గాడిదల ప్రాజెక్ట్.. పాకిస్తాన్, చైనా మధ్య ప్రత్యేక ఒప్పందం
ఈ ప్రాజెక్టులో అత్యంత ఆసక్తికరమైన అంశం ఏమిటంటే.. గ్వాదర్ ఎగుమతి ప్రాసెసింగ్ జోన్ను ఈ డాంకీ ప్రాజెక్ట్ కోసం ఎంపిక చేశారు.
By: Tupaki Desk | 15 April 2025 5:00 AM IST
పాకిస్తాన్, చైనా మధ్య ఆర్థిక భాగస్వామ్యం ఇప్పుడు కొత్త మలుపు తిరిగింది. ఈసారి ఇది హైటెక్ ప్రాజెక్ట్ లేదా భారీ పెట్టుబడికి సంబంధించినది కాదు. గాడిదలతో ముడిపడి ఉంది. అవును, చైనా వ్యాపార ప్రతినిధి బృందం పాకిస్తాన్లో గాడిదల పెంపకం కోసం ఫామ్లను ఏర్పాటు చేయడంలో చాలా ఆసక్తిని కనబరిచింది. పాకిస్థాన్ కూడా ఈ ప్రత్యేక ప్రతిపాదనకు సానుకూల సంకేతాలు ఇచ్చింది. శనివారం పాకిస్థాన్ రాజధాని ఇస్లామాబాద్లో జరిగిన ఉన్నత స్థాయి సమావేశంలో ఈ ప్రతిపాదనపై తీవ్రంగా చర్చించారు.
గాడిదలకు అనుకూలమైన పాకిస్తాన్ వాతావరణం
ఈ సమావేశంలో చైనా డాంకీ ఇండస్ట్రీ వైస్ ప్రెసిడెంట్ జావో ఫెయ్, పాకిస్తాన్ ఫుడ్ సెక్యూరిటీ మంత్రి రాణా తన్వీర్ హుస్సేన్ పాల్గొన్నారు. చర్చల సమయంలో చైనా గాడిదల పెంపకం ప్రణాళికను మాత్రమే కాకుండా, దీనిని వ్యవస్థీకృత పరిశ్రమగా అభివృద్ధి చేయాలనే ఉద్దేశ్యాన్ని కూడా వ్యక్తం చేసింది.
రాణా తన్వీర్ హుస్సేన్ కూడా ఈ ప్రతిపాదనను సానుకూలంగా స్వాగతించారు. గాడిదల పెంపకానికి పాకిస్తాన్ వాతావరణం చాలా అనుకూలంగా ఉందని అన్నారు. స్థానిక గాడిదల జనాభాకు ఎలాంటి హాని జరగకుండా చూసుకోవడానికి అధికారిక ఒప్పందం ద్వారా తదుపరి చర్యలు తీసుకోబడతాయని మంత్రి తెలిపారు.
గ్వాదర్లో డాంకీ హబ్, ఎగుమతికి సన్నాహాలు
ఈ ప్రాజెక్టులో అత్యంత ఆసక్తికరమైన అంశం ఏమిటంటే.. గ్వాదర్ ఎగుమతి ప్రాసెసింగ్ జోన్ను ఈ డాంకీ ప్రాజెక్ట్ కోసం ఎంపిక చేశారు. ఇక్కడ ఫామ్లతో పాటు స్లాటర్ హౌస్, ఎగుమతి సౌకర్యం కూడా ఏర్పాటు చేయబడుతుంది. గాడిదల మాంసం, చర్మం ప్రాసెసింగ్ చేసి చైనాకు ఎగుమతి చేయడమే లక్ష్యం. ఈ మొత్తం వ్యాపారం గ్వాదర్ పోర్ట్ ద్వారా నిర్వహిస్తారు. తద్వారా వస్తువులను చైనాకు సులభంగా, వేగంగా రవాణా చేయవచ్చు.
ఈ సన్నాహాలు అకస్మాత్తుగా ఇప్పటికి ఇప్పుడే రాలేదు. గత ఏడాది అక్టోబర్లో ఇరు దేశాల మధ్య జరిగిన సమావేశంలో గాడిద మాంసం ఎగుమతికి క్వారంటైన్ ప్రోటోకాల్పై అంగీకారం కుదిరింది. జూలై 2023లో, గాడిద చర్మం కోసం ప్రక్రియ పూర్తయింది. ఇప్పుడు మాంసాన్ని కూడా ఎగుమతి జాబితాలో చేర్చాలని యోచిస్తున్నట్లు పాకిస్తాన్ వాణిజ్య మంత్రిత్వ శాఖ తెలియజేసింది.