ఇలా రేవంత్ రెడ్డిని టార్గెట్ చేస్తే ఎట్లా?

తెలంగాణ రాజకీయాలు మరోసారి హోర్డింగ్‌ల యుద్ధంతో వేడెక్కాయి. ముఖ్యమంత్రి రేవంత్ రెడ్డి ప్రభుత్వాన్ని లక్ష్యంగా చేసుకుని హైదరాబాద్‌తో పాటు రాష్ట్రంలోని ఇతర ప్రాంతాల్లో భారీగా "A to Z ఆఫ్ కరప్షన్" అనే శీర్షికతో కూడిన హోర్డింగ్‌లు, ఫ్లెక్సీలు దర్శనమిచ్చాయి. ఈ హోర్డింగ్‌లలోని ప్రతి అక్షరానికి ఒక అవినీతి ఆరోపణను జతచేయడం రాజకీయ వర్గాల్లో చర్చనీయాంశంగా మారింది.ఈ హోర్డింగ్‌లపై వాటిని ఎవరు ఏర్పాటు చేశారనే వివరాలు ఎక్కడా లేవు. అయితే, వాటిలో పొందుపరిచిన ఆరోపణలు, ప్రస్తుత ప్రతిపక్షాల వాదనలకు అనుగుణంగా ఉండటంతో, ఇది ఒక రాజకీయ ఎదురుదాడికి తెరలేపినట్టు అర్థమవుతోంది.

ఏంటీ ఈ 'A-Z' అవినీతి ఆరోపణలు?

ప్రతి అక్షరానికి ఒక అవినీతి అంశాన్ని జతచేసి, దాన్ని రేవంత్ రెడ్డి ప్రభుత్వానికే ఆపాదించిన తీరు చాలామందిని ఆశ్చర్యానికి గురిచేస్తోంది. కొన్ని ప్రధాన ఆరోపణలు ఇలా ఉన్నాయి.

A for అమృత్ కాంట్రాక్ట్ : రూ.1,137 కోట్ల విలువైన అమృత్ నీటి సరఫరా ఒప్పందాన్ని ముఖ్యమంత్రి బావకు అప్పగించారని ఆరోపణ.

B for బ్లాక్ మెయిల్ వయా స్టేట్ ఏజెన్సీస్ : రాష్ట్ర ఏజెన్సీలను ఉపయోగించి వ్యాపారవేత్తలను బ్లాక్‌మెయిల్ చేస్తున్నారని ఆరోపణలు.

C for చిత్రపురి ల్యాండ్ స్కామ్ : చిత్రపురి సొసైటీ పేరుతో జరిగిందని చెబుతున్న భూ కుంభకోణం.

F for ఫేక్ ఫారెన్ ఇన్వెస్ట్ మెంట్ : విదేశీ పెట్టుబడుల పేరిట నకిలీ ప్రాజెక్టులు ప్రారంభించారన్న విమర్శలు.

I for ఇరిగేషన్ స్కామ్స్ : కొందరు కంపెనీలకే ప్రాజెక్టులు అప్పగించడంపై ఆరోపణలు.

ఈ హోర్డింగ్‌లలో ముఖ్యమంత్రి కుటుంబ సభ్యుల పేర్లు, సన్నిహితుల వ్యాపార సంస్థలు, పేర్లను వెల్లడిస్తూ తీవ్ర విమర్శలు గుప్పించారు. అంతేకాకుండా, ప్రభుత్వ యంత్రాంగాన్ని దుర్వినియోగం చేస్తున్నారన్న ఆరోపణలు కూడా ఇందులో ఉన్నాయి. ప్రజాధికారాన్ని దుర్వినియోగం చేస్తూ, ప్రజాధనంతో వ్యవహారాలు సాగిస్తున్నారని ఈ హోర్డింగ్‌ల ద్వారా ప్రచారం చేస్తున్నారు.

-పారదర్శకతపై ప్రశ్నలు

ఈ హోర్డింగ్‌ల ద్వారా ప్రభుత్వంపై పారదర్శకత లేమి ఆరోపణలు గుప్పించబడుతున్నాయి. కీలక ప్రాజెక్టులు, భూ వ్యవహారాలు, విదేశీ పెట్టుబడుల పేరుతో జరుగుతున్నాయని ఆరోపిస్తున్న లావాదేవీలన్నీ ప్రజల డబ్బుతో ముడిపడి ఉన్నాయని, వాటిలో అవకతవకలు జరుగుతున్నాయని హోర్డింగ్‌లు సూచిస్తున్నాయి.

-ప్రజల దృష్టిని ఆకర్షించిన హోర్డింగ్స్

ఈ హోర్డింగ్‌లకు ఆన్‌లైన్‌లో కూడా భారీ స్పందన లభిస్తోంది. సోషల్ మీడియా వేదికగా వీటి ఫొటోలు విరివిగా షేర్ అవుతున్నాయి, నెటిజన్లు దీనిపై చర్చల్లో నిమగ్నమవుతున్నారు. కొంతమంది దీన్ని స్వేచ్ఛా భావప్రకటనగా చూస్తుండగా, మరికొందరు దీన్ని రాజకీయ కుట్రగా అభివర్ణిస్తున్నారు. ఇది ప్రజల్లో విస్తృతంగా చర్చనీయాంశంగా మారింది.

-ప్రభుత్వ ప్రతిస్పందనపై ఉత్కంఠ

ఈ తీవ్రమైన ఆరోపణలపై కాంగ్రెస్ ప్రభుత్వం ఎలా స్పందించనుందన్నదే ప్రస్తుతం రాజకీయంగా ఆసక్తిగా మారింది. ఈ హోర్డింగ్‌ల వెనుక ఉన్నవారి అసలైన ఉద్దేశ్యం ఏమిటో తేలాల్సి ఉంది. ఈ ఆరోపణల వెనుక ప్రతిపక్షాల హస్తం ఉందని అనుమానాలు ఉన్నప్పటికీ, అధికార పార్టీ నుండి ఇప్పటివరకు స్పష్టమైన వివరణ వెలువడలేదు.

ఈ "A-Z అవినీతి" ప్రచారం ప్రజల్లో తీవ్ర చర్చకు దారితీసింది, ఇది రాజకీయంగా గణనీయమైన ప్రభావం చూపే అవకాశముంది. ఇక ప్రభుత్వ స్పందనే కీలకం! ఈ ఆరోపణలపై ఎలాంటి చర్యలు తీసుకుంటారు, లేదా వాటిని ఎలా తిప్పికొడతారు అన్నది వేచి చూడాలి.