పెళ్లి ఎప్పుడో కానీ పిల్లలు ఎప్పుడంటే అప్పుడే..స్పెర్మ్ ఫ్రీజింగ్ అంటే ఏంటో తెలుసా?

ప్రస్తుతం సైన్స్ ఎంతో అభివృద్ధి చెందింది. పిల్లల్ని కనడానికి కూడా ఎన్నో కొత్త టెక్నిక్స్ అందుబాటులోకి వచ్చాయి. వాటిలో చాలా ముఖ్యమైంది స్పెర్మ్ ఫ్రీజింగ్. ఇది భవిష్యత్తులో పిల్లల్ని కనాలనుకునే మగవారికి ఓ వరం లాంటిదని చెప్పొచ్చు. అసలు ఈ స్పెర్మ్ ఫ్రీజింగ్ అంటే ఏమిటి? ఎందుకు చేసుకోవాలి? దీని వల్ల ఉపయోగాలు ఏమిటో ఈ కథనంలో వివరంగా తెలుసుకుందాం.

స్పెర్మ్ ఫ్రీజింగ్ అంటే మగవాళ్లు తమ వీర్యాన్ని సేకరించి ఓ ప్రత్యేక పద్ధతిలో అతి శీతల ఉష్ణోగ్రతల వద్ద నిల్వ చేయడం. ఇది ఒక రకంగా భవిష్యత్తులో తమకు కావలసినప్పుడు పిల్లల్ని కనేందుకు ఓ భరోసా లాంటిది. వైద్యపరమైన కారణాల వల్ల కానీ, వ్యక్తిగత కారణాల వల్ల కానీ, లేదా భవిష్యత్తులో కుటుంబం ఏర్పాటు చేసుకోవాలన్న ఆలోచన ఉన్న వారికి ఇది చాలా ఉపయోగకరమైన ప్రక్రియగా చెప్పొచ్చు.

స్పెర్మ్ ఫ్రీజింగ్ ఎందుకు అవసరం?

* క్యాన్సర్ చికిత్సలు: క్యాన్సర్ కోసం రేడియేషన్ లేదా కీమోథెరపీ తీసుకునే పురుషుల్లో స్పెర్మ్ ఉత్పత్తి తగ్గిపోయే ఛాన్స్ ఉంది. కాబట్టి, చికిత్స ప్రారంభించే ముందు స్పెర్మ్‌ను ఫ్రీజ్ చేసుకోవడం మంచిది.

* కెరీర్, వ్యక్తిగత కారణాలు: ఇటీవల కాలంలో చాలా మంది కెరీర్లో స్థిరపడే వరకు పెళ్లిపిల్లలకు దూరంగా ఉంటుంన్నారు. కొందరు పురుషులు తమ కెరీర్‌లో స్థిరపడ్డాకనే పిల్లల్ని కనాలని అనుకుంటున్నారు. అలాంటి వారు తమ స్పెర్మ్‌ను ఫ్రీజ్ చేసుకుని భవిష్యత్తులో వారు స్థిరపడిన తర్వాత తండ్రి కావచ్చు.

* ట్రాన్స్‌జెండర్ వ్యక్తులు: స్త్రీగా మారాలనుకునే ట్రాన్స్‌జెండర్లు హార్మోన్ థెరపీ లేదా ఇతర ఆపరేషన్లు చేయించుకునే ముందు తమ స్పెర్మ్‌ను ఫ్రీజ్ చేసుకోవచ్చు.

స్పెర్మ్ ఫ్రీజింగ్ ఎలా చేస్తారు?

* స్పెర్మ్ సేకరణ: మగవారు తన వీర్యాన్ని వైద్య సిబ్బంది సమక్షంలో ఒక ప్రత్యేకమైన కంటైనర్‌లో సేకరిస్తారు.

* స్పెర్మ్ విశ్లేషణ: సేకరించిన స్పెర్మ్‌ను ల్యాబ్‌లో టెస్ట్ చేసి, దాని క్వాలిటీ, కౌంట్ సరిగ్గా ఉన్నాయో లేదో నిర్ధారిస్తారు.

* క్రయోప్రిజర్వేషన్: మంచి క్వాలిటీ ఉన్న స్పెర్మ్ ను క్రయోప్రొటెక్టెంట్ అనే స్పెషల్ లిక్విడ్ లో కలిపి, ఆ తర్వాత లిక్విడ్ నైట్రోజన్‌లో అత్యంత శీతల ఉష్ణోగ్రత వద్ద స్టోర్ చేస్తారు.

* స్టోరేజీ : ఇలా స్టోర్ చేసిన స్పెర్మ్‌ను చాలా సంవత్సరాల పాటు (కొన్నిసార్లు 20 ఏళ్లకు పైగా కూడా) ఉపయోగించవచ్చు.

స్పెర్మ్ ఫ్రీజింగ్ ప్రయోజనాలు:

*స్పెర్మ్ డొనేషన్: తమ స్పెర్మ్‌ను ఇతరులకు దానం చేయాలనుకునే వాళ్లకు కూడా ఈ ప్రక్రియను ఉపయోగించవచ్చు.

* మరణం తర్వాత కూడా సంతానం : భవిష్యత్తులో టెక్నాలజీ మరింత అభివృద్ధి చెందితే వ్యక్తి మరణించిన తర్వాత కూడా ఈ ఫ్రీజ్ చేసిన స్పెర్మ్‌ను ఉపయోగించి తన వంశాన్ని అభివృద్ధి చేసుకునే అవకాశం ఉంది.

ఇప్పుడిప్పుడే మన తెలుగు వారిలో కూడా ఈ టెక్నాలజీ మీద అవగాహన ఏర్పడుతుంది. ముఖ్యంగా చదువుకున్న వారు, ఉద్యోగాలు చేసే వారు, వైద్య చికిత్సలు తీసుకుంటున్న వారు దీని గురించి తెలుసుకుంటున్నారు. అమెరికా వంటి అభివృద్ధి చెందిన దేశాల్లో ఇది చాలా కామన్.

స్పెర్మ్ ఫ్రీజింగ్ చేసే ముందు గుర్తుంచుకోండి

* మంచి క్లినిక్ ఎంచుకోండి: మంచి పేరున్న ఫెర్టిలిటీ క్లినిక్‌ను లేదా స్పెర్మ్ బ్యాంక్‌ను ఎంచుకోవడం చాలా ముఖ్యం. వారి సేవలు, ఎక్స్ పీరియన్స్ గురించి తెలుసుకోండి.

* అగ్రిమెంట్ (Consent Form): స్పెర్మ్‌ను ఎలా ఉపయోగించాలి, ఎప్పుడు ఉపయోగించాలి, ఒకవేళ మరణిస్తే ఏమి చేయాలనే విషయాలన్ని ఓ అగ్రిమెంట్లో స్పష్టంగా రాసుకోవాలి.

* ఖర్చు: ఈ ప్రక్రియకు అయ్యే ఖర్చు, స్టోరేజీ ఛార్జీలు మొదలైన వివరాలను ముందుగానే తెలుసుకోవడం బెటర్.

స్పెర్మ్ ఫ్రీజింగ్ అనేది భవిష్యత్తులో కుటుంబం ఏర్పాటు చేసుకోవాలనుకునే వారికి మంచి అవకాశంగా చెప్పొచ్చు.