భారత ఐటీ ముంగిట ‘ఆర్టిఫిషియల్’ విప్లవం

భారతదేశం ఇప్పుడు కేవలం సాఫ్ట్‌వేర్ సేవలకే పరిమితం కాకుండా గ్లోబల్ టెక్నాలజీ రంగంలో ఆర్టిఫిషియల్ ఇంటెలిజెన్స్ (ఏఐ) పవర్‌హౌస్‌గా అవతరిస్తోంది. ఇటీవలి గణాంకాలు గమనిస్తే దేశవ్యాప్తంగా ఏై ఉద్యోగాల జాతర మొదలైందని స్పష్టమవుతోంది. కేవలం కోడింగ్ మాత్రమే కాదు, డేటా విశ్లేషణ నుండి నిర్ణయాత్మక మేధస్సు వరకు ఏఐ విస్తరిస్తూ యువతకు సరికొత్త ద్వారాలను తెరుస్తోంది.

భారతదేశంలో ఆర్టిఫిషియల్ ఇంటెలిజెన్స్‌ (ఏఐ) రంగం వేగంగా విస్తరిస్తోంది. డిజిటల్ మార్పులు, టెక్నాలజీ వినియోగం పెరుగుతున్న నేపథ్యంలో ఏఐ నిపుణులకు భారీ డిమాండ్ ఏర్పడుతోంది. తాజా గణాంకాల ప్రకారం దేశంలోని కొన్ని ప్రధాన నగరాలు ఏఐ ఉద్యోగాల ప్రధాన కేంద్రాలుగా మారాయి.

బెంగళూరు అగ్రస్థానం

ఏఐ ఉద్యోగాల విషయంలో బెంగళూరు దేశంలో మొదటి స్థానంలో నిలిచింది. మొత్తం ఉద్యోగాల్లో 25.4% వాటా బెంగళూరుదే. “ఇండియా సిలికాన్ వ్యాలీ”గా పేరుగాంచిన ఈ నగరంలో ప్రపంచ స్థాయి ఐటీ కంపెనీలు, స్టార్టప్‌లు, పరిశోధనా కేంద్రాలు అధికంగా ఉండటం వల్ల ఏఐ రంగం వేగంగా అభివృద్ధి చెందుతోంది.

ఢిల్లీ ఎన్.సీఆర్ రెండో స్థానం

బెంగళూరుకు దగ్గరగా 24.8% తో ఢిల్లీ ఎన్.సీఆర్ రెండో స్థానంలో ఉంది. కేంద్ర ప్రభుత్వానికి సమీపంలో ఉండటం, పెద్ద కంపెనీలు, కన్సల్టింగ్ సంస్థలు, స్టార్టప్‌లు ఇక్కడ పెరగడం వల్ల ఏఐ అవకాశాలు విస్తరిస్తున్నాయి.

ముంబై, హైదరాబాద్‌ ప్రభావం

ముంబై 19.2% తో మూడో స్థానంలో ఉంది. బ్యాంకింగ్, ఫైనాన్స్, మీడియా రంగాల్లో ఏఐ వినియోగం పెరగడం వల్ల ఇక్కడ ఉద్యోగాలు ఎక్కువయ్యాయి. హైదరాబాద్‌ 12.5% తో నాల్గవ స్థానంలో నిలిచింది. ఐటీ కంపెనీలు, డేటా సైన్స్‌, క్లౌడ్ టెక్నాలజీ రంగాల్లో పెట్టుబడులు పెరగడంతో ఏఐ ఉద్యోగాలు వేగంగా పెరుగుతున్నాయి.

పుణే, చెన్నై స్థిరమైన వృద్ధి

పుణే 9.6% తో ఏఐ ఉద్యోగాల్లో కీలక పాత్ర పోషిస్తోంది. విద్యాసంస్థలు, ఐటీ సంస్థలు ఉండటం దీని బలంగా నిలుస్తోంది. చెన్నై 6.4% తో మాన్యుఫ్యాక్చరింగ్‌, ఆటోమొబైల్‌, ఐటీ సేవల్లో ఏఐ వినియోగం పెంచుకుంటూ ముందుకు సాగుతోంది.

కొలకతాలో ప్రారంభ దశ వృద్ధి

కొలకతా ప్రస్తుతం 2.1% తో తక్కువ వాటా కలిగి ఉన్నప్పటికీ ఐటీ రంగంలో పెట్టుబడులు పెరగడం వల్ల భవిష్యత్తులో అవకాశాలు పెరిగే అవకాశం ఉంది.

భారతదేశంలో ఏఐ ఉద్యోగాలు ప్రధానంగా కొన్ని నగరాల్లోనే కేంద్రీకృతమై ఉన్నప్పటికీ భవిష్యత్తులో ఇతర నగరాల్లో కూడా విస్తరించే అవకాశాలు ఉన్నాయి. టెక్నాలజీ అభివృద్ధితో పాటు ఏఐ రంగం మరింత వేగంగా పెరుగుతూ యువతకు కొత్త అవకాశాలను అందిస్తోంది.