తమ ల్యాప్‌టాప్‌లకు నిప్పు పెడుతున్న విద్యార్థులు.. వైరల్ అవుతున్న వింత ట్రెండ్!

ప్రస్తుత ఇంటర్నెట్ ప్రపంచంలో నిత్యం ఏదో ఒక వింత ఛాలెంజ్ ప్రజల్లో చర్చనీయాంశంగా మారుతూ ఉంటుంది. చాలా మంది వాటిని స్వీకరించి, అద్భుతంగా ప్రదర్శిస్తారు. వారి వీడియోలు కూడా ఇంటర్నెట్‌లో విపరీతంగా షేర్ అవుతుంటాయి. ఇదంతా లైక్‌లు, వ్యూస్ కోసం కంటిన్యూగా జరిగే తతంగమే. ప్రస్తుతం ఒక వింత, ప్రమాదకరమైన ఛాలెంజ్ వైరల్ అవుతోంది. దీనిలో ప్రజలు తమ సొంత ల్యాప్‌టాప్‌లకు నిప్పు పెడుతున్నారు. ఇంతకీ ఈ వింత ట్రెండ్ ఏమిటి? ప్రజలు ఎందుకిలా చేస్తున్నారు? వివరంగా తెలుసుకుందాం.

ఈ కొత్త ఛాలెంజ్‌ను #క్రోమ్‌బుక్‌ఛాలెంజ్ (#ChromebookChallange) అంటున్నారు. ఇందులో పిల్లలు ఒక ప్రత్యేకమైన స్టంట్ చేస్తున్నారు. వారు తమ ల్యాప్‌టాప్ ఛార్జింగ్ పోర్ట్‌లో కాగితం, పెన్సిల్ లెడ్ లేదా ఫాయిల్ పేపర్‌ను పెడుతున్నారు. దీనివల్ల ల్యాప్‌టాప్, ముఖ్యంగా దాని ఛార్జర్‌లో విద్యుత్ షార్ట్ సర్క్యూట్ అవుతోంది. దీనికి సంబంధించిన అనేక వీడియోలు సోషల్ మీడియాలో వైరల్ అవుతున్నాయి. ఈ సంఘటన కారణంగా ల్యాప్‌టాప్ లేదా ఛార్జర్‌లో మంటలు చెలరేగుతున్నాయి. దాని నుండి విషపూరితమైన పొగ వస్తోంది.

ఈ ట్రెండ్ ఎందుకు ప్రమాదకరం?

మీడియా నివేదికల ప్రకారం.. అమెరికాలోని కనెక్టికట్‌లోని న్యూయింగ్‌టన్ హైస్కూల్‌లో ఇలాంటి ఛాలెంజ్ కారణంగా ఒక తరగతి గది మొత్తం పొగతో నిండిపోయింది. న్యూయార్క్ పోస్ట్ ప్రకారం, నగరంలోని ఫైర్ మార్షల్ డిజె జోర్డాన్ మాట్లాడుతూ, ఈ ట్రెండ్ కారణంగా ప్రజలు చాలా ఇబ్బందులు ఎదుర్కొంటున్నారని తెలిపారు. ల్యాప్‌టాప్ బ్యాటరీ వెంటనే మంటలను అంటుకునే స్వభావం కలిగి ఉంటుంది. ఒకసారి అవి కాలిపోతే విషపూరితమైన పొగ బయటకు వస్తుంది. అనేక సందర్భాల్లో ఫైర్ ఇంజన్ ను పిలవాల్సి వస్తోంది.

ఈ ఛాలెంజ్‌కు సంబంధించిన అనేక కేసులు అమెరికాలోని కాలిఫోర్నియా, కరోలినా, పెన్సిల్వేనియా, న్యూజెర్సీ, రోడ్ ఐలాండ్, విస్కాన్సిన్, వాషింగ్టన్ వంటి ప్రాంతాల్లో కనిపించాయి. టిక్‌టాక్ ప్రకారం.. గతేడాది అక్టోబర్ నుంచి డిసెంబర్ మధ్య 99.7 శాతం ప్రమాదకరమైన కంటెంట్‌ను తొలగించారు. అయితే, ఇప్పటికీ ప్రజలు ఇలాంటి కంటెంట్‌ను సోషల్ మీడియాలో వైరల్ చేయకూడదని ఫిర్యాదు చేస్తున్నారు. దీనివల్ల యువత తీవ్ర నష్టాన్ని ఎదుర్కోవలసి వస్తుంది.