2030 నాటికి ప్రమాదంలో 46 కోట్ల మంది యువత..తస్మాత్ జాగ్రత్త అంటున్న నిపుణులు

ప్రపంచవ్యాప్తంగా యువత ఆరోగ్యం ఆందోళనకరమైన స్థితికి చేరుకుంటుందని ప్రముఖ వైద్య పత్రిక లాన్సెట్ కమిషన్ హెచ్చరికలు జారీచేసింది . 2030 నాటికి 46 కోట్ల మందికి పైగా యువత అంటే 10ఏళ్ల నుంచి 24ఏళ్ల వయసు ఉన్నవారు ఊబకాయం అనేక ఇతర దీర్ఘకాలిక ఆరోగ్య సమస్యలు, తీవ్రమైన మానసిక ఆరోగ్య సమస్యలను ఎదుర్కొంటారని అంచనా వేసింది. ఈ నివేదిక భవిష్యత్తులో ప్రపంచ ఆరోగ్యంపై తీవ్ర ప్రభావం చూపగలదని నిపుణులు ఆందోళన వ్యక్తం చేస్తున్నారు.

లాన్సెట్ కమిషన్ నివేదిక ప్రకారం.. ఈ ఆరోగ్య సమస్యలు కేవలం కొన్ని ప్రాంతాలకే పరిమితం కావు. ప్రత్యేకించి లాటిన్ అమెరికా, మధ్యప్రాచ్యంలోని అధిక ఆదాయ దేశాలలో (High-Income Countries) మూడింట ఒక వంతు మంది యువత అధిక బరువుతో బాధపడుతున్నారని ఈ నివేదిక పేర్కొంది. ఇది ఆహారపు అలవాట్లు, జీవనశైలి మార్పులు, శారీరక శ్రమ లేకపోవడం వంటి అంశాల వల్ల సంభవించే పరిణామంగా విశ్లేషకులు భావిస్తున్నారు.

ఊబకాయం అనేది కేవలం బరువు పెరగడం మాత్రమే కాదు. ఇది అనేక ఇతర ఆరోగ్య సమస్యలకు మూల కారణం. యువతలో ఊబకాయం పెరగడం వల్ల భవిష్యత్తులో వారికి మధుమేహం (డయాబెటిస్), గుండె జబ్బులు, అధిక రక్తపోటు (హైపర్‌టెన్షన్), కొన్ని రకాల క్యాన్సర్లు, కీళ్ల నొప్పులు (ఆర్థరైటిస్) వంటి దీర్ఘకాలిక వ్యాధులు వచ్చే ప్రమాదం ఎక్కువగా ఉంటుంది. ఇది వారి జీవిత నాణ్యతను తగ్గించడమే కాకుండా, ఆరోగ్య సంరక్షణ వ్యవస్థలపై విపరీతమైన భారాన్ని మోపుతుంది.

శారీరక సమస్యలతో పాటు, యువతలో మానసిక ఆరోగ్య సమస్యలు కూడా పెరగడం ఆందోళన కలిగిస్తోంది. ఒత్తిడి, ఆందోళన, డిప్రెషన్, సామాజిక ఒత్తిళ్లు, విద్యా సంబంధిత ఒత్తిళ్లు, సోషల్ మీడియా ప్రభావం వంటివి యువత మానసిక ఆరోగ్యంపై తీవ్ర ప్రభావం చూపుతున్నాయి. ఆరోగ్యకరమైన జీవనశైలి లేకపోవడం, పోషకాహార లోపాలు కూడా మానసిక సమస్యలకు దారితీయవచ్చని నిపుణులు చెబుతున్నారు. ఈ సమస్యలు వారి చదువు, వృత్తి, వ్యక్తిగత జీవితాలపై ప్రతికూల ప్రభావం చూపుతాయి. లాన్సెట్ కమిషన్ ఈ నివేదిక ద్వారా ప్రపంచ దేశాలకు ఒక స్పష్టమైన హెచ్చరిక జారీ చేసింది. ఈ ప్రమాదకరమైన ధోరణిని అరికట్టాలంటే తక్షణమే చర్యలు తీసుకోవాలని సూచించింది.

పాఠశాలల్లో, కుటుంబాల్లో పౌష్టికాహారం ప్రాధాన్యతను పెంచాలి. వ్యాయామం, ఆటల ప్రాధాన్యతను పెంచడం, సరైన క్రీడా సౌకర్యాలను కల్పించాలి.యువతకు మానసిక మద్దతు, కౌన్సిలింగ్ సేవలను అందుబాటులోకి తీసుకురావాలి. యువత ఆరోగ్యాన్ని మెరుగుపరిచే విధంగా ప్రభుత్వాలు తగిన విధానాలను రూపొందించాలి.యువత ఆరోగ్యకరమైన జీవనశైలిని అలవర్చుకోవడంలో కుటుంబాలు, సమాజం కీలక పాత్ర పోషించాలి. లేకపోతే 2030 నాటికి ఈ నివేదిక అంచనా వేసిన ఆరోగ్య సంక్షోభం ప్రపంచాన్ని చుట్టుముట్టే ప్రమాదం ఉంది.