టెస్లా AI విప్లవానికి మార్గదర్శకుడు అశోక్.. ఎవరితడు? ఏంటా స్టోరీ

అమెరికాలో నివసిస్తున్న భారతీయ మూలాలున్న వ్యక్తులు రాజకీయంగా, వృత్తిపరంగా తమ ప్రభావాన్ని నిరంతరం పెంచుకుంటున్నారు. ఈ క్రమంలో టెస్లా వ్యవస్థాపకుడు ఇలాన్ మస్క్ ప్రశంసలు అందుకున్న మరో ఎన్‌ఆర్‌ఐగా మన భారతీయ మూలాలున్న అశోక్ ఎల్లుస్వామి నిలిచారు. టెస్లా AI/ఆటోపైలట్ రంగంలో అశోక్ చూపిన అత్యుత్తమ నాయకత్వానికి మస్క్ మరోసారి కృతజ్ఞతలు తెలిపారు.

టెస్లాలో తొలి ఆటోపైలట్ నియామకం

అశోక్ ఎల్లుస్వామి 2014లో టెస్లాలో చేరిన తొలి ఆటోపైలట్ ఇంజనీర్‌గా గుర్తింపు పొందారు. 2019 నుండి ఆయన టెస్లా AI సాఫ్ట్‌వేర్ విభాగాన్ని నడిపిస్తున్నారు. 2025 జూన్ 2న మస్క్ తన 2015 నాటి ట్వీట్‌ను మరోసారి చేస్తూ "టెస్లాలో ఆటోపైలట్ సాఫ్ట్‌వేర్ బృందాన్ని సామాన్య స్వయం చలనం సాధించేందుకు విస్తరిస్తున్నాం" అని అప్పట్లో రాసిన ట్వీట్‌కు ఈ వ్యాఖ్యను జోడించారు: "ఈ ట్వీట్‌తోనే టెస్లా ఆటోపైలట్ బృందాన్ని ప్రారంభించాను. అశోక్ – ఇప్పుడు ఈ బృందానికి నేతృత్వం వహిస్తున్న వ్యక్తి. నేను ఇంటర్వ్యూ చేసిన మొదటి వ్యక్తి. మిలన్, ఇప్పుడు ఆప్టిమస్‌కు నేతృత్వం వహిస్తున్నాడు, ఆ సమయంలోనే చేరాడు. టెస్లా AIలోని అనేక కీలక సభ్యులు ఆ మొదటి దశ నుంచే ఉన్నారు." అని మస్క్ పేర్కొన్నాడు.

అశోక్ నాయకత్వానికి మస్క్ నుంచి కృతజ్ఞతలు

మస్క్, అశోక్ పాత్రకు గతంలో కూడా ప్రశంసలు వ్యక్తం చేశారు. 2024లో కూడా మస్క్ ట్వీట్ చేశారు. "ధన్యవాదాలు అశోక్! అశోక్ టెస్లా AI/ఆటోపైలట్ బృందంలో చేరిన తొలి వ్యక్తి. తర్వాతి దశలో ఆయన ఆ విభాగానికే నాయకత్వం వహించారు. ఆయన లేకుండా, అలాగే మా అద్భుత బృందం లేకుండా మేము ఒక సాధారణ కారు సంస్థగానే మిగిలిపోయేవాళ్లం. ఒక స్వయం డ్రైవింగ్ పరిష్కారాన్ని వెతుకుతున్న కంపెనీగా నిలిచేవాళ్లం కాదు." అని పేర్కొన్నాడు.

-అశోక్ ఎల్లుస్వామి ఎవరు? ఆయన విద్యా, వృత్తి నేపథ్యం

శాన్ ఫ్రాన్సిస్కోలో నివసిస్తున్న అశోక్, చెన్నైలోని గిండి ఇంజనీరింగ్ కాలేజీ నుంచి ఎలక్ట్రానిక్స్ అండ్ కమ్యూనికేషన్ ఇంజనీరింగ్‌లో బ్యాచిలర్ డిగ్రీ పొందారు. అనంతరం కార్నెగీ మెలన్ యూనివర్సిటీ నుంచి రొబోటిక్ సిస్టమ్స్ డెవలప్‌మెంట్‌లో మాస్టర్స్ పూర్తి చేశారు. టెస్లాలో చేరే ముందు WABCO వాహన నియంత్రణ వ్యవస్థల్లో సాఫ్ట్‌వేర్ ఇంజనీర్‌గా పనిచేశారు. అంతకు ముందు వోక్స్‌వ్యాగన్ ఎలక్ట్రానిక్ రీసెర్చ్ ల్యాబ్‌లో రీసెర్చ్ ఇంటర్న్‌షిప్ చేశారు.

అశోక్ ఎల్లుస్వామి టెస్లా ఆటోపైలట్ , AI ప్రయాణానికి ఒక మూలస్తంభం. ఆయన్ను తన మొదటి ఎంపికగా ఎంపిక చేసిన ఇలాన్ మస్క్, ఇప్పుడు గర్వంతో ఆయనను ప్రపంచానికి పరిచయం చేస్తున్నారు. భారతీయ ప్రతిభ ప్రపంచ స్థాయిలో ఎలా వెలుగొందుతోందో ఇది మరో ఉదాహరణ.