స‌ల్మాన్‌తో పైడిప‌ల్లి-దిల్ రాజు ప్రాజెక్ట్.. సెట్లో ఏం జ‌రుగుతోందో తెలుసా?

బాలీవుడ్ సూపర్ స్టార్ సల్మాన్ ఖాన్.. టాలీవుడ్ ట్యాలెంటెడ్ డైరెక్టర్ వంశీ పైడిపల్లి.. అగ్ర నిర్మాత దిల్ రాజు కలయికలో రూపొందుతున్న భారీ చిత్రం ముంబైలో ఘనంగా ప్రారంభమైంది. సినీ వర్గాల్లో ఎంతో కాలంగా ఎదురుచూస్తున్న ఈ క్రేజీ ప్రాజెక్ట్ షూటింగ్ అధికారికంగా మొదలవ్వడమే కాకుండా సెట్స్‌లో `లేడీ సూపర్ స్టార్` నయనతార జాయిన్ అవ్వడం విశేషం. శ్రీ వెంకటేశ్వర క్రియేషన్స్ పతాకంపై #SVC63 వర్కింగ్ టైటిల్‌తో రూపొందుతున్న ఈ చిత్రం తొలుత సాంప్రదాయబద్ధంగా ముహూర్తపు వేడుక జరుపుకుని వెనువెంటనే రెగ్యులర్ షూటింగ్‌కు వెళ్లిపోయింది.

ముంబైలో వేసిన ఒక భారీ సెట్‌లో దాదాపు నెల రోజుల పాటు సాగే సుదీర్ఘ షెడ్యూల్‌ను చిత్ర యూనిట్ ప్లాన్ చేసింది. ఈ మొదటి షెడ్యూల్‌లో సినిమాకు అత్యంత కీలకమైన భారీ యాక్షన్ సన్నివేశాలతో పాటు.. ప్రధాన జంటపై వచ్చే కొన్ని ముఖ్య ఘట్టాలను చిత్రీకరిస్తున్నారు. సల్మాన్ ఖాన్ ఇమేజ్‌కు తగ్గట్టుగా హై-వోల్టేజ్ యాక్షన్ ఎంటర్‌టైనర్‌గా వంశీ పైడిపల్లి ఈ కథను తీర్చిదిద్దినట్లు సమాచారం. ఈ ప్రతిష్టాత్మక ప్రాజెక్ట్ ప్రారంభంపై దర్శకుడు వంశీ సోషల్ మీడియా వేదిక‌గా తన ఉత్సాహాన్ని వ్యక్తం చేస్తూ... ఈ ప్రయాణం అధికారికంగా మొదలైందని ప్రకటించారు.

ఈ చిత్రంలో నయనతార కథానాయికగా నటించడం సినిమాపై అంచనాలను రెట్టింపు చేసింది. సల్మాన్ ఖాన్ -నయనతార తొలిసారిగా వెండితెరపై జంటగా కనిపించనుండటం ఈ ప్రాజెక్ట్‌కే అతిపెద్ద హైలైట్ అని చెప్పవచ్చు. దర్శకుడు వంశీ కేవలం కమర్షియల్ అంశాలకే పరిమితం కాకుండా.. ప్రధాన న‌టుల‌కు బలమైన ప్రాధాన్యత ఉన్న పాత్రలను డిజైన్ చేశారని తెలుస్తోంది. యాక్షన్ మాత్రమే కాకుండా ఎమోషనల్ డెప్త్ ఉన్న డ్రామాగా ఈ చిత్రాన్ని మలుస్తున్నట్లు సమాచారం.

దిల్ రాజు నిర్మాణంలో శ్రీ వెంకటేశ్వర క్రియేషన్స్ సంస్థ ఈ సినిమాను అత్యంత ప్రతిష్టాత్మకమైన బడ్జెట్‌తో నిర్మిస్తోంది. బాలీవుడ్ కండల వీరుడు.. టాలీవుడ్ మేకర్స్ కలయికలో వస్తున్న ఈ సినిమాపై ఇటు ఉత్తరాది.. అటు దక్షిణాది ప్రేక్షకుల్లో విపరీతమైన క్రేజ్ నెలకొంది. పాన్ ఇండియా స్థాయిలో ఈ ప్రాజెక్ట్ తో భారతీయ సినిమాలో సరికొత్త రికార్డులను సృష్టించాలని చిత్ర బృందం భావిస్తోంది.

ప్రస్తుతం శరవేగంగా షూటింగ్ జరుగుతోంది. ఈ యాక్షన్ డ్రామాను 2027లో థియేటర్లలో విడుదల చేసేందుకు సన్నాహాలు చేస్తున్నారు. త్వరలోనే ఈ సినిమాలో నటించే ఇతర నటీనటులు, సాంకేతిక నిపుణుల వివరాలను అధికారికంగా వెల్లడించనున్నారు. సల్మాన్ ఖాన్ బాక్సాఫీస్ స్టామినా.. వంశీ పైడిపల్లి విల‌క్ష‌ణ‌ మేకింగ్ స్టైల్ కలిస్తే వెండితెరపై ఎటువంటి మ్యాజిక్ క్రియేట్ అవుతుందో చూడాలని సినీ అభిమానులు ఆసక్తిగా ఎదురుచూస్తున్నారు.