రెండు విమానాల్లో డ్యామేజ్ : గాల్లో దీపంలా ప్రయాణికుల భద్రత

గత కొన్ని రోజులుగా జరిగిన రెండు విమానయాన సంఘటనలు ప్రయాణికుల భద్రత, వాతావరణ ప్రభావం, సాంకేతిక సమస్యలపై చర్చకు దారితీశాయి. ఒక సంఘటనలో, బనిహాల్ పాస్ వద్ద స్పైస్‌జెట్ విమానంలో తీవ్రమైన టర్బులెన్స్ సంభవించగా.. మరొక సంఘటనలో పాట్నాలో ఇండిగో విమానానికి పక్షి ఢీకొనడంతో అత్యవసర ల్యాండింగ్ చేయాల్సి వచ్చింది.

-స్పైస్‌జెట్ విమానంలో హడావుడి: ప్రయాణికులకు నరకం

ఢిల్లీ నుంచి శ్రీనగర్ వెళ్తున్న స్పైస్‌ జెట్ విమానం SG-385లో జూలై 12న జరిగిన ఘటన ప్రస్తుతం సోషల్ మీడియాలో తీవ్ర చర్చనీయాంశంగా మారింది. విమానం బనిహాల్ పాస్ వద్ద "శూన్యస్థితిలో వందల మీటర్లకు పైగా దిగిపోయిందని" ఒక ప్రయాణికుడు చిత్రీకరించిన వీడియోలో ప్రయాణికులు భయంతో కేకలు వేయడం కనిపించింది. ఈ వీడియో తక్షణమే వైరల్‌గా మారింది. అయితే స్పైస్‌జెట్ ఈ ఆరోపణలను ఖండించింది. విమానయాన సంస్థ తన ప్రకటనలో "జూలై 12న జరిగిన ఈ విమానం ప్రయాణంలో మాన్సూన్ వాతావరణ పరిస్థితుల కారణంగా స్వల్ప తుపానునకు (టర్బులెన్స్) లోనైంది. ఇది సాధారణమే. విమానం ఏ దశలోనూ 'పతనమవడం' జరగలేదు. ఎలాంటి సాంకేతిక సమస్యలు నమోదు కాలేదు. సిబ్బంది ఎవరూ గాయపడలేదు. విమానం సురక్షితంగా శ్రీనగర్‌లో ల్యాండ్ అయింది" అని స్పష్టం చేసింది. ఈ తుపాను దశ విమానం ల్యాండ్ చేసే సమయంలోనే జరిగిందని, అప్పటికే సీట్‌బెల్ట్ సంకేతం వెలిగించి, ప్రయాణికులు సీటు బెల్టులు కట్టుకోవాలని సూచన ఇచ్చామని సంస్థ వెల్లడించింది.

పక్షి ఢీకొనడంతో ఇండిగో విమానానికి పాట్నాలో అత్యవసర ల్యాండింగ్

ఇంకొక సంఘటనలో పాట్నా నుంచి ఢిల్లీ వెళ్తున్న ఇండిగో విమానం (ఫ్లైట్ IGO5009) బుధవారం ఉదయం పక్షి ఢీకొన్న కారణంగా తక్షణమే తిరిగి ల్యాండ్ చేయాల్సి వచ్చింది. ఈ సంఘటనలో ఎటువంటి ప్రాణనష్టం జరగలేదని అధికారులు తెలిపారు. విమానంలో మొత్తం 175 మంది ప్రయాణికులు, సిబ్బంది ఉన్నారు. పాట్నా విమానాశ్రయం అధికారుల ప్రకారం "ఉదయం 8:42కి టేక్ ఆఫ్ అయిన ఈ విమానాన్ని తక్షణమే తిరిగి రప్పించాల్సి వచ్చింది. రన్‌వేపై మృత పక్షి శరీర భాగాలు గుర్తించబడిన తరువాత, ఈ సమాచారాన్ని ఏప్రోచ్ కంట్రోల్ యూనిట్ ద్వారా పైలట్‌కు తెలియజేశాం. ఒక ఇంజిన్‌లో వైబ్రేషన్ వల్ల ఎమర్జెన్సీ ల్యాండింగ్ జరిగింది. ఉదయం 9:03కి విమానం సురక్షితంగా రన్‌వే 7పై ల్యాండ్ అయింది" అని పేర్కొన్నారు. ప్రయాణికులను గమ్యస్థానానికి తరలించేందుకు ఇతర ఏర్పాట్లు చేస్తామని ఇండిగో వెల్లడించింది. విమానాన్ని పూర్తిగా పరిశీలించి మరమ్మతులు చేపడతామని అధికారులు చెప్పారు.

-ప్రయాణికుల భద్రతపై నిపుణుల సూచనలు

ఈ రెండు సంఘటనలు విమాన ప్రయాణాల్లో వాతావరణం, సాంకేతిక సమస్యల ప్రాధాన్యతను మరోసారి తెలియజేస్తున్నాయి. ఇలాంటి సందర్భాల్లో ప్రయాణికులు భద్రతా మార్గదర్శకాలను తప్పనిసరిగా పాటించాల్సిన అవసరం ఉందని నిపుణులు సూచిస్తున్నారు. సీటు బెల్ట్ సంకేతం వెలిగినప్పుడు వెంటనే సీటు బెల్టు పెట్టుకోవడం, క్యాబిన్ సిబ్బంది ఇచ్చే సూచనలను పాటించడం అత్యవసరం.

ఈ సంఘటనలు విమానయాన సంస్థలు వాతావరణ మార్పులకు సాంకేతిక లోపాలకు సిద్ధంగా ఉండాల్సిన ఆవశ్యకతను కూడా నొక్కి చెబుతున్నాయి. ప్రయాణికుల భద్రతకు అత్యధిక ప్రాధాన్యత ఇవ్వాలని విశ్లేషకులు అభిప్రాయపడుతున్నారు.