'రామాయ‌ణం' మార్కెట్ పెంచే వ్యూహం

యానిమల్ చిత్రం పాన్ ఇండియ‌న్ స్టార్ డ‌మ్ ని అందించిన త‌ర్వాత‌ రణబీర్ కపూర్ ప్ర‌ణాళిక‌లు అమాంతం మారాయి. అత‌డు తన అత్యంత ప్రతిష్టాత్మక ప్రాజెక్ట్ రామాయణంలో న‌టిస్తున్నాడు. దంగల్, చిచ్చోర్ లాంటి బ్లాక్ బ‌స్ట‌ర్ చిత్రాల్ని అందించిన నితేష్ తివారీ ఈ ఫ్రాంఛైజీకి దర్శకత్వం వహిస్తున్నారు. రెండు భాగాలుగా ఈ సిరీస్ ని అత్యంత భారీ బ‌డ్జెట్ తో రూపొందించ‌నున్నామ‌ని ద‌ర్శ‌కనిర్మాత‌లు ప్ర‌క‌టించారు. ఈ చిత్రం రెండు భాగాలుగా విడుదల కానుండ‌గా, మొదటి భాగం 2026 దీపావళికి, రెండవ భాగం 2027 దీపావళికి విడుద‌ల‌వుతాయి.

పాత్ర‌లు, పాత్ర‌ధారుల ఎంపిక ఎంతో ఆస‌క్తిని రేకెత్తించింది. శ్రీ‌రాముడిగా రణబీర్ , సీతగా సాయిప‌ల్ల‌వి నటిస్తుండ‌గా, కీల‌క‌మైన పాత్ర‌ల్లో స‌న్నీడియోల్, బాబి డియోల్ త‌దిత‌రులు న‌టిస్తున్నారు. అభిమానులు ఫస్ట్ లుక్ కోసం వేచి చూస్తున్న ఈ ప్ర‌త్యేక త‌రుణంలో ఒక శుభ‌వార్త అందింది.

మే 1 నుంచి 4 వ‌ర‌కూ జ‌ర‌గ‌నున్న వరల్డ్ ఆడియో విజువల్ & ఎంటర్‌టైన్‌మెంట్ సమ్మిట్ (WAVES)లో రామాయణం ఫ‌స్ట్ లుక్ ని రిలీజ్ చేయాల‌ని మేకర్స్ ఆలోచిస్తున్నారని తెలిసింది. ది వేవ్స్ స‌మ్మిట్ -2025 దేశంలో ఇదే తొలిసారి. దేశ‌వ్యాప్తంగా ఉన్న సినీప్ర‌ముఖులంతా ఈ ఈవెంట్ కి అటెండ‌వుతున్నారు. అలాంటి చోట రామాయ‌ణం గ్లింప్స్ రిలీజ్ చేయాల‌నేది స‌రైన ఆలోచ‌న‌. దీనిని నితీష్ తివారీ నిర‌భ్యంత‌రంగా అమ‌ల్లో పెడుతున్నారు. రామాయ‌ణం -1 మొదటి పోస్టర్ లేదా వీడియోను విడుదల చేయాలనేది ప్లాన్. ప్ర‌స్తుతం దీనిపై చిత్ర‌బృందం సీరియ‌స్ గా వ‌ర్క్ చేస్తోంద‌ని స‌మాచారం. వేవ్స్ వేదిక‌గా రామాయ‌ణం టీమ్ గ్రాండ్ ప్రమోషన్స్ ని ప్రారంభించే యోచ‌న‌తో ఉంది.

రాకింగ్ స్టార్ యష్‌ ఈ చిత్రంలో రాక్షస రాజు రావణుడిగా న‌టిస్తుండ‌గా, హనుమంతుడిగా సన్నీ డియోల్ నటిస్తున్నారు. అరుణ్ గోవిల్, లారా దత్, ఇందిరా కృష్ణ, మరియు రకుల్ ప్రీత్ సింగ్ తదితరులు కీలక పాత్రల్లో కనిపిస్తారు.