తమిళనాడులో పచ్చి గుడ్డుతో తయారు చేసే మయోనీస్ పై నిషేధం.. అవి అంత డేంజరా ?

తమిళనాడు ప్రభుత్వం ప్రజారోగ్యం దృష్ట్యా కీలక నిర్ణయం తీసుకుంది. రాష్ట్రంలో పచ్చి గుడ్డుతో తయారుచేసిన మయోనీస్ ఉత్పత్తి, స్టోరేజ్, పంపిణీ, విక్రయాలను తక్షణమే అమల్లోకి వచ్చేలా ఏడాది పాటు నిషేధం విధించింది. ఈ నిషేధం ఏప్రిల్ 8 నుంచి అమలులోకి వచ్చింది. పట్టణ ప్రాంతాల్లో ఫాస్ట్ ఫుడ్‌లో మయోనీస్ను ఎక్కువగా ఉపయోగిస్తారు. కలుషిత ప్రాంతాల్లో తయారు చేయడం కారణంగా తలెత్తిన ఆరోగ్య సమస్యల దృష్ట్యా ఆహార భద్రత , ప్రమాణాల చట్టం 2006 ప్రకారం ఈ నిషేధం విధించింది.

పచ్చి గుడ్డు మయోనీస్ అనేది గుడ్డు సొన, కూరగాయల నూనె, వెనిగర్, ఇతర సుగంధ ద్రవ్యాలు కలిగిన ఒక పదార్థం. దీనిని సాధారణంగా షవర్మా వంటి ఆహార పదార్థాలతో తీసుకుంటారు. అలాగే, ఇది శాండ్‌విచ్ లేదా బర్గర్ స్ప్రెడ్‌గా, నేపాల్ మోమోస్‌లో కూడా ఉపయోగిస్తారు.

ఆరోగ్య శాఖ అధికారుల ప్రకారం.. పచ్చి గుడ్డు మయోనీస్ ను సరిగ్గా తయారు చేయకపోతే ఆహార విషపూరితమయ్యే ప్రమాదం అధికంగా ఉంది. గుడ్లలో అనేక రకాల వ్యాధికారక క్రిములు ఉంటాయి. వీటిని సాధారణంగా వంట ప్రక్రియలో వేడి చేయడం ద్వారా నశింపజేయవచ్చని ఆరోగ్య అధికారులు చెబుతున్నారు. గుడ్డులోని ప్రోటీన్ నూనె, నీటికి ఎమల్సిఫైయర్‌గా పనిచేస్తుంది.

సరిగ్గా తయారు చేయకపోవడం, స్టోరేజీ సౌకర్యాలు సరిగా లేకపోవడం వల్ల మయోనీస్ సాల్మోనెల్లా టైఫిమూరియం, సాల్మోనెల్లా ఎంటెరిటిడిస్ వంటి సూక్ష్మజీవులతో నిండిపోతుంది. ఇది విరేచనాలు, వాంతులు, కడుపు నొప్పి వంటి అనారోగ్యాలకు దారితీస్తుంది. అదనంగా మయోనీస్ లిస్టెరియా మోనోసైటోజెన్స్‌తో కూడా కలుషితం కావచ్చు. అలాగే కొన్ని రకాల హానికరమైన ఎస్చెరిచియా కోలి పేగు, మూత్ర నాళం, శరీరంలోని ఇతర భాగాలలో ఇన్ఫెక్షన్లకు కారణమవుతాయి.

గుడ్డు మయోనీస్ ను నిషేధించిన మొదటి రాష్ట్రం తమిళనాడు కాదు. తెలంగాణ కూడా గత నవంబర్‌లో ఏడాది పాటు నిషేధం విధించింది. ఈ బ్యాక్టీరియా పిల్లలు, వృద్ధులు, రోగనిరోధక శక్తి తక్కువగా ఉన్న వ్యక్తులను ప్రభావితం చేయగలదు కాబట్టి తమిళనాడులోని వైద్యులు ఈ చర్యను స్వాగతించారు. పచ్చి గుడ్లలో సాల్మోనెల్లా బ్యాక్టీరియా ఎక్కువగా ఉండవచ్చు కాబట్టి దాని వినియోగాన్ని నిషేధించడం మంచిదని ఒక డైటీషియన్ చెప్పారు.