పెద కాపు పెయిడ్ ​ ప్రీమియర్స్​.. బుకింగ్స్ ఓపెన్​

టాలివుడ్ ప్రముఖ దర్శకుడు శ్రీకాంత్ అడ్డాల కాస్త గ్యాప్ తర్వాత పెద కాపు - 1 అనే ఓ డిఫరెంట్ సినిమాతో ప్రేక్షకుల ముందుకు రాబోతున్న సంగతి తెలిసిందే. సామాన్యుడి సంతకం ట్యాగ్​ లైన్​. కొత్త నటీనటులతో అడ్డాల చేస్తున్న ఈ ప్రయోగంపై గట్టిగానే బజ్ ఉంది. ఇక మూవీటీమ్​ ఓ అడుగు ముందుకేసి కీలక నిర్ణయం తీసుకుంది. ప్రీమియర్స్ వేసేందుకు రెడీ అయింది.

విరాట్ కర్ణను హీరోగా పరిచయం చేస్తూ ఈ సినిమాను తెరకెక్కించారు శ్రీకాంత్ అడ్డాల. ఇప్పటికే రిలీజైన సినిమా పోస్టర్, టీజర్, ట్రైలర్ ఓకే అనిపించాయి. ఈ కథను చాలా సెన్సిటివ్ ఎలిమెంట్స్​తో తెరపైకి తీసుకురాబోతున్నారు. ద్వారకా క్రియేషన్స్ పై మిరియాల రవీందర్ రెడ్డి నిర్మించారు. సినిమాలో ప్రగతి శ్రీ వాస్తవ హీరోయిన్​గా నటించింది.

రావు రమేశ్‌, నాగబాబు, తనికెళ్ల భరణి, బ్రిగడ సాగ, రాజీవ్‌ కనకాల, అనసూయ, ఈశ్వరిరావు, నరేన్‌ తదితరులు సినిమాలో కీలక పాత్రల్లో కనిపించనున్నారు. మిక్కీ జె.మేయర్‌ సంగీతం, ఛోటా కె.నాయుడు ఛాయాగ్రహణం అందించారు. ఈ చిత్రం ఈ నెల 29న ప్రేక్షకుల ముందుకొస్తోంది.

ఈ సందర్భంగా సెప్టెంబ్​ 28న పెయిడ్ ప్రీమియర్స్​ వేసేందుకు రెడీ అయింది మూవీటీమ్. ఆర్టీసీ క్రాస్​ రోడ్స్​లోని సంధ్య 70ఎంఎం థియేటర్లో రాత్రి 9.30 గంటలకు షో ప్రదర్శించనున్నారు. బుక్​ మైషో, పేటీఎమ్​లో బుకింగ్స్ కూడా ఓపెన్ అయ్యాయి. ఈ విషయాన్ని తెలుపుతూ ఓ పోస్టర్​ను కూడా రిలీజ్ చేశారు. ఇందులో హీరో గొడ్డలి పట్టుకుని కొంతమందిపై విరుచుపడుతూ కనిపించారు. చూడాలి మరి ఈ సినిమా ఎలాంటి టాక్ తెచ్చుకుంటుందో..

కాగా, గత రెండు వారాలుగా టాలీవుడ్ బాక్సాఫీస్ ముందు సరైన సినిమాలు లేవు. జవాన్ ఒక్కటే ఆడుతోంది. అయితే ఈ వారం పెద కాపుతో పాటు బోయపాటి రామ్​పోతినేని స్కంద, చంద్రముఖి 2 వస్తున్నాయి. స్కంద, చంద్రముఖిపై కూడా మంచి అంచనాలు ఉన్నాయి. మరి ఈ మూడు సినిమాలు బాక్సాఫీస్ వద్ద ఎలాంటి క్రేజ్ అందుకుంటాయో చూడాలి.