ఆస్కార్ లైబ్రరీలో 'ది వ్యాక్సిన్ వార్​'.. ఏలా?

కశ్మీర్​ ఫైల్స్ ఫేమ్​ డైరెక్టర్​ వివేక్ రంజన్ అగ్నిహోత్రి దర్శకత్వం వహించిన లేటెస్ట్​ మూవీ 'ది వ్యాక్సిన్ వార్'. రీసెంట్​గా విడుదలైన ఈ చిత్రం బాక్సాఫీస్ వద్ద పెద్దగా రాణించలేకపోయింది. అయితే ఈ చిత్రం తాజాగా ఓ ఘనతను అందుకుంది. ఆస్కార్ లైబ్రరీ ద్వారా 'అకాడెమీ కలెక్షన్స్'లో 'ది వ్యాక్సిన్ వార్' చోటు దక్కిందుకుంది.

వివరాళ్లోకి వెళితే.. ది కశ్మీర్‌ ఫైల్స్‌తో బాక్సాఫీసుకు సెన్సేషనల్​ విజయాన్ని అందించారు దర్శకుడు వివేక్‌ రంజన్‌ అగ్నిహోత్రి. దీంతో ఆయన తాజా చిత్రం ది వ్యాక్సిన్‌ వార్‌పై కూడా మంచి అంచనాలు ఏర్పడ్డాయి. ఈ చిత్రంలో నానా పటేకర్, పల్లవి జోషి ప్రధాన పాత్రలలో నటించారు. రైమా సేన్, అనుపమ్ ఖేర్ , సప్తమి గౌడ, గిరిజా ఓక్ కూడా ఇతర సహాయక పాత్రల్లో నటించారు.

భారతీయ శాస్త్రవేత్తల నిజమైన కథ ఆధారంగా సినిమాను రూపొందించారు. కరోనా మహమ్మారి నుంచి ప్రజలను కాపాడడానికి వ్యాక్సిన్‌ను తయారు చేసిన ఇండియన్ సైంటిస్ట్​ల గురించి చాటి చెప్పే కథాంశంతో ఈ సినిమా రూపొందింది. అయితే సెప్టెంబర్ 28న రిలీజైన ఈ సినిమా కమర్షియల్​గా హిట్​ సాధించలేకపోయింది. సరైన ఓపెనింగ్స్​ కూడా రాలేదు.

కానీ ఈ చిత్రం ప్రశంసలను బాగా అందుకుంది. ప్రధానీ మోదీ కూడా రీసెంట్​గా ఈ చిత్రంపై ప్రశంసలు కురిపించారు. ఈ క్రమంలోనే తాజాగా ఈ చిత్రం ఓ ఘనతను అందుకుంది. ఆస్కార్ లైబ్రరీ ద్వారా 'అకాడెమీ కలెక్షన్స్'లో 'ది వ్యాక్సిన్ వార్' స్క్రిప్ట్‌ను ఆహ్వానించి, అంగీకరించినట్లు ఈ చిత్ర నిర్మాత అభిషేక్ అగర్వాల్​​ సోషల్ మీడియా ద్వారా వెల్లడించారు. సంతోషం కూడా వ్యక్తం చేశారు. 'ఇండియన్ సూపర్‌ హీరోల ఈ గొప్ప కథను చదవడానికి అందుబాటులో ఉంటడం నాకు సంతోషంగా ఉంది' అని వివేక్ రంజన్ రాసుకొచ్చారు.

ఇకపోతే ఈ వ్యాక్సిన్‌ వార్ సినిమాను జాతీయ సినిమా దినోత్సవం సందర్భంగా(అక్టోబర్ 13) రూ.99కే చూసేలా ఆఫర్​ను ప్రకటించారు. కాగా, అభిషేక్ అగర్వాల్​ నుంచి త్వరలోనే దిల్లీ ఫైల్స్ అనే సినిమా కూడా రాబోతుంది. చూడాలి మరి ఈ సినిమా ఎలాంటి రిజల్ట్​ను అందుకుంటుందో...