సూర్య, మహేష్.. ఇద్దరు ఆ విషయంలో వెనక్కే..

‘విశ్వనాథ్ అండ్ సన్స్’ సక్సెస్ మీట్‌లో త్రివిక్రమ్ చేసిన ఒక కామెంట్ ఇప్పుడు బాగా వైరల్ అవుతోంది. ఇండియాలో వయసు వెనక్కి వెళ్తున్న ఇద్దరు హీరోలు ఉన్నారని, ఒకరు సూర్య అయితే మరొకరు మహేష్ బాబు అని ఆయన సరదాగా అన్నాడు. విచిత్రం ఏంటంటే ఇద్దరూ 1975లోనే పుట్టారు. ఇప్పుడు ఇద్దరికీ 51 ఏళ్లు. కానీ కొత్త లుక్స్ చూస్తే మాత్రం ఆ నంబర్ గుర్తుకు రావడం కష్టం.

సూర్య విషయంలో ఈ మాట కొత్తేమీ కాదు. కెరీర్ మొదటి నుంచి ఇప్పటివరకు ఆయన లుక్స్‌లో చాలా మార్పులు వచ్చాయి. గజిని, సూర్య సన్నాఫ్ కృష్ణన్ టైమ్‌లో ఎంత ఫిట్‌గా కనిపించాడో, ఇప్పుడు కూడా స్క్రీన్‌పై అదే ఎనర్జీ కనిపిస్తోంది. హెయిర్ స్టైల్ లేదా కాస్ట్యూమ్ మార్చితే చాలు.. మరోసారి పూర్తిగా కొత్త క్యారెక్టర్‌లా కనిపించడం సూర్యకు పెద్ద ప్లస్.

మహేష్ బాబు విషయంలో కూడా ఇదే చర్చ చాలా ఏళ్లుగా ఉంది. ఇప్పుడు రాజమౌళి వారణాసి కోసం ఆయన లుక్ పూర్తిగా మారిపోయింది. పొడవైన జుట్టు, గడ్డం, రఫ్ బాడీ లాంగ్వేజ్‌తో ఇప్పటివరకు కనిపించని స్టైల్‌లో ఉన్నాడు. ఇంత పెద్ద మేకోవర్ చేసినా ముఖంలో ఏజ్ మాత్రం పెద్దగా కనిపించడం లేదనే కామెంట్స్ వస్తున్నాయి. అందుకే త్రివిక్రమ్ మహేష్ పేరు కూడా వెంటనే తీసుకొచ్చినట్టు అనిపిస్తోంది.

ఇద్దరిలో ఇంకో కామన్ పాయింట్ ఫిట్‌నెస్. 50 దాటిన తర్వాత కూడా హీరోగా అదే స్క్రీన్ ప్రెజెన్స్ కొనసాగించాలంటే మంచి లుక్ సరిపోదు. ఫిజిక్, స్టైల్, ఎనర్జీ అన్నీ మెయింటైన్ చేయాలి. సూర్య, మహేష్ ఇద్దరూ ఈ విషయంలో చాలా కేర్ తీసుకుంటారు. అందుకే కొత్త సినిమా వచ్చిన ప్రతిసారీ వాళ్ల వయసు కంటే లుక్ గురించే ఎక్కువగా మాట్లాడుకుంటున్నారు.

ఇక త్రివిక్రమ్ ఈ కామెంట్ చేసిన ‘విశ్వనాథ్ అండ్ సన్స్’లో కూడా సూర్య లుక్‌కు మంచి రెస్పాన్స్ వచ్చింది. సినిమాలో ఆయనను క్లాస్‌గా, చాలా సింపుల్‌గా చూపించారు. ముఖ్యంగా గజినిలోని సంజయ్ రామస్వామి క్యారెక్టర్‌ను త్రివిక్రమ్ ఈ సందర్భంగా గుర్తు చేసుకున్నాడు. ఆ లుక్ ఇప్పటికీ ప్రేక్షకులకు గుర్తుండిపోవడం సూర్యకు ఉన్న మరో ప్రత్యేకత.

వెంకీ అట్లూరి దర్శకత్వంలో వచ్చిన ‘విశ్వనాథ్ అండ్ సన్స్’ మంచి రెస్పాన్స్ ను అందుకుంటోంది. ఈ సినిమాలో సూర్యతో పాటు మమితా బైజు, రాధికా శరత్‌కుమార్, రవీనా టాండన్ కీలక పాత్రల్లో నటించారు. సినిమా సక్సెస్ మీట్‌లో చాలా విషయాలు మాట్లాడినా, సూర్య మహేష్ వయసుపై త్రివిక్రమ్ వేసిన ఈ చిన్న పంచ్ మాత్రం హైలెట్ అయ్యింది.