ఫ్యాటీ లివర్ ముందుగా గుర్తించే 5 హెచ్చరికలు

ఫ్యాటీ లివర్ అనేది చాలా మందిలో ఎలాంటి లక్షణాలు లేకుండానే వస్తుంది, అందుకే దీనిని "నిశ్శబ్ద వ్యాధి" అని అంటారు. కానీ మన శరీరంలో కొన్ని మార్పులు ఈ సమస్య గురించి ముందుగానే హెచ్చరిస్తాయి. ముఖ్యంగా, జీర్ణ సంబంధిత లక్షణాలు మీరు గమనిస్తే ఈ సమస్యను త్వరగా గుర్తించవచ్చు. ఫ్యాటీ లివర్‌ను సూచించే ఐదు ముఖ్యమైన జీర్ణ సంబంధిత లక్షణాలు ఇక్కడ ఉన్నాయి.

1. అతిగా గ్యాస్ రావడం

శరీరానికి అవసరమైన విధంగా లివర్ తన పనిని సక్రమంగా చేయకపోతే, అది జీర్ణ ప్రక్రియను దెబ్బతీస్తుంది. దీని వల్ల శరీరంలో అధికంగా వాయువు (గ్యాస్) ఏర్పడుతుంది. తరచుగా బద్ధకంగా అనిపించడం, పొట్ట ఉబ్బినట్లు కనిపించడం ఫ్యాటీ లివర్ యొక్క లక్షణాలుగా పరిగణించవచ్చు.

2. మూత్ర విసర్జనలో మార్పులు

పసుపు రంగు మూత్రం లేదా మూత్ర విసర్జన సమయంలో అసాధారణమైన వాసన రావడం కూడా ఒక సంకేతం కావచ్చు. లివర్ విష పదార్థాలను సక్రమంగా బయటకు పంపించలేకపోతే, వాటి ప్రభావం మూత్రం రంగు , వాసనపై పడుతుంది.

3. వాంతులు, మలబద్ధకం

ఫ్యాటీ లివర్ ఉన్నవారికి తరచుగా మలబద్ధకం లేదా నీరసంగా అనిపించడం సర్వసాధారణం. కొన్ని సందర్భాల్లో, భోజనం చేసిన వెంటనే వాంతులు రావడం లేదా అసాధారణంగా ఆకలి తగ్గిపోవడం కూడా కనిపించవచ్చు. ఇవన్నీ జీర్ణ వ్యవస్థపై ఫ్యాటీ లివర్ ప్రభావాలను సూచిస్తాయి.

4. పొట్ట నొప్పి లేదా అసౌకర్యం

ఫ్యాటీ లివర్ కారణంగా పొట్ట కింద భాగంలో ముఖ్యంగా ఉపరిభాగంలో నొప్పి లేదా బరువుగా అనిపించవచ్చు. ఇది ముఖ్యంగా మద్యం ఎక్కువగా సేవించేవారిలో లేదా అధిక కొవ్వు ఉన్న ఆహారం తీసుకునేవారిలో ఎక్కువగా కనిపిస్తుంది.

5. ఆహారాన్ని జీర్ణం చేయడంలో అసౌకర్యం

లివర్ జీర్ణ రసాల ఉత్పత్తిలో కీలక పాత్ర పోషిస్తుంది. ఇది బైల్ అనే ద్రవాన్ని ఉత్పత్తి చేస్తుంది, ఇది కొవ్వును జీర్ణం చేయడానికి చాలా అవసరం. లివర్ సరిగా పనిచేయకపోతే ఆహారం పూర్తిగా జీర్ణం కాకపోవడం వల్ల అలసట నీరసం వస్తాయి.

- ఫ్యాటీ లివర్‌కు కారణాలు ఏమిటి?

అధిక మద్యం సేవించడం.. అధిక బరువు లేదా ఊబకాయం..అధిక చక్కెర లేదా కార్బోహైడ్రేట్లు తీసుకోవడం.. డయాబెటిస్ (మధుమేహం).. శారీరక శ్రమ లేకపోవడం

- తప్పకుండా చేయవలసినవి..

తక్కువ కొవ్వు ఉండే ఆహారం తీసుకోవడం.. వ్యాయామాన్ని దినచర్యలో భాగంగా చేసుకోవడం.. మద్యం పూర్తిగా మానేయడం.. రక్తపరీక్షల ద్వారా లివర్ పనితీరును క్రమం తప్పకుండా పరీక్షించుకోవడం ముఖ్యం.

ఫ్యాటీ లివర్ మొదట్లో ఎలాంటి నొప్పిని కలిగించకపోయినా, జీర్ణ వ్యవస్థలో కనిపించే ఈ చిన్న చిన్న హెచ్చరికల ద్వారా దీన్ని ముందే గుర్తించి జీవనశైలిని మార్చుకుంటే పెద్ద సమస్యలు రాకుండా నివారించవచ్చు. ఆరోగ్యకరమైన ఆహారం, క్రమం తప్పకుండా వ్యాయామం, మరియు క్రమబద్ధమైన జీవనశైలి ఫ్యాటీ లివర్‌ను నివారించడంలో ముఖ్యమైన పాత్ర పోషిస్తాయి.

మీ లివర్ ఆరోగ్యంగా ఉండాలంటే.. జీర్ణ వ్యవస్థను నిర్లక్ష్యం చేయకండి! మీ ఆరోగ్యానికి సంబంధించిన ఏవైనా ఆందోళనలు ఉంటే వైద్యుడిని సంప్రదించడం మర్చిపోకండి.