జాతిరత్నాలు, మ్యాడ్.. ఇప్పుడు జింఖానా!

యూత్‌ను మెప్పించే కామెడీ ఎంటర్టైనర్‌లు ఎప్పుడు వచ్చినా కూడా ఆ బజ్ వేరేలా ఉంటుంది. జాతిరత్నాలు, మ్యాడ్ ఏ స్థాయిలో హిట్టయ్యాయో ప్రత్యేకంగా చెప్పనక్కర్లేదు. ఇక మలయాళంలో ఘన విజయం సాధించిన అలప్పుఝ జింఖానా ఇప్పుడు తెలుగులో జింఖానాగా విడుదలై, ప్రేక్షకులను థియేటర్‌లో ఆకట్టుకుంటోంది. ‘ప్రేమలు’ ఫేం నస్లేన్ కె. గపూర్ ప్రధాన పాత్రలో నటించిన ఈ సినిమా మలయాళంలోనే హిట్ టాక్ అందుకోగా, ఇప్పుడు తెలుగులోనూ అదే బజ్ ను రిపీట్ చేస్తోంది.

ఇటీవలే రిలీజైన ఈ సినిమా మొదటి రోజే సూపర్ రెస్పాన్స్ అందుకుంది. ముఖ్యంగా యూత్ ఆడియన్స్ ఈ సినిమాను తమతో అనుసంధానించుకున్నారు. కథలోని సింప్లిసిటీ, పాత్రలలోని అమాయకత్వం, మరియు బాక్సింగ్ అకాడమీ నేపథ్యంలో నడిచే సంఘటనలు వారిలో నిజంగా జరిగేవిగా అనిపించడంతో మంచి కనెక్షన్ ఏర్పడింది.

దర్శకుడు ఖలీద్ రెహమాన్ కథను ఎక్కువ మలుపులు లేకుండా, స్ట్రైట్ ఫార్వర్డ్ గా చూపించి నవ్విస్తూ, ఏదో మెసేజ్ పాస్ చేసే ప్రయత్నం చేశారు. ఒకరకంగా చూస్తే ఇది ఓ యూత్ గ్యాంగ్ తన అసలైన టాలెంట్‌ను గుర్తించుకుంటూ ఎదిగే జర్నీ. జాతిరత్నాలు, మ్యాడ్ తరహాలో తెలుగు ఆడియన్స్‌ను టార్గెట్ చేసే సినిమాల్లో ఇది మరో హిట్‌గా మారే సూచనలు కనిపిస్తున్నాయి.

ఒకే రోజులో ఫస్ట్ షో తర్వాతే మూవీపై బజ్ క్రియేట్ కావడం, సెకండ్ షోకి హౌస్‌ఫుల్ స్టేటస్ రావడం చూస్తుంటే, థియేటర్ వేదికగా ఈ సినిమా హిట్ ట్రాక్‌లోకి ప్రవేశించినట్టే. రెండవ రోజు ఉదయాన్నే బుకింగ్స్ పెరిగిపోయి, పలు కేంద్రాల్లో వేగంగా అడ్వాన్స్ బుకింగ్స్ నిండిపోతున్నాయి. వేసవిలో వినోదాన్ని కోరే ప్రేక్షకులకు ఇది సరైన ఫ్యామిలీ అండ్ ఫ్రెండ్ ప్యాకేజీగా మారుతోంది.

ఈ సినిమాను తెలుగులో అపర్ణ సినిమాస్ అధ్బుతంగా డబ్ చేసింది. మలయాళ టోన్‌ను కోల్పోకుండా, తెలుగు నేటివిటీకి తగ్గట్లుగా ట్రాన్స్లేట్ చేయడంలో వారు బాగా కష్టపడ్డారు. మైత్రీ మూవీ మేకర్స్ ఈ సినిమాను తెలుగులో విడుదల చేయడం సినిమాపై అంచనాలు పెంచింది. ముఖ్యంగా ట్రైలర్ లో నస్లేన్ బాలకృష్ణ స్టైల్ లో డైలాగ్ చెప్పడం, థియేటర్ లో సందడి పెంచుతోంది.

ఇక లేటెస్ట్ యూత్ జీవితాన్ని సరదాగా చూపిస్తూ, బాక్సింగ్ లాంటి పవర్ఫుల్ స్పోర్ట్‌కు అర్థవంతమైన కాన్వాస్ ఇచ్చిన జింఖానా.. ఇప్పుడు తెలుగు రాష్ట్రాల్లో ఓ మినీ సెన్సేషన్ అవుతోంది. లైట్ హార్ట్ కామెడీతో పాటు, సరైన ఎమోషన్ కూడా అందించగలిగే ఈ సినిమా.. ఈ వేసవి బాక్స్ ఆఫీస్‌కి మంచి బూస్ట్ ఇచ్చింది అనడంలో ఎలాంటి సందేహం లేదు.