బ్యాగ్రౌండ్ తో కాకుండా.. టాలెంట్ తో కొడుతున్నారు

సినిమా ఇండస్ట్రీలో ఫ్యామిలీ బ్యాగ్రౌండ్ తో హీరోలుగా అడుగుపెట్టి తరువాత స్టార్స్ గా ఎదిగిన వారు చాలా మంది ఉంటారు. దాదాపు అన్ని భాషలలో ఇలా ఫ్యామిలీ బ్యాగ్రౌండ్ కారణంగా పెద్దగా సినిమా కష్టాలు లేకుండా సక్సెస్ ఫుల్ గా కెరియర్ ని కొనసాగిస్తున్న స్టార్స్ ఉన్నారు. కొంతమంది మాత్రం టాలెంట్ లేక కొన్ని సినిమాలకే పరిమితమై తరువాత కనుమరుగైపోయారు. అయితే మరికొందరు నటులు మాత్రం సినిమా కష్టాలు అనుభవించి యాక్టర్స్ గా ఒక్కోమెట్టు ఎక్కుతూ మంచి కథలతో సినిమాలు చేస్తూ సోలోగా వారికంటూ ఒక ఇమేజ్ క్రియేట్ చేసుకుంటారు.

టాలీవుడ్ అనేసరికి బ్యాగ్రౌండ్ లేకుండా ఎదిగిన నటులలో అందరికి మొదటిగా గుర్తుకొచ్చేది మెగాస్టార్ చిరంజీవి, ఆ తరువాత రవితేజ. వీళ్ళు ఎలాంటి ఇండస్ట్రీ బ్యాగ్రౌండ్ లేకుండా బలమైన సంకల్పంతో సుదీర్ఘ ప్రయాణంలో స్టార్స్ గా ఎదిగి లక్షలాది మంది అభిమానించే నటులుగా మారారు. ఈ జెనరేషన్ లో కూడా కొంతమంది నటులు ఎలాంటి బ్యాగ్రౌండ్ లేకుండా కేవలం తమ టాలెంట్ తో అవకాశాలు అందిపుచ్చుకొని స్టార్స్ గా ఎదుగుతున్నారు.

నేచురల్ స్టార్ నాని ఇండస్ట్రీలో అసిస్టెంట్ డైరెక్టర్ గా కెరియర్ స్టార్ట్ చేసి తరువాత యాక్టర్ గా టర్న్ తీసుకొని ఈ రోజు టైర్ 2 హీరోగా తనకంటూ ప్రత్యేకమైన ఇమేజ్ సొంతం చేసుకున్నాడు. సినిమాకి 20 కోట్ల రెమ్యునరేషన్ తీసుకునే స్టేజ్ కి వచ్చాడు. విపరీతమైన ఫ్యాన్ బేస్ ని క్రియేట్ చేసుకున్నాడు. రౌడీ స్టార్ విజయ్ దేవరకొండ కూడా పెద్ద బ్యాగ్రౌండ్ లేకపోయిన యాక్టింగ్ మీద ఉన్న పిచ్చితో నటుడిగా ప్రయాణం మొదలుపెట్టి ఈ రోజు 20 కోట్ల రెమ్యునరేషన్ తీసుకునే స్టార్ గా మారాడు.

యంగ్ హీరో విశ్వక్ సేన్ కూడా కేవలం సినిమా మీద ఉన్న పాషన్ తో తనకు తాను అవకాశాలు సృష్టించుకుంటూ టాలెంట్ ప్రూవ్ చేసుకుంటూ దూసుకుపోతున్నాడు. తన అగ్రెసివ్ ఆటిట్యూడ్ తో యూత్ లో మంచి ఇమేజ్ క్రియేట్ చేసుకున్నాడు. వరుస హిట్స్ తో నెక్స్ట్ జెనరేషన్ స్టార్ గా ప్రశంసలు అందుకుంటున్నాడు. ఇక అడవి శేష్ కల్కి అనే సినిమాతో కెరియర్ స్టార్ట్ చేశాడు. అయితే యాక్టర్ గా గుర్తింపు తెచ్చుకోవడానికి దశాబ్దకాలం ఎదురుచూశాడు. యాక్టర్ గానే కాకుండా రైటర్ గా తనకున్న టాలెంట్ ని ఉపయోగించుకొని అవకాశాలు అందిపుచ్చుకొని ఈ రోజు పాన్ ఇండియా స్టార్ అనే గుర్తింపుని తెచ్చుకున్నాడు.

నవీన్ పొలిశెట్టి సైడ్ క్యారెక్టర్స్ తో నటుడిగా ఇండస్ట్రీలోకి అడుగుపెట్టాడు. అతనికి బ్రేక్ రావడానికి చాలా సమయం పట్టింది. ఒక్కసారి నవీన్ పొలిశెట్టి టాలెంట్ ప్రూవ్ చేసుకున్నాక అవకాశాలు వెతుక్కుంటూ వస్తున్నాయి. అయితే ఇతనే తొందర పడకుండా సెలక్టివ్ గా సినిమాలు చేస్తున్నాడు. కామెడీకి తనదైన స్టైల్ జోడించి రెగ్యులర్ హీరోలా కాకుండా పక్కింటి కుర్రాడిలా అందరికి దగ్గరైపోయాడు.

సిద్దు జొన్నలగడ్డకి కూడా హీరోగా బ్రేక్ రావడానికి దశాబ్ద కాలం పట్టింది. ఇప్పుడు యూత్ రోల్ మోడల్ లా మారిపోయి క్రేజీ బాయ్ అనిపించుకుంటూ దూసుకుపోతున్నాడు. టిల్లు టిల్లు స్క్వేర్ సినిమాకు ఇప్పుడు క్రేజ్ ఏ స్థాయిలో ఉందో ప్రత్యేకంగా చెప్పనక్కర్లేదు. ఆ సినిమాకు అతనే కథ అందించడం విశేషం. తనకు తానే క్యారెక్టర్ డిజైన్ చేసుకొని సొంతంగా క్రేజ్ అందుకున్నాడు. ఇక వీళ్ళే టాలీవుడ్ లో భవిష్యత్ సూపర్ స్టార్స్ అని ఇప్పటికే గుర్తింపు సొంతం చేసుకున్నారు. వారి టాలెంట్ వారిని స్టార్ హీరోలుగా ముందుకి తీసుకొని వెళ్తోంది. మరి రాబోయే రోజుల్లో వీరి సినిమాలు ఇంకా ఏ రేంజ్ లో ఉంటాయో చూడాలి.