క్లాడ్ ఏఐ ట్వీట్‌తో కుదేలైన సైబర్ సెక్యూరిటీ స్టాక్స్

ఆర్టిఫిషియల్ ఇంటెలిజెన్స్ (ఏఐ) ప్రభావం ప్రపంచ మార్కెట్లపై రోజురోజుకీ పెరుగుతున్న నేపథ్యంలో ఒకే ఒక్క ట్వీట్ సైబర్ సెక్యూరిటీ రంగాన్ని కుదిపేసింది. క్లాడ్ ఏఐ పేరిట సోషల్ మీడియాలో వచ్చిన సందేశం ప్రభావంతో ప్రముఖ సైబర్ సెక్యూరిటీ కంపెనీల మార్కెట్ విలువలో భారీ పతనం చోటుచేసుకుంది. అంచనా ప్రకారం కొన్ని గంటల్లోనే సుమారు 15 బిలియన్ డాలర్లకు పైగా మార్కెట్ క్యాపిటలైజేషన్ తగ్గిపోయింది.

ఈ ట్వీట్ వెలువడిన వెంటనే ప్రముఖ కంపెనీల షేర్లు ఒక్కసారిగా క్షీణించాయి. క్రౌడ్ స్ట్రైక్ షేరు 7.95 శాతం పడిపోగా.. క్లౌడ్ ఫ్లేర్ 8.05 శాతం నష్టపోయింది. అలాగే జెడ్ స్కేలర్ 5.47 శాతం తగ్గగా.. పాలో అల్టో నెట్ వర్క్స్ 1.52 శాతం క్షీణించింది. ఈ పరిణామం పెట్టుబడిదారుల్లో ఆందోళనను రేకెత్తించింది.

-ట్వీట్ లో ఏముందంటే?

ఆధునిక ఏఐ వ్యవస్థలు సైబర్ భద్రతా రంగంలో కీలక బాధ్యతలను స్వయంచాలకంగా నిర్వహించే స్థాయికి చేరుకుంటున్నాయని పేర్కొన్నట్లు తెలుస్తోంది. థ్రెట్ గుర్తింపు నుంచి తక్షణ స్పందన వరకు అనేక ప్రక్రియలను ఏఐ నిర్వహించగలదని.. దీనివల్ల సంప్రదాయ సైబర్ సెక్యూరిటీ సేవల అవసరం తగ్గవచ్చనే అభిప్రాయం వ్యక్తమైంది. ఇదే మార్కెట్‌లో భయాందోళనలకు దారితీసింది.

ఈ నేపథ్యంలో సైబర్ సెక్యూరిటీ రంగంలో ఉద్యోగాల భవిష్యత్తుపై కూడా చర్చ మొదలైంది. ఏఐ విస్తరణతో ఉద్యోగ అవకాశాలు తగ్గే ప్రమాదం ఉందని కొందరు భావిస్తున్నప్పటికీ.. నిపుణులు మాత్రం దీనిని పూర్తిస్థాయి ప్రత్యామ్నాయం కాదని.. మానవ నైపుణ్యం ఇంకా అవసరమేనని చెబుతున్నారు. ఏఐ సాంకేతికతను వినియోగించుకుని మరింత సమర్థవంతమైన భద్రతా వ్యవస్థలు ఏర్పడతాయని వారు అభిప్రాయపడుతున్నారు.

మార్కెట్ విశ్లేషకుల ప్రకారం.. ఈ పతనం తాత్కాలిక ప్రతిస్పందన కావచ్చని భావిస్తున్నారు. సైబర్ భద్రత అవసరం ఎప్పటికీ తగ్గదని, ఏఐ కూడా అదే రంగాన్ని బలోపేతం చేసే సాధనంగా మారుతుందని చెబుతున్నారు. ఇప్పటికే అనేక సైబర్ సెక్యూరిటీ సంస్థలు ఏఐ ఆధారిత పరిష్కారాలను అభివృద్ధి చేస్తున్నాయి.

మొత్తానికి.. ఈ ఘటన ఒక విషయం స్పష్టం చేసింది.. ఏఐ ఇప్పుడు కేవలం సాంకేతిక పరిజ్ఞానం మాత్రమే కాకుండా మార్కెట్ భావోద్వేగాలను ప్రభావితం చేసే శక్తిగా మారింది. ఒకే ట్వీట్‌తో బిలియన్ల డాలర్ల విలువ మారిపోవడం దీనికి నిదర్శనం. భవిష్యత్తులో ఏఐ , సైబర్ సెక్యూరిటీ మధ్య పోటీ కాకుండా పరస్పర సహకారం కీలక పాత్ర పోషించే అవకాశం ఉందని నిపుణులు సూచిస్తున్నారు.