హ్యాట్సాఫ్ అక్షయ్ కుమార్

బాలీవుడ్ లో మరో హీరో తన పెద్ద మనసును చాటుకున్నాడు. రైతు ఆత్మహత్యల మీద కదిలిపోయిన స్టార్ హీరో అక్షయ్ కుమార్ వారిని ఆదుకునేందుకు ముందుకొచ్చాడు. దాదాపు 180 మంది రైతు కుటుంబాలకు సాయం చేశాడు అక్షయ్ కుమార్. వారికి దాదాపు కోటి రూపాయల దాకా విరాళం అందించాడు అక్షయ్. ఐతే ఇంత సాయం చేసినా అక్షయ్ ప్రచారం కోరుకోలేదు. ఆయన మీడియాకు చెప్పకుండా సైలెంటుగా రైతు కుటుంబాలకు సాయం చేశాడు. ఐతే రైతుల నుంచే ఈ సంగతి మీడియాకు తెలిసింది. దీని గురించి మాట్లాడమని అక్షయ్ ని అడిగినా స్పందించలేదు. ఈ విషయంలో తనకు ప్రచారం అవసరం లేదని.. మీడియా వార్తల ద్వారా మరింతమంది సెలబ్రెటీలు స్పందించేలా చేయాలని పిలుపునిచ్చాడు.

అక్షయ్ లో స్ఫూర్తి రగలడానికి కారణం సీనియర్ నటుడు నానా పటేకరే. మహారాష్ట్రంలో అంతకంతకూ పెరిగిపోతున్న రైతుల ఆత్మహత్యలపై ఆందోళన వ్యక్తం చేస్తూ ఆయన మీడియా ముందుకొచ్చారు. వారిని ఆదుకోవడానికి అందరూ తోడ్పాటు అందించాలన్నారు. ఆయన ఇప్పటికే వంద కుటుంబాలకు పైగా ఆర్థిక సాయం అందించారు. దాదాపు వెయ్యిమంది రైతులకు సాయం అందించడానికి సన్నాహాలు చేసుకుంటున్నారు. ఆత్మహత్య చేసుకోవాలనుకుంటున్న ఏ రైతు అయినా తన దగ్గరికి రావచ్చని.. తన దగ్గరున్న డబ్బులంతా అయిపోయే వరకు సాయం చేస్తానని ప్రకటించిన ఘనత ఆయనది. అక్షయ్.. నానా స్ఫూర్తితోనే రైతుల్ని ఆదుకున్నాడు. ఇలాగే మరిందరు స్టార్ హీరోలు, హీరోయిన్ లు రైతుల్ని ఆదుకోవడానికి ముందుకొస్తే రైతు ఆత్మహత్యలనే మాటే ఉండదు.