విమానం, పైలెట్ల తప్పులేదు.. ఎయిరిండియా విమాన ప్రమాదంపై సీఈవో విల్సన్ సంచలన ప్రకటన

జూన్ 12న అహ్మదాబాద్ నుంచి లండన్‌కు బయలుదేరిన ఎయిరిండియా బోయింగ్ 787 డ్రీమ్‌లైనర్ విమానం టేకాఫ్ అయిన కొద్దిసేపటికే కుప్పకూలిన సంఘటన దేశవ్యాప్తంగా తీవ్ర కలకలం రేపింది. ఈ దుర్ఘటనలో ఒకరిని తప్పించి మిగిలిన ప్రయాణికులు, సిబ్బందితో పాటు, ఆసుపత్రి హాస్టల్‌లో ఉన్నవారితో కలిపి మొత్తం 271 మంది ప్రాణాలు కోల్పోయారు. ఈ ఘటనపై ఎయిరిండియా సీఈవో క్యాంప్‌బెల్ విల్సన్ తాజాగా స్పందిస్తూ పలు కీలక వ్యాఖ్యలు చేశారు.

-"విమానంలో ఎలాంటి లోపాలు లేవు"

ఎయిరిండియా నిర్వహించిన ఓ సమావేశంలో విల్సన్ మాట్లాడుతూ ప్రమాదానికి గురైన బోయింగ్ విమానాన్ని ప్రమాదానికి ముందు పూర్తిగా తనిఖీలు చేసినట్టు స్పష్టం చేశారు. ఇంజిన్, ఫ్యూయల్ స్విచ్‌లలో ఎలాంటి లోపాలు లేవని, నిర్వహణా లోపాలు కనిపించలేదని ఆయన తెలిపారు. అంతేకాదు విమానంలో ఉపయోగించిన ఇంధన స్విచ్‌లను రెండు సార్లు మార్పు చేశామని, అమెరికాకు చెందిన పరిశీలనా సంస్థ కూడా ఈ స్విచ్‌లు సురక్షితమైనవేనని నిర్ధారించిందని పేర్కొన్నారు.

ఇంధన స్విచ్‌ల ఆగిపోవడంపై ప్రాథమిక దర్యాప్తు

ప్రాథమిక దర్యాప్తు ప్రకారం, విమానం టేకాఫ్ అయిన కొన్ని సెకన్లకే రెండు ఇంధన స్విచ్‌లు ఒకేసారి ఆగిపోయినట్టు తెలుస్తోంది. దీని వలన ఇంధన సరఫరా ఆగిపోయి విమానం కూలిపోవడానికి దారితీసినట్టు అధికారులు ప్రాథమికంగా అంచనా వేస్తున్నారు. ఈ అంశంపై లోతుగా దర్యాప్తు కొనసాగుతోందని అధికారులు పేర్కొన్నారు.

పైలట్లపై వస్తున్న ఆరోపణలపై విమానయాన సంఘాల స్పందన

ఈ ప్రమాదానికి పైలట్లలో ఒకరు ఆత్మహత్యకు పాల్పడినట్టుగా అంతర్జాతీయ మీడియాలో వస్తున్న కథనాలపై విమానయాన సంఘాలు, పైలట్ యూనియన్లు తీవ్రంగా స్పందించాయి. ఇండియన్ కమర్షియల్ పైలట్స్ అసోసియేషన్ (ICPA) ఒక ప్రకటన విడుదల చేస్తూ, "దయచేసి మృతుల గౌరవాన్ని కాపాడండి. నిజమైన ఆధారాల కోసం వేచి చూడండి" అని విజ్ఞప్తి చేసింది. మృతులపై ఆరోపణలు చేయడం అనైతికమని, నిర్ధారణలు లేకుండా ఊహాగానాలు చేయడం బాధాకరమని పేర్కొన్నాయి.

-పౌర విమానయానశాఖ సూచన: ఊహాగానాలు వద్దు

ప్రమాదంపై ఏఏఐబీ విడుదల చేసిన ప్రాథమిక నివేదిక ప్రకారం బోయింగ్ 787 విమానంలో ఎటువంటి పక్షి ఢీకొన్న ఆనవాళ్లు కనిపించలేదని, కుట్ర కోణం లేదని తేలింది. అయినప్పటికీ, తుది నివేదిక రాకముందే పైలట్లపై ఆరోపణలు చేయడం తగదని పౌర విమానయానశాఖ కూడా సూచించింది. ఎయిర్‌లైన్ పైలట్స్ అసోసియేషన్ ఆఫ్ ఇండియా (ALPA) కూడా దర్యాప్తులో భాగస్వామ్యం కావాలని కోరుతూ చట్టపరంగా అవకాశాలను పరిశీలిస్తోంది.

-ఎయిరిండియా తరఫున రూ. కోటి పరిహారం

ఈ విషాదకర ఘటనలో మృతుల కుటుంబాలను ఆదుకునే క్రమంలో ఎయిరిండియా ఒక్కో కుటుంబానికి రూ. కోటి పరిహారం ప్రకటించింది. ప్రాణాలు కోల్పోయిన ప్రయాణికులు, సిబ్బంది, హాస్టల్‌లో మృతిచెందినవారిని సంస్థ ఘనంగా స్మరిస్తోంది.

- తుది నివేదిక కోసం వేచి చూడాలి

ఈ నేపథ్యంలో సీఈవో క్యాంప్‌బెల్ విల్సన్ చేసిన ప్రకటన మరోసారి చర్చనీయాంశమైంది. తుది నివేదిక వెలువడే వరకు ఊహాగానాలకు తావు ఇవ్వకుండా అధికారిక సమాచారం కోసం వేచి చూడాలని ఆయన సూచించారు. ప్రయాణికుల భద్రతే తమకు మొదటి ప్రాధాన్యత అని, విమానాల నిర్వహణ, తనిఖీల విషయంలో ఎటువంటి రాజీ పడబోమని తెలిపారు.

ఈ ప్రమాదం విమానయాన రంగానికే గట్టి హెచ్చరికగా నిలుస్తోంది. తుది నివేదిక వెలువడే వరకూ నిజాలేవి? తప్పులేవి? అనేది నిర్ధారించలేం. కానీ మానవీయంగా మృతుల గౌరవాన్ని కాపాడుతూ, బాధిత కుటుంబాలకు న్యాయం జరిగేలా చర్యలు తీసుకోవాల్సిన అవసరం ఎంతో ఉంది.