పెళ్లితో మతిమరుపు ముప్పు.. తాజా పరిశోధనలో దిగ్భ్రాంతికర విషయాలు

"పెళ్లి చేసుకుంటే పిచ్చి కుదరదు, ముదురుతుంది" అనే నానుడిని నిజం చేస్తూ అమెరికాలోని ఫ్లోరిడా యూనివర్సిటీ పరిశోధకులు సంచలన విషయాలు వెల్లడించారు. వివాహం చేసుకున్న వారిలో జ్ఞాపకశక్తికి సంబంధించిన 'డిమెన్షియా' వ్యాధి ప్రభావం ఎక్కువగా ఉంటుందని, ఒంటరిగా జీవించే వారితో పోలిస్తే వీరికి ఈ ప్రమాదం అధికమని తేల్చారు. నేటి ఆధునిక కాలంలో పెళ్లికి దూరంగా ఉంటున్న యువతకు ఈ పరిశోధన ఒక కొత్త కోణాన్ని పరిచయం చేస్తోంది.

పరిశోధనలో వెల్లడైన కీలక విషయాలు

ఫ్లోరిడా యూనివర్సిటీ పరిశోధకులు 24 వేల మందిపై 18 ఏళ్ల పాటు సమగ్రంగా పరిశోధనలు జరిపారు. ఈ పరిశోధనలో పాల్గొన్న వారిని నాలుగు గ్రూపులుగా విభజించారు: వివాహితులు, విడాకులు తీసుకున్నవారు, భార్యాభర్తల్లో ఒకరు మరణించినవారు, ఎప్పుడూ వివాహం చేసుకోనివారు. వివాహితులతో పోలిస్తే, పెళ్లి చేసుకోని వారిలో డిమెన్షియా ప్రభావం చాలా తక్కువగా ఉన్నట్లు పరిశోధనలో తేలింది. వివాహం చేసుకున్న వారిలో గుండె జబ్బులు, ఇతర ఆరోగ్య సమస్యలు కూడా ఎక్కువగా ఉన్నట్లు పరిశోధకులు గుర్తించారు. పెళ్లికి ముందే డిమెన్షియా లక్షణాలు ఉన్నవారిలో, పెళ్లయ్యాక ఆ వ్యాధి తీవ్రత మరింత పెరిగే అవకాశం ఉందని పరిశోధకులు హెచ్చరిస్తున్నారు.

మునుపటి పరిశోధనలకు భిన్నంగా

2019లో అమెరికాలోనే జరిగిన మరో పరిశోధనలో పెళ్లయిన వారు పెళ్లి కాని వారి కంటే ఆరోగ్యంగా ఉన్నారని తేలింది. కానీ, తాజా పరిశోధన ఫలితాలు దీనికి పూర్తి భిన్నంగా ఉన్నాయి. డిమెన్షియా ముదిరితే అల్జీమర్స్ వ్యాధికి దారితీస్తుందని, అల్జీమర్స్ వ్యాధిగ్రస్తులను కట్టడి చేయడం చాలా కష్టమని వైద్య నిపుణులు చెబుతున్నారు. పెళ్లి చేసుకుంటే పిచ్చి కుదరదు, ముదురుతుందని పరిశోధకులు చెబుతున్నారు. నేటి యువతలో చాలామంది వివాహానికి దూరంగా ఉంటున్నారు. చాలామంది ఒంటరిగా జీవించడానికి ఇష్టపడుతున్నారు. ఈ పరిశోధన ఫలితాలు వారి ఆలోచనలను మరింత బలపరుస్తున్నాయి. అయితే, వివాహం వ్యక్తిగత నిర్ణయం అని నిపుణులు సూచిస్తున్నారు.