వయసుతో పనిలేదు.. ఏఐ నేర్చుకుంటే జాబ్స్

ఆధునిక డిజిటల్ యుగంలో ఆర్టిఫిషియల్ ఇంటెలిజెన్స్ (AI) రంగం అనూహ్యంగా విస్తరిస్తోంది. ఆరోగ్య సంరక్షణ, విద్య, బ్యాంకింగ్, తయారీ వంటి అనేక రంగాల్లో AI ఆధారిత టెక్నాలజీలు విప్లవాత్మక మార్పులు తీసుకొస్తున్నాయి. దీంతో, ఈ రంగంలో నైపుణ్యం కలిగిన వారికి డిమాండ్ విపరీతంగా పెరిగింది.

వయసుతో సంబంధం లేకుండా అద్భుత అవకాశం!

ఇప్పటి వరకు ఐటీ రంగంలో ఉద్యోగం అనగానే యువతే అనుకూలంగా భావించేవారు. కానీ తాజా ట్రెండ్ ప్రకారం, వయసుతో సంబంధం లేకుండా AI, డేటా సైన్స్, మెషిన్ లెర్నింగ్ వంటి టెక్నాలజీల్లో శిక్షణ పొందిన వారు సాఫ్ట్‌వేర్ రంగంలో స్థిరపడుతున్నారు. ఆశ్చర్యకరంగా వయసు నలభై దాటిన వారు కూడా మొదటిసారిగా ఈ రంగంలోకి అడుగుపెట్టి ఫ్రీలాన్సింగ్, రిమోట్ ఉద్యోగాల ద్వారా మంచి ఆదాయం పొందుతున్నారు. ఇది AI రంగం అందించే విస్తృత అవకాశాలకు నిదర్శనం.

-AI కోర్సులకు పెరుగుతున్న డిమాండ్

ఇంజినీరింగ్ విద్యార్థుల నుంచి గృహిణులు, ఉద్యోగం మారాలనుకునే ఉద్యోగస్తులు వరకు అందరూ AI కోర్సులపై దృష్టి సారిస్తున్నారు. ప్రముఖ విశ్వవిద్యాలయాలు, ఆన్‌లైన్ లెర్నింగ్ ప్లాట్‌ఫామ్స్ కోర్స్ ఏరా, ఈడీఎక్స్, యూడెమీ ద్వారా పలు శిక్షణా కోర్సులు అందుబాటులో ఉన్నాయి. డేటా సైన్స్, మెషిన్ లెర్నింగ్, ఆర్టిఫిషియల్ ఇంటెలిజెన్స్,క్లౌడ్ కంప్యూటింగ్,సైబర్ సెక్యూరిటీ, డిజిటల్ మార్కెటింగ్ కోర్సులు టెక్నికల్ బేసిక్స్ లేని వారికి కూడా అర్థమయ్యేలా రూపొందించబడ్డాయి.

- ముఖ్య నైపుణ్యాలు

AI, ML (మెషిన్ లెర్నింగ్) రంగాల్లో ఉద్యోగ అవకాశాలు పొందాలంటే కొన్ని కీలక నైపుణ్యాల్లో ప్రావీణ్యం అవసరం. పైతాన్, R ప్రోగ్రామింగ్, జావా, జావా స్క్రిప్ట్ , డేటా అనాలిసిస్, ప్రిడిక్టివ్ మోడలింగ్, మెషిన్ లెర్నింగ్ అల్గోరిథమ్స్, డీప్ లెర్నింగ్, న్యూరల్ నెట్‌వర్క్స్ , క్లౌడ్ టెక్నాలజీస్ , సైబర్ సెక్యూరిటీ & ఎథికల్ హ్యాకింగ్ వంటి నైపుణ్యాలను అభివృద్ధి చేసుకోవడానికి రోజుకు కనీసం 4 గంటలు సుదీర్ఘంగా ప్రాక్టీస్ చేయడం చాలా ముఖ్యం.

- ఉద్యోగ అవకాశాలు & ప్రారంభ జీతం

ప్రారంభంలో తక్కువ జీతంతో అయినా ఉద్యోగం మొదలుపెట్టడం ద్వారా విలువైన అనుభవం సంపాదించవచ్చు. ఒకసారి అనుభవం వచ్చిన తరువాత, మంచి జీతంతో కూడిన ఆఫర్లు రావడం ఖాయం. మొదటగా ఫ్రీలాన్సింగ్, వర్క్ ఫ్రమ్ హోమ్, ప్రాజెక్ట్ బేస్డ్ పనులు చేస్తూ రిమోట్ ఉద్యోగాలు పొందడానికి అవకాశం ఉంటుంది.

- ఉన్నత విద్యా ఎంపికలు

ఉన్నత విద్య అభ్యసించాలనే ఆసక్తి ఉన్నవారు ఎం.టెక్ (AI, డేటా సైన్స్, ML) లేదా M.Sc (కంప్యూటర్ సైన్స్, IT), MBA (బిజినెస్ అనలిటిక్స్) వంటి కోర్సుల్లో చేరి తమ కెరీర్‌ను మరో స్థాయికి తీసుకెళ్లవచ్చు.

వయసు ఎంతైనా సరే, నేర్చుకునే ఉత్సాహం ఉంటే AI రంగంలో కెరీర్ ప్రారంభించడం కచ్చితంగా సాధ్యమే. టెక్నాలజీ మారుతున్న వేగానికి అనుగుణంగా మనం మారాలి. నైపుణ్యాలను పెంపొందించుకుంటూ, సరికొత్త అవకాశాలను అందిపుచ్చుకోవడమే ఈ డిజిటల్ యుగంలో విజయ రహస్యంగా నిలుస్తోంది.