విజయ్-త్రిష రూమర్స్‌పై ఖుష్బూ ఘాటు స్పందన!

తమిళ స్టార్ హీరో విజయ్, నటి త్రిషల వ్యక్తిగత జీవితం గురించి గత కొద్ది రోజులుగా సోషల్ మీడియాలో రకరకాల వార్తలు వినిపిస్తున్నాయి. ఈ రూమర్స్‌పై సీనియర్ నటి ఖుష్బూ తాజాగా స్పందిస్తూ గట్టి కౌంటర్ ఇచ్చారు. ఇతరుల వ్యక్తిగత విషయాల్లో తలదూర్చి ఆనందం వెతుక్కునే వారిపై ఆమె తీవ్ర ఆగ్రహం వ్యక్తం చేశారు. త్రిష తనకి ఎంతో సన్నిహితురాలని, ఆమె వ్యక్తిత్వం గురించి తెలియని వారు చేసే కామెంట్స్‌ను అస్సలు పట్టించుకోవాల్సిన అవసరం లేదని ఖుష్బూ కుండబద్దలు కొట్టారు. ఆ వివరాలు ఇలా వున్నాయి..

త్రిష వ్యక్తిత్వంపై ఖుష్బూ ప్రశంసలు:

ఒక ఇంటర్వ్యూలో ఖుష్బూ మాట్లాడుతూ, విజయ్ మరియు త్రిష ఇద్దరూ తనకు వ్యక్తిగతంగా బాగా తెలుసని చెప్పారు. ముఖ్యంగా త్రిష గురించి ప్రస్తావిస్తూ, తను చూసిన గొప్ప మహిళల్లో త్రిష ఒకరని కొనియాడారు. ఆమె ఎంతో మృదుస్వభావి అని, ఎప్పుడూ హుందాగా ఉంటుందని తెలిపారు. ఇక ప్రస్తుత రోజుల్లో ఎవరైనా చిన్న తప్పు చేసినా, లేదా చివరికి తుమ్మినా సరే వేలెత్తి చూపే పరిస్థితులు ఉన్నాయని, ఇది చాలా దురదృష్టకరమని ఆమె ఆవేదన వ్యక్తం చేశారు. త్రిష లాంటి వ్యక్తిపై అనవసరపు నిందలు వేయడం సరికాదని ఆమె అభిప్రాయపడ్డారు.

పైశాచిక ఆనందం పొందుతున్నారు:

రూమర్స్ సృష్టించే వారిపై ఖుష్బూ నిప్పులు చెరిగారు. ఎదుటివారి జీవితాల్లో ఏం జరుగుతుందో తెలుసుకోవాలని ఆరాటపడేవారు, వారి గురించి తప్పుగా మాట్లాడుతూ ఒక రకమైన 'పైశాచిక ఆనందం' పొందుతారని విమర్శించారు. ఇక సెలబ్రిటీల వెనుక పడి వారి ప్రైవసీని దెబ్బతీసే సంస్కృతి ఇప్పుడు చెన్నైలో కూడా మొదలవ్వడం బాధాకరమని అన్నారు. ఇలాంటి కామెంట్స్ చేసే వారిలో 99 శాతం మంది ఎవరో కూడా మనకు తెలియదని, అలాంటి అనామకుల మాటలకు స్పందిస్తూ మన విలువైన సమయాన్ని వృథా చేయకూడదని త్రిషకు సూచించారు.

రాజకీయాలతో ముడిపెట్టడం తప్పు:

విజయ్ రాజకీయాల్లోకి వస్తున్న తరుణంలో, ఈ రూమర్స్ ఆయన కెరీర్‌పై ప్రభావం చూపుతాయా? అన్న ప్రశ్నకు ఖుష్బూ చాలా స్పష్టంగా సమాధానం ఇచ్చారు. ఎవరికి ఓటు వేయాలో ప్రజలకు బాగా తెలుసని, నాయకుడి వ్యక్తిగత జీవితాన్ని రాజకీయాలతో ముడిపెట్టడం సరైన పద్ధతి కాదని చెప్పారు. ఈ వివాదంతో అసలు సామాన్య ప్రజలకు ఏం సంబంధం ఉందో తనకు అర్థం కావడం లేదని ఆమె పేర్కొన్నారు. ఇది పూర్తిగా వారి వ్యక్తిగత విషయమని, దానిని భూతద్దంలో పెట్టి చూడాల్సిన అవసరం లేదని ఆమె స్పష్టం చేశారు.

సెలబ్రిటీలన్నాక రూమర్స్ రావడం సహజమే అయినా, అవి వారి హుందాతనాన్ని దెబ్బతీసేలా ఉండకూడదని ఖుష్బూ మాటల సారాంశం. ఎదుటివారి వ్యక్తిగత గౌరవాన్ని కాపాడటం అనేది అందరి బాధ్యత అని ఆమె గుర్తుచేశారు. ఖుష్బూ ఇచ్చిన ఈ ఘాటు స్పందన ప్రస్తుతం నెట్టింట వైరల్ అవుతోంది. ఈ వివరణతోనైనా విజయ్-త్రిషలపై వస్తున్న వార్తలకు చెక్ పడుతుందేమో చూడాలి.