మాద‌క ద్ర‌వ్యాల‌కు నోనో.. 24శాఖ‌లు ఆర్టిస్టుల‌తో ఒప్పందం!

ఆన్ లొకేష‌న్ డ్ర‌గ్స్ వినియోగం, మ‌హిళ‌ల‌తో అస‌భ్య ప్ర‌వ‌ర్త‌న కార‌ణంగా మ‌ల‌యాళ చిత్ర‌ప‌రిశ్ర‌మకు తీవ్ర‌మైన బ్యాడ్ నేమ్ వ‌చ్చిన సంగ‌తి తెలిసిందే. సినీప‌రిశ్ర‌మ‌లో దారుణ ప‌రిస్థితుల‌పై జ‌స్టిస్ హేమ క‌మిటీ నివేదిక సంచ‌ల‌నంగా మారాక కూడా మాలీవుడ్ మార‌లేద‌ని నిరూపిస్తూ కొంద‌రు న‌టులు షూటింగ్ లొకేష‌న్ లో డ్ర‌గ్స్ సేవించిన ఘ‌ట‌న‌లు బ‌య‌ట‌ప‌డ్డాయి.

అయితే ఈ ప‌రిస్థితిని నివారించేందుకు మ‌ల‌యాళ నిర్మాత‌ల సంఘం ఒక కొత్త నిబంధనను ప్రవేశపెట్టింది. జూన్ 26 నుండి సెట్స్ లో కానీ, పోస్ట్ ప్రొడ‌క్ష‌న్ ప్ర‌దేశాల్లో కానీ, షూట్ లో నివాస స్థలాల వ‌ద్ద కానీ మాద‌క ద్ర‌వ్యాల్ని వినియోగించ‌మ‌ని ప్రామిస్ చేస్తూ అఫిడ‌విట్ లో సంత‌కాలు చేయించుకునేందుకు సంఘం సిద్ధ‌మైంది. న‌టీన‌టులు, డ్రైవర్ల నుండి అన్ని శాఖ‌ల్లో ప‌ని చేసేవారికి ఈ నియ‌మం వ‌ర్తిస్తుంది. ఆ మేర‌కు అసోసియేషన్స్ హెడ్స్ తో మాలీవుడ్ నిర్మాత‌లు ఒప్పందాలు చేసుకున్నార‌ని తెలుస్తోంది.

చాలామంది సినిమాల‌ చిత్రీకరణ సమయంలో మాదకద్రవ్యాలను ఉపయోగించబోమని ప్రతిజ్ఞ చేస్తూ అఫిడవిట్‌లో సంతకం చేయ‌డానికి సిద్ధ‌మ‌వుతున్నార‌నేది తాజా స‌మాచారం. షైన్ టామ్ చాకో , శ్రీనాథ్ భాసి వంటి నటులు ఆన్ లొకేష‌న్ మాద‌క ద్ర‌వ్యాల్ని వినియోగించార‌ని న‌టీమ‌ణులు ఆరోపించారు. ఆ త‌ర్వాత నిర్మాత‌ల నుంచి ఈ క‌ఠినమైన నిర్ణ‌యం వెలువ‌డింది. సెట్‌లో మాదకద్రవ్యాలు లేని వాతావరణాన్ని సృష్టించడం అసోసియేషన్ లక్ష్యం అని నిర్మాత‌లు పేర్కొన్నారు.

మలయాళ చిత్ర పరిశ్రమలోని అన్ని శాఖ‌ల నుండి నిర్మాతల సంఘం ఒప్పందాన్ని పొందింది. చాలా చర్చల తర్వాత ఈ నిర్ణయం తీసుకున్నారు. మాదకద్రవ్యాల సంబంధిత సంఘటనల వల్ల కలిగే అంతరాయాలను నివారించడం, సెట్లో ప‌నులు సజావుగా జరిగేలా చూడటం ఈ ఒప్పంద‌ లక్ష్యం. మాదకద్రవ్యాల దుర్వినియోగ కేసుల కారణంగా అధికారులు చిత్రీకరణ ప్రదేశాలలో సోదాలు నిర్వహించ‌డం ఇబ్బందిక‌రంగా మారింది. దీని వలన సినిమాల షూటింగులు ఆల‌స్యం అయ్యాయి. ఈ అంతరాయాలు ప్రధానంగా నిర్మాతలను ప్రభావితం చేశాయి. ఈ నియమాన్ని ఖచ్చితంగా అమలు చేయాలని అసోసియేషన్‌ను ప్రేరేపించింది. త్వ‌ర‌లో మలయాళ మూవీ ఆర్టిస్ట్స్ సంఘం (AMMA) త‌దుప‌రి వార్షిక జనరల్ బాడీ సమావేశంలో ఈ విషయాన్ని చర్చించవచ్చని కూడా తెలుస్తోంది.