ఏఐ పై సింగీతం ఏమన్నారంటే?

భారతీయ చలనచిత్ర పరిశ్రమ గర్వించదగ్గ దిగ్గజ దర్శకుడు, ప్రయోగాత్మక సృజనమూర్తి సింగీతం శ్రీనివాసరావు (94) ఇకలేరనే వార్త సినీ లోకాన్ని దిగ్భ్రాంతికి గురిచేసింది. మూకీ సినిమా నుంచి మరుగుజ్జుల కథల వరకు ఏ జానర్ వదలకుండా అద్భుతాలు సృష్టించిన ఆయన, 94 ఏళ్ల వయసులోనూ ‘సింగ్‌గీతం’ సినిమాతో ప్రేక్షకులను అలరించారు. అయితే ఆయన కన్నుమూసిన వేళ, గతంలో ఆర్టిఫిషియల్ ఇంటెలిజెన్స్ (AI) గురించి ఆయన చెప్పిన అద్భుతమైన మాటలు ఇప్పుడు సోషల్ మీడియాలో వైరల్ అవుతున్నాయి. ఆ విశేషాలు ఏంటో చూద్దాం..

ఏఐ అనేది కేవలం ఒక స్పీడ్ టూల్ మాత్రమే:

ఆర్టిఫిషియల్ ఇంటెలిజెన్స్ వల్ల రైటర్స్ బ్లాక్ సమస్య తీరిపోతుందని, ప్రాంప్ట్ ఇస్తే సెకన్లలో రిప్లై వస్తుందని సింగీతం పేర్కొన్నారు. అయితే దీనివల్ల క్రియేటివిటీ చచ్చిపోతుందా అనే ప్రశ్నకు ఆయన స్పందిస్తూ.. ఏఐ ఎప్పటికీ పూర్తి స్థాయి సృష్టికర్త కాలేదన్నారు. ఇక మనుషులకు చాలా సమయం పట్టే పనులను ఏఐ కేవలం కొన్ని సెకన్లలో చేసిపెట్టగలదని, అదే దానికున్న బిగ్గెస్ట్ అడ్వాంటేజ్ అని ఆయన అభిప్రాయపడ్డారు.

మనిషి మెదడును ఏఐ ఎప్పటికీ బీట్ చేయలేదు:

దేవుడు సృష్టించిన మానవ మెదడుతో ఏఐని పోల్చలేమని సింగీతం స్పష్టం చేశారు. ఏఐ కేవలం మనం ఇచ్చిన ఇన్‌స్ట్రక్షన్లు, డేటా ఆధారంగా మాత్రమే కొత్త రూపం ఇస్తుంది తప్ప, స్వయంగా సొంతంగా ఒరిజినల్ ఆలోచనలను సృష్టించలేదని తేల్చిచెప్పారు. ఇక ఏరోజైనా సరే మానవ మెదడును అధిగమించే శక్తి ఏఐకి లేదని, భవిష్యత్తులో కూడా అది సాధ్యం కాదని ఆయన ఎంతో స్పష్టంగా వివరించారు.

అలుపెరుగని ప్రయోగాత్మక జీనియస్:

తెలుగు, తమిళ, హిందీ, ఆంగ్ల భాషల్లో సుమారు 60 చిత్రాలకు దర్శకత్వం వహించి సౌత్ ఇండియన్ సినిమాను విప్లవాత్మకంగా మార్చిన ఘనత సింగీతం వారిది. ఇక కేవీ రెడ్డి శిష్యుడిగా సినీ రంగ ప్రవేశం చేసి, గురువును మించిన శిష్యుడిగా పేరు తెచ్చుకున్నారు. ఆయన చివరి దశలో కూడా టెక్నాలజీపై, సృజనాత్మకతపై ఉన్న స్పష్టత ఆయన మేధస్సుకు నిదర్శనంగా నిలుస్తోంది.

సింగీతం శ్రీనివాసరావు భౌతికంగా మన మధ్య లేకపోయినా, ఆయన చేసిన అద్భుతమైన సినిమాలు, అందించిన మధురమైన జ్ఞాపకాలు ఎప్పటికీ అమరుగానే ఉంటాయి. ఇక టెక్నాలజీ ఎంత వేగంగా దూసుకుపోతున్నా మనిషి ఆలోచనల ముందు ఏఐ ఎప్పటికీ చిన్నదేనని ఆయన చెప్పిన మాటలు ప్రతి ఒక్కరికీ చక్కటి ఆలోచనను పంచుతున్నాయి..