వైరల్ అవుతున్న పోలీస్ ఆఫీసర్ లేఖ.. యుద్ధంలో పాల్గొనేందుకు సైన్యంలోకి వీళ్లు వెళ్లవచ్చా ?

భారత్-పాక్ సరిహద్దుల్లో ఉద్రిక్తతలు పెరుగుతున్న నేపథ్యంలో దేశభక్తితో సైన్యంలో చేరి పోరాడాలని చాలా మంది ఉవ్విళ్లూరుతున్నారు. ఈ క్రమంలో ఒక పోలీసు అధికారి యుద్ధంలో పాల్గొని దేశానికి సేవ చేయాలనే తన కోరికను వ్యక్తం చేస్తూ రాసిన లేఖ సోషల్ మీడియాలో వైరల్ అవుతోంది. సరిహద్దుల్లో నెలకొన్న పరిస్థితులు, దేశం కోసం ఏదైనా చేయాలనే తపన ఆ లేఖలో స్పష్టంగా కనిపిస్తోంది. అయితే, చట్టపరంగా పోలీసు అధికారులు నేరుగా యుద్ధంలో పాల్గొనగలరా? దీనికి సంబంధించిన నియమాలు ఏమిటి? తాజా పరిణామాల నేపథ్యంలో ఈ అంశాన్ని మరింత లోతుగా తెలుసుకుందాం.

సాధారణంగా పోలీసుల ప్రధాన బాధ్యత దేశంలో అంతర్గత భద్రతను కాపాడడం. శాంతిభద్రతలను పరిరక్షించడం, నేరాలను నియంత్రించడం, ప్రజలకు రక్షణ కల్పించడం వారి ముఖ్య కర్తవ్యాలు. వారు సరిహద్దు భద్రత లేదా అంతర్జాతీయ యుద్ధాల్లో నేరుగా పాల్గొనరు. అయితే, దేశంలో యుద్ధం వంటి ప్రత్యేక పరిస్థితులు ఏర్పడినప్పుడు, పోలీసు శాఖలోని సీనియర్ స్థాయి అధికారులు తమవంతు సహకారం అందించే అవకాశం ఉంటుంది.

భారతదేశంలో BSF (Border Security Force), CRPF (Central Reserve Police Force), ITBP (Indo-Tibetan Border Police), CISF (Central Industrial Security Force), SSB (Sashastra Seema Bal) వంటి పారామిలటరీ బలగాలు లేదా కేంద్ర సాయుధ పోలీసు బలగాల అధికారులు IPS (Indian Police Service) కేడర్ నుంచి వస్తారు. ఈ బలగాలు సరిహద్దు భద్రత, ఉగ్రవాద నిరోధక కార్యకలాపాలు, ఉద్రిక్త ప్రాంతాలలో కీలకమైన పాత్ర పోషిస్తాయి. వారు సైన్యానికి సహాయంగా లేదా సైన్యంతో కలిసి పనిచేసే అవకాశం ఉంటుంది. కానీ వారు నేరుగా అంతర్జాతీయ యుద్ధాల్లో సైనికుల్లా పోరాడరు.

ఒక దేశంలో అత్యవసర పరిస్థితి, అంటే యుద్ధం లేదా జాతీయ భద్రతకు తీవ్రమైన ముప్పు ఉన్నప్పుడు అక్కడి ప్రభుత్వం పోలీసులను సైన్యంలోకి పంపే అధికారం కలిగి ఉంటుంది. అయితే, దీని కోసం అధికారికంగా అత్యవసర పరిస్థితిని ప్రకటించాల్సి ఉంటుంది. సాధారణ పరిస్థితుల్లో పోలీసులను యుద్ధంలోకి పంపరు. ఎందుకంటే వారికి అంతర్జాతీయ యుద్ధాలు, సరిహద్దు పోరాటాలపై ప్రత్యేక శిక్షణ ఉండదు. వారి శిక్షణ అంతర్గత భద్రత, శాంతిభద్రతల పరిరక్షణ ఆధారంగానే ఉంటుంది.

అయితే, ఒక పోలీసు అధికారి తన వ్యక్తిగత కోరిక మేరకు సైన్యంలో చేరడానికి అవకాశం ఉంది. వారు సాధారణ సైనిక భర్తీ ప్రక్రియ ద్వారా దరఖాస్తు చేసుకోవచ్చు . సైన్యంలో సైనికుడిగా లేదా అధికారిగా చేరవచ్చు. అలా చేరిన తర్వాత వారు సైనిక శిక్షణ పొంది, యుద్ధంలో పాల్గొనడానికి అర్హత సాధిస్తారు. కానీ, వారు పోలీసు శాఖలో కొనసాగుతూ నేరుగా యుద్ధంలో పాల్గొనడానికి సాధారణంగా అనుమతి ఉండదు. వారు తమ పోలీసు ఉద్యోగానికి రాజీనామా చేసి సైన్యంలో పూర్తికాలం పనిచేయాల్సి ఉంటుంది.