ఇదో పాముల వంతెన.. బండిమీద పోతే అంతే గతి..

మధ్యప్రదేశ్ రాజధాని భోపాల్ నగరంలో ఇటీవల నిర్మించిన రెండు రైల్వే ఓవర్‌బ్రిడ్జిలు తీవ్ర వివాదాస్పదంగా మారాయి. వాటి నిర్మాణం తీరు, తరచుగా జరుగుతున్న ప్రమాదాలపై దేశవ్యాప్తంగా విమర్శలు వెల్లువెత్తుతున్నాయి. ముఖ్యంగా ఈ వంతెనల ఇంజినీరింగ్ లోపాలు వాహనదారుల ప్రాణాలకు ముప్పుగా మారుతున్నాయనే ఆందోళన వ్యక్తమవుతోంది.

ఐష్‌బాగ్‌, సుభాష్‌నగర్ వంతెనలపై విమర్శల జడివాన

కొద్ది రోజుల కిందట రూ. 18 కోట్లతో ఐష్‌బాగ్‌ వద్ద నిర్మించిన 90 డిగ్రీల మలుపు కలిగిన వంతెనపై తీవ్ర స్థాయిలో విమర్శలు వచ్చాయి. తాజాగా రూ. 40 కోట్లతో నిర్మించిన సుభాష్‌నగర్ వంతెన కూడా అదే విధంగా విమర్శల పాలవుతోంది. భోపాల్ రైల్వే స్టేషన్‌కు వెళ్లే ప్రధాన మార్గంలో ఈ వంతెన ఉండటంతో రోజూ వేలాది వాహనాలు దీని మీదుగా వెళ్తుంటాయి. అయితే, పాములా మెలికలు తిరిగేలా, తక్కువ విస్తీర్ణంలో అనేక మలుపులు ఉండటంతో వాహనదారులు తీవ్ర ఇబ్బందులు పడుతున్నారు.

-ప్రాణాల మీదకు తెస్తున్న ప్రమాదాలు

ఈ వంతెనల మీద తరచుగా జరుగుతున్న ప్రమాదాలు ఆందోళన కలిగిస్తున్నాయి. ఇటీవల ఎనిమిది గంటల వ్యవధిలో రెండు పెద్ద ప్రమాదాలు జరిగాయి. ఒక ఘటనలో కారు డివైడర్‌ను ఢీకొట్టి గాలిలో పల్టీలు కొట్టగా, మరొక ప్రమాదంలో ఓ స్కూల్ వ్యాన్ డివైడర్‌ను ఢీకొట్టి విద్యార్థులు గాయపడ్డారు. రాత్రి సమయాల్లో అధిక వేగంతో వచ్చే వాహనాలు మలుపుల్లో అదుపుతప్పే అవకాశం ఎక్కువగా ఉందని స్థానికులు చెబుతున్నారు. కొన్ని సెకన్ల వ్యవధిలోనే మూడు, నాలుగు మలుపులు తిరగాల్సి రావడం ప్రమాదాలకు దారి తీస్తోందని వారు పేర్కొంటున్నారు.

- ప్రభుత్వ స్పందన, నిర్మాణ సంస్థ సమర్థన

ప్రజల నుంచి వస్తున్న తీవ్ర విమర్శల నేపథ్యంలో మధ్యప్రదేశ్ ముఖ్యమంత్రి మోహన్ యాదవ్ ఈ విషయంపై స్పందించారు. ఇంజినీరింగ్ వైఫల్యాలపై చర్యలు చేపట్టి, ఇప్పటివరకు ఏడుగురు ఇంజనీర్లను సస్పెండ్ చేయడంతో పాటు, ఒక విశ్రాంత చీఫ్ ఇంజనీర్‌పై శాఖాపర విచారణకు ఆదేశించారు. అలాగే, వంతెన పునరుద్ధరణకు ప్రత్యేక కమిటీని కూడా ఏర్పాటు చేశారు.

అయితే, ఈ వంతెనల డిజైన్‌పై వస్తున్న విమర్శలను నిర్మాణ సంస్థ సమర్థించుకుంది. భూమి కొరత, సమీపంలోని మెట్రో స్టేషన్ కారణంగా వంతెనలను ఈ విధంగా డిజైన్ చేయాల్సి వచ్చిందని తెలిపింది. కొంత అదనపు భూమి లభించి ఉంటే ఈ సమస్య తలెత్తి ఉండేది కాదని పేర్కొంది.

శాశ్వత పరిష్కారమే శరణ్యం

భోపాల్‌లో చోటుచేసుకున్న ఈ రెండు వంతెనల వివాదాలు ప్రణాళికా లోపాలు, ఇంజినీరింగ్ నిర్లక్ష్యం, ప్రజల ప్రాణాలతో చెలగాటం అనే వాస్తవాలను బయటపెడుతున్నాయి. ప్రజల ప్రాణాలకు ముప్పు తలెత్తేలా ఉండే డిజైన్‌లు ఆమోదం పొందడం విస్మయం కలిగిస్తోంది. ప్రభుత్వం ఈ వ్యవహారాన్ని తక్షణమే సవరించి శాశ్వత పరిష్కారాన్ని కనుగొనాలని ప్రజలు కోరుతున్నారు. లేకపోతే భవిష్యత్తులో మరిన్ని ప్రాణ నష్టాలు చోటుచేసుకునే ప్రమాదం ఉందని హెచ్చరిస్తున్నారు.

ఈ ఘటనలు భవిష్యత్ నిర్మాణ ప్రాజెక్టులలో మరింత అప్రమత్తత, పటిష్టమైన ప్రణాళిక అవసరాన్ని నొక్కి చెబుతున్నాయి.