ఎయిర్ ఇండియా ప్రయాణం.. టాయిలెట్‌కు వెళ్లడానికి కూడా టైం ఇవ్వరా ఏంటి?

విమాన ప్రయాణం ఒక్కోసారి ఎన్నో వింత అనుభవాలను కలిగిస్తుంది. కొన్ని ఆహ్లాదకరంగా ఉంటే, మరికొన్ని షాకింగ్‌గా ఉంటాయి. తాజాగా ఎయిర్ ఇండియా విమానంలో జరిగిన ఒక దారుణమైన సంఘటన ప్రయాణికులందరినీ దిగ్భ్రాంతికి గురిచేసింది. ఢిల్లీ నుండి బ్యాంకాక్ వెళ్తున్న విమానంలో ఒక ప్రయాణికుడు తోటి ప్రయాణికుడిపై మూత్రం పోయడంతో కలకలం రేగింది. ఈ ఘటనకు సంబంధించిన పూర్తి వివరాలు ఇప్పుడు తెలుసుకుందాం.

ఏప్రిల్ 9, 2025 బుధవారం ఢిల్లీ నుండి బ్యాంకాక్ వెళ్తున్న ఎయిర్ ఇండియా విమానంలో ఒక అసహ్యకరమైన సంఘటన చోటు చేసుకుంది. ప్రయాణిస్తున్న సమయంలో ఒక వ్యక్తి తోటి ప్రయాణికుడిపై మూత్రం పోశాడని సమాచారం. ఈ విషయంపై ఎయిర్ ఇండియా డైరెక్టరేట్ జనరల్ ఆఫ్ సివిల్ ఏవియేషన్ (DGCA)కు తెలియజేసింది.

ఈ ఘటనపై స్పందించిన పౌర విమానయాన శాఖ మంత్రి రామ్ మోహన్ నాయుడు ఈ విషయాన్ని సీరియస్‌గా తీసుకుంటున్నట్లు తెలిపారు. ఎయిర్‌లైన్‌తో మాట్లాడి, వివరాలను ధృవీకరించిన తర్వాత అవసరమైన చర్యలు తీసుకుంటామని ఆయన హామీ ఇచ్చారు.

ఎయిర్ ఇండియా విమానం AI2336లో జరిగిన ఈ సంఘటనపై అధికారిక ప్రకటన విడుదల చేసింది. ఎయిర్‌లైన్ ప్రకారం, ఒక ప్రయాణికుడు అనుచితంగా ప్రవర్తించినట్లు క్యాబిన్ సిబ్బందికి సమాచారం అందింది. ప్రోటోకాల్ ప్రకారం, ఈ విషయాన్ని సంబంధిత అధికారులకు నివేదించారు. బాధ్యత కలిగిన ప్రయాణికుడిని హెచ్చరించారని, బాధిత ప్రయాణికుడిని బ్యాంకాక్‌లోని అధికారులకు ఫిర్యాదు చేయమని సూచించినట్లు ఎయిర్ ఇండియా తెలిపింది.

అయితే, ఈ సమయంలో సిబ్బంది స్పందన ఆశించిన స్థాయిలో లేదని నివేదికలు సూచిస్తున్నాయి. అవసరమైతే ఈ కేసును పరిశీలించడానికి ఒక స్వతంత్ర కమిటీని ఏర్పాటు చేస్తామని ఎయిర్ ఇండియా పేర్కొంది. DGCA నిర్దేశించిన స్టాండర్డ్ ఆపరేటింగ్ ప్రొసీజర్స్‌ (SOP)ను తాము అనుసరించామని కూడా ఎయిర్ ఇండియా ధృవీకరించింది. ఈ ఘటనపై అధికారులు ఎలాంటి చర్యలు తీసుకుంటారో వేచి చూడాలి.