ఎస్.జె.సూర్య.. పదేళ్ల తర్వాత

ప్రస్తుతం దక్షిణాది ప్రేక్షకులు అత్యంత ఇష్టపడే ఎస్.జె.సూర్య ఒకడు. అతను విలన్ పాత్ర చేసినా.. క్యారెక్టర్ రోల్ చేసినా.. పేలిపోతుంది. సినిమాల ఫలితంతో సంబంధం లేకుండా తన క్యారెక్టర్లు హైలైట్ అవుతుంటాయి. తెలుగులో నటించిన స్పైడర్, సరిపోదా శనివారం, గేమ్ చేంజర్ చిత్రాల్లో సూర్య అదరగొట్టేశాడు. తమిళంలో ఇంకా మంచి రోల్సే చేశాడు సూర్య. ఐతే ఇప్పుడు సూర్య నటుడిగానే ప్రేక్షకులకు గుర్తుంటున్నాడు కానీ.. పూర్వాశ్రమంలో అతను దర్శకుడన్న సంగతి చాలామంది మరిచిపోయారు.

వాలి, ఖుషి లాంటి బ్లాక్ బస్టర్లు అందించిన ఘనత సూర్య సొంతం. తెలుగులో డిజాస్టర్ అయిన ‘నాని’ సినిమాతో తమిళంలో తనే హీరోగా ‘న్యూ’ పేరుతో రూపొందిస్తే అక్కడ బ్లాక్ బస్టర్ అయింది. అంతకుముందే కొన్ని సినిమాల్లో చిన్న చిన్న పాత్రలు చేసినా.. ‘న్యూ’తో నటుడిగా వచ్చిన గుర్తింపుతో అతను యాక్టింగ్‌లో బిజీ అయిపోయాడు. క్రమంగా దర్శకుడిగా సినిమాలు తగ్గించేసి నటుడిగా స్థిరపడిపోయాడు. చివరగా 2015లో ‘ఇసై’ అనే సినిమాను డైరెక్ట్ చేసిన సూర్య.. పదేళ్ల విరామం తర్వాత ఇప్పుడు మళ్లీ మెగా ఫోన్ పట్టబోతుండడం విశేషం.

సూర్య తనే హీరోగా నటిస్తూ డైరెక్ట్ చేస్తున్న సినిమా.. కిల్లర్. ఓ పెద్ద నిర్మాణ సంస్థతో కలిసి సూర్య ఈ చిత్రాన్ని తెరకెక్కించబోతున్నాడు. ఇంతకుముందు సూర్య డైరెక్ట్ చేసిన నాని, న్యూ, పులి లాంటి చిత్రాలకు సంగీతం అందించిన లెజెండరీ మ్యూజిక్ డైరెక్టర్ ఎ.ఆర్.రెహమాన్... తన కొత్త చిత్రానికీ పని చేయబోతుండడం విశేషం. ఈ చిత్రం పాన్ ఇండియా స్థాయలో తెరకెక్కబోతోంది. ఈ సినిమా కోసం కొంత కాలం నటుడిగా వేరే చిత్రాలేవీ చేయబోవట్లేదు సూర్య. మరి పదేళ్ల తర్వాత దర్శకుడిగా సినిమా తీస్తూ సూర్య ఏమేర మెప్పిస్తాడో చూడాలి.