QR కోడ్ స్కాన్ చేస్తే ఫస్ట్ లుక్ రివీల్.. ఇదేదో కొత్తగా ఉందే..

దిగ్గజ నటుడు, నట విరాట్ రావు గోపాలరావు నట వారసుడిగా ఇండస్ట్రీలో అడుగుపెట్టిన రావు రమేశ్ .. మంచి పేరు దక్కించుకున్న విషయం తెలిసిందే. తన నటనతో ఇండస్ట్రీలో సూపర్ ఫ్యాన్ బేస్ సంపాదించుకున్నారు. తండ్రికి తగ్గ తనయుడిగా ప్రశంసలు అందుకుంటున్నారు. తండ్రిలాగే తనదైన డైలాగ్ డెలివరీతో ప్రేక్షకులను ఎంతగానో ఆకట్టుకుంటున్నారు. సినిమాల సెలక్షన్ లో కూడా జాగ్రత్తలు తీసుకుంటున్నారు.

అయితే ఆయన నటించిన సినిమాల ఫలితం ఎలా ఉన్నా రావు రమేశ్.. పోషించిన పాత్రలు మాత్రం ఎప్పుడూ హిట్ అవుతూనే ఉంటాయి. అటువంటి నటుడు ఇప్పుడు లీడ్ రోల్ లో మారుతీ నగర్ సుబ్రమణ్యం సినిమా చేస్తున్న విషయం తెలిసిందే. షూటింగ్ పూర్తి చేసుకున్న ఈ మూవీ.. త్వరలోనే థియేటర్లలోకి రానుంది. ఇప్పటికే మంచి ఇంట్రెస్ట్ క్రియేట్ చేసిన ఈ సినిమా ప్రమోషన్స్ స్టార్ట్ చేశారు మేకర్స్.

తాజాగా మేకర్స్ ప్రమోషనల్ వీడియోను రిలీజ్ చేశారు. అందులో ఒక క్యూఆర్ కోడ్ ను యాడ్ చేశారు. దానిని స్కాన్ చేస్తే ఫస్ట్ లుక్ పోస్టర్ ను చూడొచ్చని తెలిపారు. క్యూఆర్ కోడ్‌ ను స్కాన్ చేయడం ద్వారా కనీసం 50,000 మంది ఈ పోస్టర్‌ ను విడుదల చేస్తారని అంచనా వేశారు. ఎంతమందైనా స్కాన్ చేసి చూడొచ్చని చెప్పారు. అయితే ఫస్ట్ లుక్ తెగ ఆకట్టుకుంటోంది. లుంగీ అవతార్ లో ఉన్న రావు రమేశ్.. మంచి ఎంటర్టైన్మెంట్ అందించనున్నట్లు అర్థమవుతోంది. పోస్టర్ ను క్యూఆర్ కోడ్ ద్వారా రిలీజ్ చేయడం కొత్తగా ఉంది.

"మారుతీ నగర్ సుబ్రమణ్యం.. భలే గమ్మత్తుగా ఉంటోంది. ఈ సినిమా పోస్టర్ ను నటుడిగా నాకు ఈ స్థాయిని, స్థానాన్ని ఇచ్చిన తెలుగు ప్రేక్షకులే ఆవిష్కరిస్తే బాగుంటుందని నమ్మాం. క్యూఆర్ కోడ్ ను స్కాన్ చేసి పోస్టర్ ను ఆవిష్కరించండి. ప్రోత్సహించండి" అని రావు రమేశ్ వీడియోలో తెలిపారు. అయితే ఈ సినిమా అంతా రావు రమేశ్ రోల్ చుట్టూ తిరగనున్నట్లు తెలుస్తోంది. ఆ విషయం చెప్పడానికే టైటిల్ పోస్టర్ విడుదలకు రావు రమేశ్ గతంలో చేసిన రెండు పాత్రలను గెస్ట్ లుగా స్పెషల్ గా తీసుకువచ్చారు మేకర్స్!

మారుతీ నగర్ సుబ్రమణ్యం సినిమాకు హ్యాపీ వెడ్డింగ్ ఫేమ్ లక్షణ్ కార్య దర్శకత్వం వహించారు. పీబీఆర్ సినిమాస్, సినిమాటిక్స్ బ్యానర్లపై బుజ్జి రాయుడు పెంట్యాల, మోహన్ కార్య సంయుక్తంగా నిర్మించారు. సీనియర్ నటి ఇంద్రజ.. రావు రమేశ్ కు జోడీగా నటిస్తున్నారు. అంకిత్ కొయ్య, రమ్య పసుపులేటి, హర్షవర్ధన్ తదితరులు ఇతర పాత్రల్లో కనిపించనున్నారు. త్వరలోనే ఈ సినిమా విడుదల తేదీని మేకర్స్ ప్రకటించనున్నారు.