50 లక్షలు = 10 లక్షల జీతమా? బెంగళూరు ఐటీ జీతాలపై హాట్ టాపిక్
బెంగళూరు ఐటీ రంగంలో జీతాల గురించి ప్రస్తుతం సోషల్ మీడియాలో తీవ్ర చర్చ నడుస్తోంది.
By: Tupaki Desk | 16 Jun 2025 5:00 PM IST
బెంగళూరు ఐటీ రంగంలో జీతాల గురించి ప్రస్తుతం సోషల్ మీడియాలో తీవ్ర చర్చ నడుస్తోంది. "సంవత్సరానికి ₹50 లక్షల ప్యాకేజీ అంటే ఇప్పుడు నిజంగా ₹10 లక్షల విలువ కలిగి ఉందా?" అనే ప్రశ్నను సౌరవ్ దత్తా అనే యూజర్ X లో లేవనెత్తడంతో ఈ డిబేట్ మొదలైంది. టెక్ ఉద్యోగులు, నిపుణులు వందల సంఖ్యలో తమ అభిప్రాయాలను వ్యక్తం చేస్తూ ఈ చర్చను మరింత ఊపందించారు.
అధిక జీవన వ్యయం.. కారణమా?
చాలా మంది నెటిజన్లు బెంగళూరులో బాగా పెరిగిన జీవన ఖర్చులను దృష్టిలో ఉంచుకుంటూ ఈ వాదనను సమర్థిస్తున్నారు. "ఒకప్పుడు ₹50 లక్షల ప్యాకేజీ అంటే రాజరిక జీవితం... కానీ ఇప్పుడు అదే జీతంతో సగటు జీవితం కూడా కష్టమే" అని పలువురు పేర్కొన్నారు. ఇంకొందరు "బెంగళూరులో ₹1 కోటి ప్యాకేజీ దొరకకపోతే మీ ప్రయాణం వృథా" అంటూ తీవ్ర వ్యాఖ్యలు చేశారు. అయితే అందరూ దీనిని అంగీకరించలేదు. "మీరు దేనితో పోలుస్తున్నారు? 2005, 2015 లేదా 2020 నాటి ₹10 లక్షల జీతంతోనా?" అంటూ కొందరు ప్రశ్నించారు.
-టాప్ స్కిల్స్ ఉన్నవారికే అధిక ప్యాకేజీలు
బెంగళూరు ఐటీ రంగంలో ప్యాకేజీలు పెరిగిన మాట నిజమే కానీ అవి అగ్రశ్రేణి నైపుణ్యాలున్నవారికే లభిస్తున్నాయని పలువురు పేర్కొన్నారు. "బాగా ఉన్న టెక్ స్కిల్స్, అనుభవం ఉన్నవారికి మాత్రమే ఇవి వర్తిస్తాయి. మిగిలినవారు ఇంకా మధ్యస్థ జీతాలే పొందుతున్నారు" అని ఓ యూజర్ అభిప్రాయపడ్డాడు.
-ఇతర నగరాల్లో పరిస్థితి ఎలా ఉంది?
ఈ డిబేట్ ద్వారా భారతదేశంలోని ఇతర టెక్ నగరాల జీతాల తేడాలు కూడా వెలుగులోకి వచ్చాయి. "ఇది బెంగళూరులోనే ఉంటుంది కానీ హైదరాబాద్లో ₹25 లక్షల జీతం ఇప్పటికీ భారీగానే భావిస్తారు" అని ఓ నెటిజన్ తెలిపాడు. జీతాల తేడాలు నగరాల ఆధారంగా ఉన్నాయని ఇది చూపిస్తుంది.
-ప్యాకేజీల నిర్మాణంపై అస్పష్టత
జీతాల నిర్మాణం కూడా ఈ చర్చకు కారణమైంది. మైక్రోసాఫ్ట్ వంటి కంపెనీలు ₹50 లక్షల ప్యాకేజీ ఇచ్చినా, అందులో బేసిక్ సాలరీ కేవలం ₹16 లక్షలే అవుతుందని ఓ ఉద్యోగి వివరించాడు. మిగిలిన భాగం స్టాక్స్, బోనస్లు, RSUల రూపంలో 3-4 సంవత్సరాలలో విడుదల అవుతాయని, వాటిపై మార్కెట్ పరిస్థితుల ప్రభావం ఉంటుందని పేర్కొన్నాడు. అందువల్ల చేతికి వచ్చే నెల జీతం చాలా తక్కువగా ఉండవచ్చని అన్నారు.
-బెంగళూరు టెక్ వర్క్ఫోర్స్.. 1 మిలియన్ మార్కును దాటింది
ఈ వేతన డిబేట్ నడుస్తున్నప్పుడే బెంగళూరు ప్రపంచ టెక్ హబ్గా తన స్థానాన్ని మరింత బలోపేతం చేసుకుంది. CBRE గ్లోబల్ టెక్ టాలెంట్ గైడ్బుక్ 2025 ప్రకారం.. బెంగళూరులో టెక్ ఉద్యోగుల సంఖ్య 1 మిలియన్ దాటింది. ఇది ఆసియా-పసిఫిక్ ప్రాంతంలోనే అతిపెద్ద టెక్ శక్తిగా నిలిచింది. శాన్ ఫ్రాన్సిస్కో, న్యూయార్క్, లండన్ వంటి పట్టణాల సరసన బెంగళూరు స్థానం దక్కించుకోవడం గర్వకారణం.
ఈ డిబేట్ ద్వారా ఒక విషయం స్పష్టమైంది. ఐటీ రంగంలో జీతాల మీద భిన్న అభిప్రాయాలు ఉన్నాయి. జీవన వ్యయం, ప్యాకేజీ నిర్మాణం, టాలెంట్ డిమాండ్ వంటి అంశాలు దీనిపై ప్రభావం చూపుతున్నాయి. అయితే బెంగళూరు టెక్ రంగం మాత్రం నిరంతరం ఎదుగుతూ ప్రపంచ వ్యాప్తంగా తన ముద్ర వేసుకుంటోంది.