ఆపరేషన్ సిందూర్: "ఒకే దేశం.. ఒకే భర్త" పథకమా? సీఎం వివాదాస్పద వ్యాఖ్యలు

పంజాబ్ ముఖ్యమంత్రి, ఆమ్ ఆద్మీ పార్టీ (ఆప్) నేత భగవంత్ మాన్, బీజేపీపై తీవ్ర స్థాయిలో విమర్శలు గుప్పించారు. 'ఆపరేషన్ సిందూర్'పై మాట్లాడుతూ "ఇదేమైనా 'ఒకే దేశం, ఒకే భర్త' పథకమా?" అంటూ ప్రధాని మోదీ ప్రభుత్వాన్ని సూటిగా ప్రశ్నించారు. లూథియానా ఉప ఎన్నికల ప్రచారంలో భాగంగా ఆయన ఈ వ్యాఖ్యలు చేశారు.

-'సిందూర్'ను జోక్‌గా మార్చిన బీజేపీ:

"బీజేపీ 'ఆపరేషన్ సిందూర్' పేరుతో ఓట్లు అడుగుతోంది. ఈ వ్యక్తులు 'సిందూర్'ను ఒక జోక్‌గా మార్చేశారు. ప్రతీ ఇంటికీ సిందూర్ పంపుతున్నారు. ఇక ప్రధాని నరేంద్ర మోదీ పేరుతో సిందూర్ రాసుకుంటారా? ఇది 'ఒకే దేశం, ఒకే భర్త' పథకమా?" అని భగవంత్ మాన్ వ్యంగ్యంగా ప్రశ్నించారు. ఇంటింటికీ సిందూర్ పంపనున్నారన్న వార్తలను కేంద్రం ఖండించినప్పటికీ, పంజాబ్ సీఎం ఈ వ్యాఖ్యలు చేయడం ప్రాధాన్యతను సంతరించుకుంది.

-'ఆపరేషన్ సిందూర్' నేపథ్యం:

పహల్గామ్ ఉగ్రదాడిలో 26 మంది పర్యాటకులు మరణించిన నేపథ్యంలో భారత సైన్యం 'ఆపరేషన్ సిందూర్' చేపట్టింది. అయితే నరేంద్ర మోదీ ప్రభుత్వ ఘనతను చాటిచెప్పేందుకు బీజేపీ దేశవ్యాప్త ప్రచారం చేపడుతుందని ఇటీవల ప్రకటన వచ్చింది. ఈ ప్రకటన అనంతరం, ప్రచారంలో భాగంగా బీజేపీ ప్రతి ఇంటికీ సిందూర్ పంపుతుందని కొన్ని వార్తలు వచ్చాయి. అయితే, ఈ వార్తలను ప్రెస్ ఇన్ఫర్మేషన్ బ్యూరో (పీఐబీ) ఖండించింది.

గతంలో, పశ్చిమ బెంగాల్ ముఖ్యమంత్రి మమతా బెనర్జీ కూడా భారత సైన్యం చర్యకు 'ఆపరేషన్ సిందూర్' అని పేరు పెట్టడాన్ని తప్పుబట్టారు. "ఆపరేషన్ సిందూర్ అనే పేరు వారి మెదడులో పుట్టిందే. ఇది రాజకీయ ప్రేరేపితం. వివిధ దేశాల్లో బహుళ పార్టీల ప్రతినిధులు పర్యటించి భారతదేశ వైఖరిని వివరిస్తున్న తరుణంలో నేను ఈ విషయం చెప్పాలనుకోలేదు. కానీ ఈరోజు, ప్రధానమంత్రి రాజకీయ ప్రచారం కోసమే పశ్చిమ బెంగాల్‌కు వచ్చారు" అని మమతా బెనర్జీ వ్యాఖ్యానించారు. "మొదట, ప్రధాని మోదీ తనను తాను చాయ్‌వాలాగా అభివర్ణించుకున్నారు. తర్వాత, కాపలాదారుగా చెప్పుకున్నారు. ఇప్పుడు సిందూర్ అమ్మడానికి ఇక్కడికి వచ్చారు" అని ఆమె విమర్శించారు.

మొత్తంగా, 'ఆపరేషన్ సిందూర్' పేరు, దానిపై రాజకీయ పార్టీల వ్యాఖ్యలు ప్రస్తుతం దేశ రాజకీయాల్లో చర్చనీయాంశంగా మారాయి.