారు కాకుండా, శాంతి కోసం నిలబడే సరైన నాయకత్వం పాక్‌కు అవసరమని ఆయన అభిప్రాయపడ్డారు.

- నా అనుభవం కూడా పహల్గాం బాధితులకు భిన్నం కాదు:

పాకిస్థాన్ క్రికెట్ జట్టుకు ఆడిన తన అనుభవాన్ని కూడా డానిష్ కనేరియా గుర్తుచేసుకున్నారు. "నేను గర్వంగా పాక్‌ క్రికెట్ జెర్సీని ధరించా. మైదానంలో నా చెమటను చిందించా. చివరికి నన్ను ట్రీట్ చేసిన విధానం కూడా పహల్గాం బాధితులకు భిన్నంగా లేదు. హిందువుగా ఉన్నందుకే లక్ష్యంగా మారాను" అని ఆవేదన వ్యక్తంచేశారు. ఉగ్రవాదాన్ని సమర్థించేవారు, హంతకులను రక్షించేవారు సిగ్గుపడాలని ఆయన తీవ్రంగా వ్యాఖ్యానించారు.

- ప్రధాని మౌనంపై కూడా ప్రశ్నలు:

జమ్మూకశ్మీర్ ఉగ్రదాడి ఘటనపై పాకిస్థాన్ ప్రధాని షహబాజ్‌ షరీఫ్ స్పందించకపోవడంపై కూడా డానిష్ కనేరియా గతంలో విమర్శలు గుప్పించిన సంగతి తెలిసిందే. ప్రధాని షరీఫ్‌కు వాస్తవం తెలుసని, పాకిస్థాన్ ఉగ్రవాదులను పెంచి పోషిస్తోందని ఆయన గతంలో ఆరోపించారు.

తాను ఎప్పుడూ మానవత్వం, వాస్తవం వైపే నిలబడతానని, పాకిస్థాన్‌ ప్రజలు కూడా ఇలానే ఉంటారని ఆశిస్తున్నానని డానిష్ కనేరియా తన సుదీర్ఘ పోస్టులో పేర్కొన్నారు. వారిని తప్పుదోవ పట్టించకూడదని ఆయన సూచించారు. పాక్ ఉప ప్రధాని వ్యాఖ్యలపై కనేరియా వంటి మాజీ క్రికెటర్ల నుంచి వచ్చిన ఈ విమర్శలు దేశంలో నెలకొన్న అంతర్గత వ్యతిరేకతను, అసంతృప్తిని ప్రతిబింబిస్తున్నాయి.