సమ్మర్ ని క్యాష్ చేసుకుంటారా..?

సంక్రాంతి, దసరా లానే స్టార్ సినిమాలకు సమ్మర్ కూడా ఒక మంచి ఫెస్టివల్ మూమెంట్ లా భావిస్తారు. సమ్మర్ కి రిలీజై ఇండస్ట్రీ రికార్డులు కొట్టిన సినిమాలు ఎన్నో ఉన్నాయి. అందుకే ప్రతి స్టార్ వారి సినిమాలను సమ్మర్ కి రిలీజ్ చేసేలా ప్లాన్ చేస్తుంటారు. ఈ సమ్మర్ కు ముందు ప్లానింగ్ లో చాలా సినిమాలే ఉన్నా టైం దగ్గర పడుతున్నా కొద్దీ వాయిదాల పర్వం నడుస్తున్నాయి. ఇప్పటికే ఏప్రిల్ 5న రావాల్సిన దేవర రిలీజ్ పోస్ట్ పోన్ చేసుకోగా మే 9న ప్రభాస్ కల్కి వస్తాడా రాడా అన్న సందిగ్ధం కొనసాగుతూనే ఉంది. మేకర్స్ మాత్రం మే 9న ఎట్టిపరిస్థితుల్లో కల్కిని రిలీజ్ చేయాల్సిందే అని గట్టిగా ఫిక్స్ అయ్యారు.

సో ఈ సమ్మర్ స్టార్ హీరో ప్రభాస్ కల్కి ఒక్కటే రేసులో నిలుస్తుండగా ఈ సమ్మర్ ని క్యాష్ చేసుకునేందుకు యువ హీరోల సినిమాలు పోటీ పడుతున్నాయి. సమ్మర్ లో సినిమా సత్తా చాటితే ఆ కలెక్షన్స్ రేంజ్ వేరేలా ఉంటుంది. అందుకే యువ హీరోలు, టైర్ 2 స్టార్స్ సమ్మర్ ని టార్గెట్ చేసుకుని రిలీజ్ చేస్తున్నారు. ముందుగా సమ్మర్ ని తన సినిమాతో మొదలు పెడుతున్నాడు సిద్ధు జొన్నలగడ్డ. మార్చి 29న టిల్లు స్క్వేర్ తో సిద్ధు సమ్మర్ సినిమాల సందడి షురూ చేస్తున్నాడు.

డీజే టిల్లు సూపర్ హిట్ కాగా అదే పంథాలో టిల్లు స్క్వేర్ రాబోతుంది. ఇక ఆ తర్వాత విజయ్ దేవరకొండ ఫ్యామిలీ స్టార్ రిలీజ్ అవుతుంది. ఏప్రిల్ 5న రావాల్సిన దేవర రిలీజ్ వాయిదా వేసుకోగా ఆ ప్లేస్ లో విజయ్ దేవరకొండ ఫ్యామిలీ స్టార్ వస్తుంది. ఈ సినిమా పక్కా హిట్ టార్గెట్ తో వస్తుంది. ఫ్యామిలీని నిలబెట్టే వ్యక్తిగా హీరో పాత్ర ప్రతి ఒక్కరిని టచ్ చేస్తుందని అంటున్నారు. ఏప్రిల్ సెకండ్ హాఫ్ అంతా ఖాళీనే రామ్ డబుల్ ఇస్మార్ట్ ముందు మార్చి 8 రిలీజ్ అనుకున్నా అది వాయిదా వేశారు. ఏప్రిల్ 28 పోకిరి రిలీజ్ డేట్ చూస్తున్నారని టాక్.

ఇక మే 9న ప్రభాస్ కల్కి వస్తే దానికి వారం ముందు.. వారం తర్వాత ఏ సినిమా వచ్చే ఛాన్స్ లేదు. మే 17న మాస్ కా దాస్ విశ్వక్ సేన్ గ్యాంగ్స్ ఆఫ్ గోదావరి సినిమా వస్తుంది. కృష్ణ చైతన్య దర్శకత్వంలో 1980 బ్యాక్ డ్రాప్ తో గోదావరి గ్యాంగ్ సందడి చేయనుంది. ఈ సినిమాతో పాటుగా సమ్మర్ ని క్యాష్ చేసుకోవాలని మరికొన్ని సినిమాలు ట్రై చేస్తున్నాయి. అందులో శర్వానంద్ హీరోగా వస్తున్న మనమే కూడా ఉంది. శ్రీరాం ఆదిత్య డైరెక్షన్ లో తెరకెక్కుతున్న ఈ సినిమాలో కృతి శెట్టి హీరోయిన్ గా నటిస్తుంది.

వీటితో పాటుగా సుధీర్ బాబు హరోం హర, అల్లరి నరేష్ ఆ ఒక్కటి అడక్కు, నారా రోహిత్ ప్రతినిధి 2 ఇలా యువ హీరోలంతా కూడా తమ సినిమాలతో సమ్మర్ లో ఆడియన్స్ కు ఫుల్ ఎంటర్టైన్మెంట్ అందించేందుకు రెడీ అవుతున్నారు. స్టార్ సినిమాలు మిస్ అయ్యామన్న భావన రాకుండా చేయాలని ఫిక్స్ అయ్యారు. మరి ఈ సినిమాల్లో సమ్మర్ లో బాక్సాఫీస్ ని హుశారెక్కించే సినిమాలు ఏవి అవుతాయో చూడాలి.