యుద్ధంలో అమెరికా ఏఐ గాడితప్పిందా?.. ఏఐ మిస్టేక్ వలన చిన్న పిల్లలు చనిపోయారు..

సాంకేతికత ఎంత అభివృద్ధి చెందుతున్నదో… అంతే ప్రమాదకరంగా కూడా మారుతుందనే అనుమానాలు తాజాగా మరోసారి తలెత్తాయి. ఆధునిక యుద్ధాల్లో కృత్రిమ మేధస్సు (ఏఐ) కీలక పాత్ర పోషిస్తున్నప్పటికీ.. అదే టెక్నాలజీ తప్పు నిర్ణయాలు తీసుకుంటే అమాయక ప్రాణాలు బలవుతాయని తాజా ఘటన చర్చకు దారి తీసింది. ఇరాన్‌పై అమెరికా చేపట్టిన దాడుల్లో ఏఐ వ్యవస్థ కారణంగా చిన్నారులు ప్రాణాలు కోల్పోయారనే అనుమానాలు ఇప్పుడు అంతర్జాతీయంగా చర్చనీయాంశంగా మారాయి.

ఇటీవల ఇరాన్‌కు సంబంధించిన కొన్ని వ్యూహాత్మక ప్రాంతాలపై అమెరికా మిలిటరీ భారీ స్థాయిలో దాడులు నిర్వహించింది. ఈ దాడుల ప్రణాళికలో అత్యాధునిక ఏఐ సిస్టమ్ అయిన “మేవెన్ స్మార్ట్ సిస్టమ్” కీలక పాత్ర పోషించినట్లు సమాచారం. సాధారణంగా ఒక సైనిక దాడికి లక్ష్యాలను గుర్తించడం.. సమాచారం సేకరించడం, వాటిని విశ్లేషించడం వంటి ప్రక్రియలకు రోజులు లేదా వారాలు పట్టే అవకాశం ఉంటుంది. అయితే ఈసారి ఏఐ సాంకేతికత వాడడంతో కేవలం 12 గంటల్లోనే 900కుపైగా లక్ష్యాలను గుర్తించి దాడి ప్రణాళికను రూపొందించగలిగింది.

ఈ మేవెన్ సిస్టమ్ ఉపగ్రహాలు, డ్రోన్లు, గూఢచారి నివేదికలు, కమ్యూనికేషన్ డేటా వంటి 150కుపైగా వనరుల నుంచి రహస్య సమాచారాన్ని సేకరించి క్షణాల్లో విశ్లేషిస్తుంది. ఆ డేటా ఆధారంగా శత్రు స్థావరాలు, ఆయుధ గోదాములు, కమాండ్ కేంద్రాలను గుర్తించి మిలిటరీకి సూచనలు ఇస్తుంది. దీంతో దాడుల వేగం పెరిగింది. అయితే ఇదే సమయంలో ఒక కీలక సమస్య కూడా వెలుగులోకి వచ్చింది.

కొన్ని లక్ష్యాలపై దాడి జరిపిన తర్వాత అక్కడ సైనిక స్థావరాలు కాకుండా పౌర ప్రాంతాలు ఉండటం గుర్తించినట్లు అంతర్జాతీయ మీడియా నివేదికలు చెబుతున్నాయి. ముఖ్యంగా ఇరాన్ లోని ఒక స్కూల్‌పై జరిగిన దాడిలో 160 మందికి పైగా చిన్న పిల్లలు మృతి చెందడంతో ఈ లక్ష్యాన్ని గుర్తించడంలో ఏఐ పాత లేదా తప్పు డేటాను ఆధారంగా తీసుకుని ఉండొచ్చనే అనుమానం వ్యక్తమవుతోంది.

ఏఐ వ్యవస్థలు ఎంత వేగంగా పనిచేసినా, వాటి నిర్ణయాలు పూర్తిగా ఖచ్చితంగా ఉండవని నిపుణులు చెబుతున్నారు. ఒకసారి తప్పు సమాచారం అందితే అది పెద్ద మానవీయ విషాదాలకు దారి తీసే ప్రమాదం ఉందని హెచ్చరిస్తున్నారు. అందుకే యుద్ధాల్లో ఏఐ వినియోగం పై కఠిన నియంత్రణలు ఉండాలని పలువురు అంతర్జాతీయ విశ్లేషకులు అభిప్రాయపడుతున్నారు.

ఈ ఘటన నేపథ్యంలో “ఆర్టిఫిషియల్ ఇంటెలిజెన్స్ ఆధారిత యుద్ధాలు” అనే అంశంపై ప్రపంచవ్యాప్తంగా మళ్లీ చర్చ మొదలైంది. టెక్నాలజీ మానవాళికి సహాయం చేయాల్సిన సమయంలో అదే టెక్నాలజీ తప్పిదాలు అమాయకుల ప్రాణాలను బలితీసుకోవడం ఆందోళన కలిగిస్తోంది. ఇకపై యుద్ధ నిర్ణయాల్లో ఏఐకు ఎంతవరకు అధికారం ఇవ్వాలి? చివరి నిర్ణయం మాత్రం మనుషుల చేతుల్లోనే ఉండాలా? అనే ప్రశ్నలు ఇప్పుడు మరింత బలంగా వినిపిస్తున్నాయి.