టెక్ వ్యథలు : ఉబెర్ డ్రైవర్ గా టాప్ టెక్ లీడర్..షాకింగ్ కారణం
ఆశ్చర్యకరమైన విషయం ఏమిటంటే, ఆ టెక్ లీడర్ ఆర్థిక అవసరం వల్ల ఊబర్ డ్రైవర్గా పని చేయడం లేదు.
By: Tupaki Desk | 31 May 2025 12:09 AM IST
భారతదేశపు టెక్నాలజీ రాజధాని "ఇండియాలోని సిలికాన్ వ్యాలీ"గా పేరుగాంచిన బెంగళూరులో ప్రస్తుతం ఒక ఆసక్తికరమైన సంఘటన చర్చనీయాంశంగా మారింది. టెక్ ప్రపంచంలో అపారమైన అవకాశాలు ఉన్నప్పటికీ, ఈ నగరం ఉద్యోగుల జీవనశైలిపై తీవ్ర ప్రభావాన్ని చూపుతోంది.
- ఆశ్చర్యపరిచిన స్క్రీన్షాట్
ఇటీవల X లో ఒక వినియోగదారుడు షేర్ చేసిన స్క్రీన్షాట్ సంచలనం సృష్టించింది. ఆ స్క్రీన్షాట్లో అతను ఊబర్లో క్యాబ్ బుక్ చేయగా.., అతడిని పికప్ చేయడానికి వచ్చింది ఎవరో కాదు, అతడి కార్యాలయంలోని ఓ సీనియర్ టెక్ లీడర్!
-ఆర్థిక అవసరం కాదంటా!
ఆశ్చర్యకరమైన విషయం ఏమిటంటే, ఆ టెక్ లీడర్ ఆర్థిక అవసరం వల్ల ఊబర్ డ్రైవర్గా పని చేయడం లేదు. రొటీన్ ఆఫీస్ పనులు, రోజువారీ జీవితం విసుగు పుట్టించడంతో, కొంత విరామం కోసం, కొత్త వ్యక్తులను కలవడానికి ఈ మార్గాన్ని ఎంచుకున్నానని ఆ టెక్ లీడర్ వెల్లడించారు. బెంగళూరు ట్రాఫిక్ కూడా అతనికి ఒక ఉపశమనంగా మారిందట. కొత్త మార్గాలలో ప్రయాణించడం, వివిధ రకాల వ్యక్తులను కలవడం అతనికి ఆత్మసంతృప్తిని ఇస్తుందని చెప్పాడు.
- ఇదే మొదటిసారి కాదు...
ఇలాంటి సంఘటనలు బెంగళూరులో ఇదే మొదటిసారి కాదు. గతంలో, మైక్రోసాఫ్ట్లో పనిచేస్తున్న ఒక ఉద్యోగి వారాంతాల్లో ఆటో రిక్షా నడుపుతున్నాడనే వార్త కూడా బయటకు వచ్చింది. ఒంటరితనం నుంచి బయటపడేందుకు అతను ఈ మార్గాన్ని ఎంచుకున్నాడని తెలిసింది.
- మానసిక ఆరోగ్యంపై చర్చ
ఈ సంఘటనలు వర్క్-లైఫ్ బ్యాలెన్స్, మానసిక ఆరోగ్యంపై తీవ్రమైన చర్చను లేవనెత్తుతున్నాయి. టెక్ రంగంలోని చాలామంది ఉద్యోగులు ఒత్తిడి, ఒంటరితనం, నిస్సారతతో పోరాడుతున్నారు. ఈ నేపథ్యంలో, సంస్థలు ఉద్యోగుల శ్రేయస్సును దృష్టిలో ఉంచుకుని, వారికి మానవీయమైన, సృజనాత్మకతకు ప్రాధాన్యతనిచ్చే వాతావరణాన్ని సృష్టించాల్సిన అవసరం ఎంతైనా ఉంది.
- బెంగళూరుకు ఒక గుణపాఠం
బెంగళూరు టెక్ రంగంలో ఎంత వేగంగా అభివృద్ధి చెందుతున్నా, అదే స్థాయిలో ఉద్యోగుల మానసిక స్థితిని అర్థం చేసుకుని, వారి జీవన నాణ్యతను మెరుగుపరిచే ప్రయత్నాలు జరగాలి. ఈ వాస్తవికతను గుర్తించలేకపోతే, తమ అసలైన జీవిత సంతృప్తిని పొందేందుకు ఉద్యోగులు ఊబర్ డ్రైవింగ్ వంటి ప్రత్యామ్నాయ మార్గాలను ఎంచుకోవాల్సిన పరిస్థితి ఏర్పడుతుంది.