ఆర్జీవి కొత్త మాట.. యువర్ ఫిల్మ్..!

సంచలనం ఇంటి పేరుగా మార్చుకున్న రామ్ గోపాల్ వర్మ ఒకప్పుడు శివ తీసి ఎంతోమంది దర్శకులకు మార్గదర్శకుడిగా మారినా ఈమధ్య ఆయన చేస్తున్న సినిమాలు ఏవి కూడా ఆయన రేంజ్ ని టచ్ చేయలేకపోతున్నాయి. ఇక రాజకీయాల మీద తన సినిమాలతో ఏదో చేసేద్దామనుకున్న ఆర్జీవికి ఆ సినిమాల ఫలితాలు కూడా షాక్ ఇస్తూ వచ్చాయి. కొంత కాలంగా రామ్ గోపాల్ వర్మ ఏం చేసినా సరే ప్రేక్షకులు పట్టించుకోవడం మానేశారు.

నిన్న మొన్నటిదాకా పొలిటికల్ బ్యాక్ డ్రాప్ లో సినిమాలు చేసి హడావిడి చేసిన ఆర్జీవి ఇక నుంచి సినిమాలే జీవితం.. సినిమాలే ప్రపంచం అని కొత్త మాట మాట్లాడుతున్నాడు. అంతేకాదు యువర్ ఫిల్మ్ అంటూ ఒక కొత్త ప్రస్థానానికి నాంది పలుకుతున్నారు. సినిమా చూసే వారికి సినిమా తీయడం కూడా వస్తుంది. అందుకే ఔత్సాహిక కళాకారులకు యువర్ ఫిల్మ్ ద్వారా అవకాశం ఇచ్చి సినిమాలు చేస్తామని చెబుతున్నారు రాం గోపాల్ వర్మ.

ఇక మీదట యువర్ ఫిల్మ్ నుంచి సినిమాలు చేయడమే తన ప్రధాన లక్ష్యం అన్నట్టు చెప్పుకొచ్చారు. అయితే టాలెంట్ ఉన్న వారిని అప్పటికప్పుడు తనకు తోచిన విధంగా టెస్ట్ చేసి ఛాన్సులు ఇస్తానని అన్నారు. ఆర్జీవి యువర్ ఫిల్మ్ కోసం క్రౌడ్ ఫండింగ్ విధానాన్ని కూడా ఫాలో అవుతామని చెప్పారు. మొత్తానికి ఆర్జీవి మళ్లీ సినిమాల బాట పట్టాడు.

ఆర్జీవి తన ఎక్స్ ఖాతాలో నెపొటిజం కి ఎండ్ కార్డ్ వేసేలా యువర్ ఫిల్మ్ తో కొత్త వారికి అవకాశం ఇస్తానని.. ప్రతిభ ఉన్న ప్రతి ఒక్కరికి యువర్ ఫిల్మ్ లో ఛాన్స్ దొరుకుతుందని అన్నారు. మిగతా విషయాలు పక్కన పెడితే ఆర్జీవి తో పనిచేయడం వల్ల సినిమా టెక్నికల్ నాలెడ్జ్ బాగా వస్తుంది. ప్రస్తుతం స్టార్ డైరెక్టర్స్ లో ఉన్న చాలామంది ఆర్జీవి దగ్గర శిష్యరికం చేసిన వారే అని తెలిసిందే. సో ఆర్జీవి యువర్ ఫిల్మ్ తెలుగు చలన చిత్ర పరిశ్రమలో ఒక సెన్సేషన్ క్రియేట్ చేస్తుందా లేదా అన్నది చూడాలి.

ఆర్జీవి లాంటి దర్శకుడు ఇలా కొత్త టాలెంట్ ని ఎంకరేజ్ చేయాలని అనుకోవడం మంచి విషయమే. మరి కొన్నాళ్లుగా సినిమాలు తప్ప మిగతా అన్ని విషయాల మీద తన ఫోకస్ చేసిన ఆర్జీవి ఇక మీదట అయినా ఈ యువర్ ఫిల్మ్ తో ప్రేక్షకులను అలరించే కంటెంట్ అందిస్తారేమో చూడాలి.