ఇండియన్ సినిమాకు 'వన్ అండ్ ఓన్లీ' మెగాస్టార్..!

మెగాస్టార్ చిరంజీవి అనేది మెగా ఫ్యాన్స్ కి ఒక ఎమోషన్. ఇండియన్ సినిమా హిస్టరీలో చిరంజీవికి ప్రత్యేకమైన పేజీలు ఉంటాయి. ఎలాంటి సినీ నేపథ్యం లేకుండా వచ్చి తనకంటూ మెగా అభిమానుల సంద్రాన్నే ఏర్పాటు చేసుకున్నారు ఆయన. యాక్టర్ అవ్వాలనుకున్న కల సాకారం చేసుకునేందుకు ప్రతి అవకాశాన్ని వదులుకోకుండా వాడుకున్నారు. ఇంతింతై వటుడింతై అన్నట్టుగా ముందు చిన్న చిన్న పాత్రలు చేసి ఆ తర్వాత సైడ్ రోల్స్, విలన్ రోల్స్ చేసి అక్కడ టాలెంట్ చూపించి లీడ్ రోల్స్ చేస్తూ వచ్చారు.

కెరీర్ తొలినాళ్లలో..

చిరంజీవి 1978లో కెరీర్ ప్రారంభించారు. ఆయన కెమెరా ముందుకు వెళ్లింది పునాదిరాళ్లు అయినా ముందు రిలీజైంది మాత్రం ప్రాణం ఖరీదు సినిమా. బాపు, కె.బాలచందర్ లాంటి డైరెక్టర్స్ తో కెరీర్ తొలినాళ్లలో పనిచేసిన చిరంజీవి తన కెరీర్ ని ఎలా మలచుకోవాలో డిసైడ్ అయ్యారు. అదే క్రమంలో పున్నమి నాగు, కోతల రాయుడు, మొగుడు కావాలి సినిమాలు చేసి ప్రేక్షకులను అలరించారు.

అదే దారిలో చట్టానికి కళ్లులేవు, న్యాయం కావాలి, ఇంట్లో రామయ్య వీధిలో కృష్ణయ్య, అభిలాష, మంచు పల్లకి సినిమాలతో ప్రేక్షకులకు మరింత దగ్గరయ్యారు చిరంజీవి. ఐతే చిరంజీవి కెరీర్ ని మలుపు తిప్పిన సినిమా ఖైదీ. 1983లో వచ్చిన ఆ సినిమా ఆయన్ను సూపర్ క్రేజ్ తెచ్చింది.

చిరంజీవికి తిరుగులేని క్రేజ్..

ఖైదీ సినిమా తెలుగు సినిమాల్లో కొత్త రికార్డులు సృష్టించింది. ఆ సినిమాతో మెగాస్టార్ చిరంజీవికి తిరుగులేని క్రేజ్ వచ్చింది. చిరంజీవి సినిమాల్లో డ్యాన్సులు స్పెషల్ ఎట్రాక్షన్. ఆయన కొత్త కొత్త స్టెప్పులు ఇంట్రడ్యూస్ చేశారు. అలా స్టెప్పులేస్తూ, యాక్షన్ సినిమాలు చేస్తూ బ్లాక్ బస్టర్ హిట్లు కొట్టారు చిరంజీవి.

ప్రాణం ఖరీదు, పునాది రాళ్లు నుంచి భోళా శంకర్ వరకు చిరంజీవి 155 సినిమాల ప్రస్థానం గురించి ఎంత చెప్పినా తక్కువే. చిరంజీవి కేవలం రీల్ హీరో మాత్రమే కాదు రియల్ హీరో కూడా.. ఆపద సమయాల్లో అభిమానులకు అండగా ఉంటారు చిరంజీవి. చిరంజీవి బ్లడ్ అండ్ ఐ బ్యాంక్ ద్వారా ఎంతోమందికి జీవితాన్ని అందిస్తున్నారు.

ఇక సినీ పరిశ్రమకు ఆయన చేసిన సేవలకు గాను ఇండియన్ గవర్నమెంట్ పద్మ భూషణ్, పద్మ విభూషణ్ అవార్డులతో సత్కరించింది.

ఇండియన్ సినిమాల్లో ఒక ప్రత్యేకమైన స్థానాన్ని..

మెగాస్టార్ చిరంజీవి ఇండియన్ సినిమాల్లో ఒక ప్రత్యేకమైన స్థానాన్ని సంపాధించుకున్నారు. ఆయన ఈ స్థానాన్ని అందుకోవడం కోసం ఎంతో కష్టపడ్డారు. స్వయంకృషితో ఎదిగిన మణిషి కాబట్టే ఎక్కడ ఎప్పుడు కించిత్ గర్వం కూడా ఆయనలో ఉండదు. అంతేకాదు తెలుగు సినిమా పరిశ్రమలో వచ్చే చాలామందికి చిరంజీవే స్పూర్తి.. ఆయన్ను ఇన్ స్ప్రేషన్ గా తీసుకునే సినీ రంగం వైపు వస్తుంటారు.

నేడు 70 వ వసంతంలోకి అడుగు పెడుతున్న మెగాస్టార్ చిరంజీవి గారికి హృదయపూర్వక పుట్టినరోజు శుభాకాంక్షలు అందిస్తుంది టీమ్ తుపాకి.కామ్.