భారత్ vs అమెరికా: కారు కొనుగోలులో తేడాలు ఎందుకు?

కారు కొనడం ప్రతీ ఒక్కరి కల.. విదేశాల్లో ఇది కామన్ అయినా ఇండియాలో మాత్రం ప్రతీ మధ్యతరగతి తపిస్తుంటారు. అమెరికాలో కారు కొనుగోలు ఒక దీర్ఘకాలిక పెట్టుబడిగా చూడబడుతుంది. అయితే భారతదేశంలో ఇది ఎక్కువగా జీవనశైలి లేదా అవసరాలపై ఆధారపడి ఉంటుంది. ఈ వ్యాసంలో అమెరికా, భారతదేశాల్లో కారు కొనుగోలు విధానాలు ఎందుకు భిన్నంగా ఉన్నాయో తెలుసుకుందాం.

- అమెరికాలో కారు: దీర్ఘకాలిక బంధం

అమెరికా ప్రజలు కారు కొన్నప్పుడు, దానిని చాలా కాలం పాటు ఉపయోగించాలని కోరుకుంటారు. అందుకే వారు కారును ఎంచుకునేటప్పుడు ఈ మూడు ముఖ్యమైన అంశాలకు ప్రాధాన్యత ఇస్తారు. తరచుగా మెకానిక్ షాపులకు వెళ్లాల్సిన అవసరం లేకుండా కారు నమ్మకంగా ఉండాలని చూస్తారు. కొన్ని సంవత్సరాల తర్వాత కారు అమ్మితే మంచి ధర పలకాలి. తక్కువ మెయింటెనెన్స్ ఖర్చులు ఉండాలని.. సర్వీసింగ్, మైలేజ్, విడిభాగాల ఖర్చులు తక్కువగా ఉండాలని కోరుకుంటారు. ఈ కారణాల వల్ల, అమెరికాలో హోండా, టయోటా, మజ్దా వంటి బ్రాండ్‌లకు అధిక ప్రాధాన్యత ఇస్తారు. ఇవి నమ్మదగినవి, తక్కువ మరమ్మతులు కలిగి ఉంటాయి, మంచి రీసేల్ విలువను కూడా అందిస్తాయి.

- భారతదేశంలో కారు: స్టైల్, బడ్జెట్ కలయిక

భారతదేశంలో పరిస్థితి కాస్త భిన్నంగా ఉంటుంది. ఇక్కడ కారు కొనుగోలు ప్రధానంగా ఈ అంశాలపై ఆధారపడి ఉంటుంది. మధ్యతరగతి కుటుంబాలకు తక్కువ ధరలో మంచి కారు అవసరం. టచ్‌స్క్రీన్, సన్‌రూఫ్, బ్లూటూత్ కనెక్టివిటీ వంటి ఆధునిక ఫీచర్లు ఉండాలి. స్టైలిష్ లుక్ తో కారు ఆకర్షణీయంగా కనిపించాలి. అంతేకాకుండా భారతదేశంలో చాలామంది తమ కార్లను ఎక్కువ కాలం ఉపయోగించకుండానే మార్చేస్తారు. కాబట్టి రీసేల్ విలువ, మైలేజ్, బ్రాండ్ కీర్తి (రిప్యూటేషన్), సర్వీస్ సెంటర్ల లభ్యత వంటి అంశాలు కూడా ముఖ్య పాత్ర పోషిస్తాయి. అందుకే మారుతి సుజుకీ, హ్యుందాయ్, కియా వంటి బ్రాండ్‌లు భారతదేశంలో బాగా ప్రజాదరణ పొందాయి.

- దేశాలను బట్టి మారే ప్రాధాన్యతలు

ఒక దేశంలో బాగా అమ్ముడైన కారు మరొక దేశంలో ఫెయిల్ అవ్వొచ్చు. ఉదాహరణకు వోక్స్‌వ్యాగన్ కార్లకు అమెరికాలో మెయింటెనెన్స్ ఖర్చులు ఎక్కువని పెద్దగా ఆదరణ ఉండదు. కానీ భారతదేశంలో వాటి ధర, స్టైలింగ్, ఫీచర్లు బాగుండటం వల్ల మంచి మార్కెట్ ఉంది. అలాగే కొరియన్ బ్రాండ్‌లైన హ్యుందాయ్, కియా కార్లపై అమెరికాలో కొన్ని పుకార్లు దొంగతనం ఎక్కువగా జరుగుతుందని ఉన్నప్పటికీ, భారతదేశంలో అలాంటి భయాలు అంతగా ఉండవు.

ప్రతి దేశానికి వేర్వేరు ఆర్థిక, భౌగోళిక, సామాజిక పరిస్థితులు ఉంటాయి. ఈ కారణంగా, కార్లు కొనుగోలు చేసే తీరు కూడా మారుతుంది. అమెరికాలో నమ్మదగిన, ఎక్కువ కాలం పనిచేసే కార్లకు ప్రాధాన్యతనిస్తార.. భారతదేశంలో బడ్జెట్‌లో మంచి ఫీచర్లతో, స్టైలిష్ కార్లకు ప్రాధాన్యత ఉంటుంది.

ఈ వ్యత్యాసం వల్లే ఒక దేశంలో విజయం సాధించిన కారు, మరొక దేశంలో విఫలం కావచ్చు. కాబట్టి, కారు కొనే ముందు మన అవసరాలే ప్రధానంగా ఉండాలి, ఇతర దేశాల్లోని ట్రెండ్‌లు కాదు.