మూడేళ్ల‌లోపే.. స్టార్ డైరెక్టర్ శ‌ప‌థం!
అయితే తాజా ఇంట‌ర్వ్యూలో అట్లీ చేసిన శ‌ప‌థం ఇప్పుడు చ‌ర్చ‌నీయాంశంగా మారింది. ఇంత‌కీ అత‌డు చేసిన శ‌ప‌థం ఏమిటి? అంటే వివ‌రాల్లోకి వెళ్లాలి.
By: Tupaki Desk | 24 Feb 2024 4:27 AM GMT
భార‌త‌దేశంలోని మోస్ట్ ప్రామిస్సింగ్ డైరెక్ట‌ర్స్ జాబితాలో త‌మిళ దర్శకుడు అట్లీ పేరు చేరిన సంగ‌తి తెలిసిందే. గ‌త ఏడాది 'జవాన్'తో కింగ్ ఖాన్ షారూఖ్ కి 1000 కోట్ల క్ల‌బ్ సినిమాని అందించిన ఘ‌న‌త అట్లీకే చెందుతుంది. అయితే తాజా ఇంట‌ర్వ్యూలో అట్లీ చేసిన శ‌ప‌థం ఇప్పుడు చ‌ర్చ‌నీయాంశంగా మారింది. ఇంత‌కీ అత‌డు చేసిన శ‌ప‌థం ఏమిటి? అంటే వివ‌రాల్లోకి వెళ్లాలి.
డైరెక్టర్ అట్లీ కుమార్ ఇటీవల తాను అసిస్టెంట్ డైరెక్టర్‌గా ప్రవేశించిన‌ప్ప‌టి రోజుల‌ను గుర్తు చేసుకున్నారు. త‌దుప‌రి తాను హాలీవుడ్ కి వెళుతున్నాన‌ని కూడా తెలిపారు. ఏబీపీ న్యూస్ కాన్‌క్లేవ్‌లో అట్లీ మాట్లాడుతూ, తన కెరీర్ లో కాల‌యాప‌న గురించి బ‌హిరంగంగా మాట్లాడాడు. బాలీవుడ్‌లోకి ప్రవేశించడానికి తనకు ఎనిమిదేళ్లు పట్టిందని పేర్కొన్నాడు. తరువాతి మూడేళ్లలో హాలీవుడ్‌లో కొత్త ప్రాజెక్ట్ చేస్తాన‌ని వాగ్దానం చేశాడు.
2023లో షారుఖ్ ఖాన్ నటించిన `జవాన్`తో తాను సాధించిన భారీ విజయాన్ని అట్లీ ప్రస్తావించారు. తన సినిమాల్లో హింస, సున్నితమైన కంటెంట్‌ను ప్రస్తావిస్తూ.. నేను చేసిన ఏ సినిమాలో అయినా నిజాన్ని వర్ణించేలా స‌న్నివేశాలు ఉంటాయ‌ని అట్లీ అన్నారు. నేను మీడియా వ్య‌క్తిని. మీడియా తమ వార్తలలో హింసాత్మక ఫుటేజీని ఉపయోగించినప్పుడు అది ప్రపంచంలో జ‌రుగుతున్న వాస్తవ చిత్రాన్ని ప్రతిబింబిస్తుంది. అందుకే జవాన్‌లో రైతు ఆత్మహత్యల తీవ్రతను చిత్రించాల్సి వచ్చింది. దానిని తగ్గించే అవకాశం లేకుండా పోయింది..హింస అనేది ఎవరినీ రెచ్చగొట్టడానికి ఉద్దేశించినది కాదని, ప్ర‌జ‌ల సహజీవనానికి సంబంధించిన కొన్ని చర్యలు మానవత్వమా లేదా అమానవీయమైనవా అనేది ప్రేక్షకులను పునరాలోచించేలా చేయడమేనని ఆయన అన్నారు. ఒక సినిమాలో కుక్కలను కాల్చే సన్నివేశాన్ని చూపిస్తే, ఆ స‌న్నివేశం తప్పనిసరిగా హింసను సూచించదు కానీ జంతువులపై వేధింపులను ప్రశ్నిస్తుంది. ఈ ప్రయత్నాలన్నింటినీ హింసగా వర్గీకరించడం దురదృష్టకరమని, కానీ అది చేదు నిజాన్ని సూచిస్తుందని అట్లీ అన్నారు.
రోబో కోసం ఒక అసిస్టెంట్ డైరెక్టర్ గా రజనీకాంత్‌తో మొదటి రోజు షూటింగ్ లో పాల్గొన‌డాన్ని అట్లీ కుమార్ గుర్తు చేసుకున్నారు. ఇది మంత్రముగ్దులను చేసే అద్భుతమైన సంఘటనగా పేర్కొన్నారు. రోబో చిత్రానికి అట్లీ దర్శకుడు శంకర్ వ‌ద్ద AD గా పనిచేశాడు. రజనీకాంత్, ద‌ళ‌ప‌తి విజయ్, షారూఖ్‌లతో కలిసి పనిచేశాడు. ఈ ప్రయాణం కృతజ్ఞతతో నిండి ఉందని అట్లీ అన్నారు.
