చనిపోయిన దర్శకుడి చివరి సినిమా హిట్ అయ్యేనా?

తుషార్‌ కపూర్‌, శ్రేయాస్‌ తల్పాడే, సిద్ది ఇద్నాని ముఖ్య పాత్రల్లో నటించిన 'కప్కాపి' సినిమా గత ఏడాది జూన్‌లోనే విడుదల కావాల్సి ఉంది. కానీ దర్శకుడు సంగీత్ శివన్ మృతి చెందడంతో ఆ సమయంలో విడుదల చేయలేక పోయారు. సినిమా బ్యాలన్స్ ఉండటంతో పాటు ఇతర కారణాల వల్ల సినిమా వాయిదా పడుతూ వచ్చింది. 2023లో మలయాళంలో వచ్చిన 'రోమాంచం' సినిమాకు ఈ సినిమా రీమేక్‌. హిందీ ప్రేక్షకుల అభిరుచికి తగ్గట్లుగా సినిమాను సంగీత్‌ శివన్ రూపొందించాడు. 2025 మే 23న ఈ సినిమాను ప్రేక్షకుల ముందుకు తీసుకు వచ్చేందుకు ఏర్పాట్లు జరుగుతున్నాయి. తాజాగా సినిమా నుంచి టీజర్‌ను విడుదల చేశారు.

ఈ మధ్య కాలంలో హిందీ ప్రేక్షకులు స్త్రీ 2 తో పాటు మరికొన్ని హర్రర్‌, కామెడీ సినిమాలను ఆధరించారు. ముఖ్యంగా స్త్రీ 2 సినిమాకు వచ్చిన కలెక్షన్స్‌ అందరికీ షాకింగ్‌గా నిలిచాయి. అలాంటి కాన్సెప్ట్‌తోనే ఈ సినిమా రూపొందించారు. దాంతో బాక్సాఫీస్‌ వద్ద ఈ సినిమా మంచి విజయాన్ని సొంతం చేసుకుంటుందనే నమ్మకం వ్యక్తం అవుతోంది. తాజాగా విడుదలైన టీజర్‌తో సినిమా స్థాయి మరింతగా పెరిగింది. టీజర్‌లో సినిమాలోని హర్రర్‌ ఎలిమెంట్స్‌ను చూపించే ప్రయత్నం చేశారు. స్త్రీ 2తో పాటు భూల్‌ భులయ్యా సినిమాలోని హర్రర్‌ ఎలిమెంట్స్‌ను ఈ సినిమాలో కంటిన్యూ చేశారని టీజర్‌ను చూస్తే అర్థం అవుతోంది. హర్రర్‌ థ్రిల్లర్‌గా ఈ సినిమా ఆకట్టుకోబోతుందనే విశ్వాసంను మేకర్స్ వ్యక్తం చేస్తున్నారు.

ఓయిజా బోర్డ్‌ కాన్సెప్ట్‌తో గతంలో చాలా సినిమాలు వచ్చాయి. ఈ మధ్య కాలంలో ఇలాంటి కాన్సెప్ట్‌ ఓరియంటెడ్‌ సినిమాలకు మంచి స్పందన వచ్చిన నేపథ్యంలో ఈ సినిమాను ప్రేక్షకులు ఆధరించే అవకాశాలు ఉన్నాయనే ధీమాతో మేకర్స్ ఈ సినిమాను భారీ ఎత్తున విడుదల చేసేందుకు గాను ప్రయత్నాలు చేస్తున్నారు. మే 23న ఈ సినిమాను విడుదల చేయబోతున్నట్లు అధికారికంగా ప్రకటించారు. సోలో రిలీజ్ కోసం ఇన్నాళ్లు వెయిట్‌ చేసిన ఈ సినిమాకు అనుకున్నట్లుగానే పెద్దగా పోటీ లేదని తెలుస్తోంది. టీజర్‌తోనే అంచనాలు పెంచిన మేకర్స్ ట్రైలర్‌తో సినిమాకు మరింతగా పబ్లిసిటీ దక్కే విధంగా ప్లాన్‌ చేసే అవకాశాలు ఉన్నాయి.

సంగీత్‌ శివన్ దర్శకుడిగా సుదీర్ఘ కాలం పాటు సినిమాలు చేశారు. 1990లో మొదటిసారి వ్యూహం అనే మలయాళ సినిమాకు దర్శకత్వం వహించాడు. మలయాళ సినిమా ఇండస్ట్రీలో దాదాపు పదేళ్ల పాటు వరుసగా సినిమాలు చేశాడు. ఆ తర్వాత నుంచి హిందీ సినిమాలు చేయడం మొదలు పెట్టాడు. బాలీవుడ్‌లో ఈయన పలు సినిమాలు చేశాడు. మలయాళంలో ఈయన చివరగా 2012 సంవత్సరంలో సినిమాను చేశాడు. ఆ సినిమా తర్వాత కూడా హిందీలో పలు సినిమాలను చేశాడు. చనిపోయే ముందు వరకు సినిమాలు చేస్తూనే వచ్చాడు. ఈయన మే 8, 2024న మృతి చెందారు. చనిపోయే సమయంలో కప్కాపి సినిమాను చేస్తున్నారు. ఆయన మృతి తర్వాత విడుదల కాబోతున్న ఈ సినిమా ఫలితం ఎలా ఉంటుందో చూడాలి.