ఆస్తి కోసం శ్రీ‌దేవిపై కోర్టుకెక్కిన చెల్లి క‌థ తెలుసా?

సెట్లో క‌థానాయిక‌ల వెంట త‌ల్లి గారు లేదా సోద‌రి లేక ఇంకెవ‌రైనా బంధువు ఉండేందుకు ఆస్కారం ఉంది. మేటి క‌థానాయిక శ్రీదేవికి కూడా కెరీర్ తొలినాళ్ల‌లో ఒక మేనేజ‌ర్ ఉండేవారు. ఆమె ఎవ‌రో బ‌య‌టి ప్ర‌పంచానికి తెలిసింది త‌క్కువ‌. తెలిస్తే ఆశ్చ‌ర్యం క‌ల‌గ‌క మాన‌దు. అంతేకాదు ఆ ఇద్ద‌రి న‌డుమా ర‌క్త సంబంధం ఉన్నా శ్రీ‌దేవి మ‌ర‌ణానంత‌రం క‌డ‌చూపులో ఆమె క‌నిపించ‌క‌పోవ‌డం మ‌రింత ఆశ్చ‌ర్య‌ప‌రిచింది. దీనిపై మీడియాలో ర‌క‌ర‌కాల క‌థ‌నాలు వైర‌ల్ అయ్యాయి.

అతిలోక సుంద‌రి శ్రీదేవి 2018లో మరణించారు. అయితే తన చిత్రాల్లో స‌జీవ‌మైన న‌ట‌ప్ర‌దర్శ‌న‌తో ప్రపంచవ్యాప్తంగా కోట్లాది మంది ప్రజల హృదయాల్లో ఇప్పటికీ సజీవంగా ఉన్నారు. 80వ దశకంలో హేమ మాలిని, రేఖ వంటి నటీమణులు బాలీవుడ్ దర్శకుల మొదటి ఎంపికగా ఉన్న సమయంలో శ్రీదేవి బాలీవుడ్‌లో నటిగా స్థిరపడింది. శ్రీదేవి తన వైబ్రేంట్ కెరీర్‌లో 300 కంటే ఎక్కువ చిత్రాలలో న‌టించింది. శ్రీదేవి వృత్తిగ‌త‌ జీవితం గురించి మ‌న‌కు చాలా విషయాలు తెలిసి ఉండవచ్చు. కానీ ఆమె సోదరి శ్రీలత గురించి చాలా మందికి తెలియదు. శ్రీదేవి - శ్రీలత ఒకప్పుడు చాలా గొప్ప అనుబంధాన్ని క‌లిగి ఉన్నారు. ఇద్దరు సోదరీమణుల మధ్య చాలా ప్రేమ ఉంది. కానీ ఆ తరువాత ఇద్దరు సోదరీమణుల మధ్య ఏదో జరిగింది. అది వారి మ‌ధ్య క‌ల‌త‌ల‌కు కార‌ణ‌మైంది. సంబంధాన్ని చాలా చేదుగా మార్చింది.

శ్రీదేవి సినిమాల్లో కెరీర్ ప్రారంభించే సమయంలో శ్రీలత కూడా ఆమెతో పాటు సినిమా సెట్స్‌కి వెళ్లేవారు. 1972 నుండి 1993 వరకు శ్రీదేవి దాదాపు ప్రతి సినిమా సెట్స్‌లో శ్రీలత కనిపించారు. శ్రీలత కూడా శ్రీదేవి లాగా నటి కావాలనుకుంది. కానీ ఆమె విజయాన్ని రుచి చూడలేకపోయింది. ఆ తర్వాత శ్రీదేవికి మేనేజర్‌గా మారింది. కొన్ని క‌థ‌నాల‌ ప్రకారం.. వారి తల్లి మరణం తర్వాత ఇద్దరు సోదరీమణుల మధ్య విభేదాలు పెరిగాయి. అనారోగ్యంతో ఉన్న శ్రీ‌దేవి తల్లి ఒకసారి ఆపరేషన్ కోసం ఆసుపత్రిలో చేరారు. ఆసుపత్రిలోని డాక్టర్ ఈ ఆపరేషన్ ని తప్పుగా చేసారు. ఆ తర్వాత శ్రీదేవి తల్లి జ్ఞాపకశక్తిని కోల్పోయింది.

ఆమె 1996లో మరణించింది. దీంతో శ్రీదేవి ఆసుపత్రిపై కేసు పెట్టవలసి వచ్చింది. శ్రీదేవి ఆసుపత్రిపై కేసును గెలిచింది. పరిహారంగా సుమారు రూ.7.2 కోట్లు పొందింది. నష్టపరిహారం మొత్తాన్ని శ్రీదేవి తన వద్దే ఉంచుకుందని, దీంతో అక్కాచెల్లెళ్ల మధ్య విభేదాలు తలెత్తాయని క‌థ‌నాలొచ్చాయి. శ్రీలత తన వాటా డబ్బు కోసం శ్రీదేవిపై కోర్టులో కేసు వేసింది. తన తల్లి మానసిక పరిస్థితి బాగా లేదని, అందుకే తన ఆస్తి మొత్తాన్ని శ్రీదేవికి బదిలీ చేసిందని పేర్కొంది. శ్రీలత ఈ కేసులో గెలిచి తన వాటాగా రూ.2 కోట్లు దక్కించుకుంది. ఇద్దరు అక్కాచెల్లెళ్ల మధ్య సయోధ్య కుదిర్చేందుకు బోనీకపూర్ కూడా ప్రయత్నించారని, అయితే శ్రీదేవి మరణం తర్వాత చెన్నైలో జరిగిన ప్రార్థనా సమావేశంలో శ్రీలత కనిపించలేదని కూడా క‌థ‌నాలొచ్చాయి. అక్కా చెల్లెళ్ల న‌డుమ ఆస్తి త‌గాదాలు నిజానికి ఎంతో విచార‌క‌రం