7 వేల అడుగులు మీ జీవితాన్ని మార్చేస్తాయి..

మన ఆరోగ్యాన్ని కాపాడుకోవడానికి ఎన్నో మార్గాలున్నాయి. వాటిలో నడక అనేది అత్యంత సులువైన, ఖర్చు లేని, ప్రభావవంతమైన వ్యాయామం. మన శరీరాన్ని ఫిట్‌గా, మనసును తాజాగా ఉంచడంలో నడక కీలక పాత్ర పోషిస్తుంది. తాజాగా ప్రఖ్యాత వైద్య జర్నల్ లాన్సెట్లో ప్రచురితమైన ఒక విశ్లేషణ, రోజుకు కనీసం 7,000 అడుగులు నడవడం వల్ల మన ఆరోగ్యానికి ఎన్నో అద్భుత ప్రయోజనాలు కలుగుతాయని స్పష్టం చేసింది. డిప్రెషన్, డయాబెటిస్, క్యాన్సర్, డిమెన్షియా వంటి అనేక తీవ్రమైన వ్యాధుల ముప్పును గణనీయంగా తగ్గించడంలో నడక ఎంతగానో తోడ్పడుతుందని ఈ అధ్యయనం వెల్లడించింది.

లాన్సెట్ అధ్యయనం ఏం చెబుతుంది?

పరిశోధకుల ప్రకారం.. రోజుకు 7,000 అడుగులు నడిచే అలవాటు చేసుకుంటే, మన ఆయుష్షు పెరుగుతుంది అంతేకాకుండా అనేక వ్యాధులను నివారించవచ్చు. రోజుకు కేవలం 2,000 అడుగులు నడిచే వారితో పోలిస్తే, 7,000 అడుగులు నడిచే వారిలో మరణ ముప్పు సగానికి పైగా తగ్గుతుందని ఈ అధ్యయనం తేల్చింది. ఇది చాలా పెద్ద సంఖ్య. మానసిక ఆరోగ్యంపై నడక ప్రభావం అద్భుతం. క్రమం తప్పకుండా నడవడం వల్ల మానసిక ఆరోగ్యం మెరుగుపడి, డిప్రెషన్ చికిత్స అవసరం లేకుండా నివారించవచ్చని పరిశోధకులు చెబుతున్నారు. వృద్ధాప్యంలో వచ్చే జ్ఞాపకశక్తి లోపం (డిమెన్షియా) ముప్పును తగ్గించడంలో నడక ఒక గొప్ప ఔషధంలా పనిచేస్తుంది. మెదడు ఆరోగ్యానికి ఇది ఎంతో మేలు చేస్తుంది. నడక క్యాన్సర్ బారిన పడే ప్రమాదాన్ని 6% తగ్గిస్తుంది. అంతేకాదు, క్యాన్సర్ వల్ల మరణించే ప్రమాదం కూడా 37% వరకు తగ్గుతుందని అధ్యయనం పేర్కొంది. రక్త ప్రసరణను మెరుగుపరచడం, ఒత్తిడిని తగ్గించడం ద్వారా నడక హృదయానికి ఎంతో మేలు చేస్తుంది. గుండె సంబంధిత వ్యాధుల ముప్పు 25% వరకు తగ్గుతుందని తేలింది. ప్రతిరోజూ నడవడం వల్ల రక్తంలో చక్కెర స్థాయిలు నియంత్రణలో ఉంటాయి. ఇది టైప్ 2 డయాబెటిస్ వచ్చే ప్రమాదాన్ని 14% తగ్గిస్తుంది.

విశ్లేషణ ఆధారాలు..

ఈ అధ్యయనం 2014 నుంచి 2025 మధ్య నిర్వహించిన 88 సర్వేల ఆధారంగా రూపొందించబడింది. వీటిలో యూకే, ఆస్ట్రేలియా, స్పెయిన్, నార్వే వంటి దేశాలకు చెందిన 160,000 మందికి పైగా పాల్గొన్నారు. ఈ పెద్ద ఎత్తున జరిగిన విశ్లేషణ నడక వల్ల కలిగే ఆరోగ్య ప్రయోజనాలకు బలమైన ఆధారాలను అందిస్తుంది.

-నడక ఎందుకు అవసరం?

ప్రపంచవ్యాప్తంగా ప్రతి ముగ్గురు పెద్దలలో ఒకరు తగినంత శారీరక శ్రమ చేయడం లేదు. దీనివల్ల స్థూలకాయం, రక్తపోటు, మానసిక ఆరోగ్య సమస్యలు విపరీతంగా పెరుగుతున్నాయి. ఈ సమస్యలన్నింటికీ నడక ఒక సాధారణ, సమర్థవంతమైన పరిష్కారం. "చిన్న అలవాట్లు.. పెద్ద మార్పులకు దారి తీస్తాయి" అనే మంత్రాన్ని మనం పాటించాలి.

రోజుకు కనీసం 7,000 అడుగులు నడవడం అనేది చిన్న విషయంగా అనిపించవచ్చు, కానీ దాని ప్రభావం చాలా పెద్దది. మన ఆరోగ్యం, మన భవిష్యత్ మన చేతుల్లోనే ఉన్నాయి. నడకను అలవాటు చేసుకుందాం. ఆరోగ్యంగా, ఆనందంగా జీవించేందుకు మనం వేసే ప్రతి అడుగూ ముందడుగే!