హాలీవుడ్ వేదికపై రామాయణం.. విడుదలకు ముందే గ్లోబల్ ప్రమోషన్‌కు భారీ ప్లాన్!

భారతీయ ఇతిహాసం రామాయణాన్ని అంతర్జాతీయ ప్రేక్షకులకు చేరువ చేయడంపై చిత్ర బృందం ప్రత్యేక దృష్టి పెట్టింది. రణ్‌బీర్ కపూర్, సాయి పల్లవి, యశ్ ప్రధాన పాత్రల్లో నటిస్తున్న ఈ భారీ ప్రాజెక్టును ప్రపంచవ్యాప్తంగా ప్రేక్షకులకు పరిచయం చేసేందుకు హాలీవుడ్ వేదికను ఎంచుకున్నట్లు సమాచారం. అక్టోబర్ 27న అమెరికాలోని లాస్ ఏంజెల్స్‌లో ఈ సినిమా ప్రత్యేక ప్రీమియర్ నిర్వహించేందుకు ఏర్పాట్లు చేస్తున్నట్లు వార్తలు వస్తున్నాయి.

లాస్ ఏంజెల్స్‌లోని అకాడమీ మ్యూజియం ఆఫ్ మోషన్ పిక్చర్స్‌లో ఉన్న డేవిడ్ గెఫెన్ థియేటర్ ఈ ప్రదర్శనకు వేదిక కానుంది. నవంబర్ 5న సినిమా మొదటి భాగం థియేటర్లలో విడుదల కానుండగా, అంతకంటే తొమ్మిది రోజుల ముందే ఈ ప్రీమియర్ జరగనుండటం ప్రత్యేక ఆకర్షణగా మారింది. అయితే ఈ ప్రదర్శనకు సంబంధించిన పూర్తి వివరాలు, అతిథుల జాబితాపై అధికారిక స్పష్టత రావాల్సి ఉంది.

సాధారణంగా భారతీయ సినిమాలు దేశీయ మార్కెట్‌ను దృష్టిలో పెట్టుకుని ప్రచారం ప్రారంభిస్తాయి. కానీ రామాయణం విషయంలో అంతర్జాతీయ ప్రేక్షకులు, హాలీవుడ్ ప్రముఖులు, ప్రపంచ సినిమా పరిశ్రమ దృష్టిని ఆకర్షించేలా ప్రచార వ్యూహాన్ని రూపొందిస్తున్నట్లు తెలుస్తోంది. ఈ ప్రీమియర్‌కు లభించే స్పందన సినిమాపై అంతర్జాతీయ స్థాయిలో ఆసక్తిని పెంచే అవకాశం ఉంది.

నితీశ్ తివారీ దర్శకత్వంలో తెరకెక్కుతున్న ఈ చిత్రాన్ని నమిత్ మల్హోత్రా నేతృత్వంలోని ప్రైమ్ ఫోకస్ స్టూడియోస్, డీఎన్ఈజీ, యశ్‌కు చెందిన మాన్‌స్టర్ మైండ్ క్రియేషన్స్ సంయుక్తంగా నిర్మిస్తున్నాయి. రాముడిగా రణ్‌బీర్ కపూర్, సీతగా సాయి పల్లవి, రావణుడిగా యశ్ కనిపించనున్నారు. ఏ.ఆర్. రెహమాన్, హన్స్ జిమ్మర్ సంగీత బాధ్యతలు చేపట్టడం కూడా ఈ ప్రాజెక్టుపై అంచనాలను పెంచుతోంది.

భారతీయ ఇతిహాసాన్ని భారీ విజువల్స్‌తో ప్రపంచ ప్రేక్షకులకు అందించాలనే లక్ష్యంతో రూపొందుతున్న ఈ సినిమా, విడుదలకు ముందే అంతర్జాతీయంగా ఎంతటి ఆసక్తిని సృష్టిస్తుందో చూడాలి.