సెలబ్రిటీల పేరుతో భారీ మోసం.. ప్రజల్లో మార్పు రావాలంటున్న అధికారులు!
మన దేశంలో సెలబ్రిటీలకు ఉన్న క్రేజ్ అంతా ఇంతా కాదు. ఆ పేరు చెబితే చాలు, దానధర్మాలు చేయడానికి వెనుకాడని అభిమానులు ఎందరో ఉన్నారు.
By: Madhu Reddy | 14 May 2026 10:42 AM IST
సినిమా తారలపై ఉన్న అభిమానాన్ని కొందరు కేటుగాళ్లు తమ పెట్టుబడిగా మార్చుకుంటున్నారు. ఇటీవల జూనియర్ ఎన్టీఆర్ పేరుతో సామాజిక సేవా కార్యక్రమాల సాకు చెప్పి భారీగా విరాళాలు సేకరిస్తున్న వైనం వెలుగులోకి వచ్చింది. ఇలాంటి ఘటనలు పెరిగిపోతుండటంతో అటు సెలబ్రిటీల టీమ్స్, ఇటు పోలీసులు రంగంలోకి దిగారు. కేవలం గుడ్డిగా అభిమానించడమే కాదు, వాస్తవాలను గ్రహించే విజ్ఞత ప్రజల్లో రావాలని అధికారులు గట్టిగా కోరుతున్నారు.ఆ వివరాలు చూద్దాం..
నమ్మకమే పెట్టుబడిగా మోసాలు:
మన దేశంలో సెలబ్రిటీలకు ఉన్న క్రేజ్ అంతా ఇంతా కాదు. ఆ పేరు చెబితే చాలు, దానధర్మాలు చేయడానికి వెనుకాడని అభిమానులు ఎందరో ఉన్నారు. ఇదే అదునుగా భావిస్తున్న కొందరు మోసగాళ్లు, నకిలీ లెటర్ హెడ్లు, ఫేక్ సోషల్ మీడియా అకౌంట్లు సృష్టించి విరాళాలు వసూలు చేస్తున్నారు. ఒక ఎన్టీఆర్ మాత్రమే కాదు ఇటీవల శివ కార్తికేయన్ ప్రొడక్షన్ హౌస్ పేరుతో కూడా కొంతమంది డబ్బులు మోసం చేయడమే కాకుండా అవకాశం ఇప్పిస్తామని కొంతమంది దగ్గర డబ్బులు తీసుకున్నట్లు తమ దృష్టికి రావడంతో దీనిపై అటు శివ కార్తికేయన్ స్వయంగా స్పందించారు. ఇక ఎన్టీఆర్ టీమ్ తాజాగా స్పందిస్తూ.. తమ హీరోకు ఇలాంటి వసూళ్లతో ఎలాంటి సంబంధం లేదని తేల్చి చెప్పింది.
అధికారుల హెచ్చరిక ఇదే:
"ఎవరైనా సెలబ్రిటీ సహాయం చేయాలనుకుంటే వారి అధికారిక వెబ్సైట్లు లేదా ట్రస్ట్ల ద్వారానే చేస్తారు. అంతేకానీ వాట్సాప్ మెసేజ్లకో, ఫోన్ కాల్స్కో స్పందించి డబ్బులు పంపవద్దు" అని పోలీసులు హెచ్చరిస్తున్నారు. ఇక ఇలాంటి మోసగాళ్ల బారిన పడకుండా ఉండాలంటే ప్రజలు కనీస అవగాహన పెంచుకోవాలని, ఎవరో అడిగారని గుడ్డిగా నమ్మే రోజులు పోవాలని అధికారులు సూచిస్తున్నారు.
ఎన్టీఆర్ కొత్త సినిమాల సందడి:
ఇక సినిమాల విషయానికి వస్తే, ఎన్టీఆర్ గ్లోబల్ స్టార్గా దూసుకుపోతున్నారు. గతేడాది 'వార్ 2' సినిమాతో బాలీవుడ్లో గ్రాండ్ ఎంట్రీ ఇచ్చి రికార్డులు సృష్టించిన తారక్, ఇప్పుడు తన తదుపరి చిత్రం 'డ్రాగన్' కోసం సిద్ధమవుతున్నారు. ఈ క్రేజీ ప్రాజెక్ట్ గురించి అభిమానులు ఎంతో ఆసక్తిగా ఎదురుచూస్తున్నారు.
నీల్ దర్శకత్వంలో భారీ యాక్షన్:
'కేజీఎఫ్', 'సలార్' చిత్రాలతో సెన్సేషన్ క్రియేట్ చేసిన దర్శకుడు ప్రశాంత్ నీల్, ఎన్టీఆర్ కాంబినేషన్లో వస్తున్న 'డ్రాగన్' ఒక విజువల్ వండర్గా ఉండబోతోంది. ఇక మైత్రీ మూవీ మేకర్స్ ఈ చిత్రాన్ని అత్యంత భారీ బడ్జెట్తో నిర్మిస్తున్నారు. ఈ హై-వోల్టేజ్ యాక్షన్ డ్రామా వచ్చే ఏడాది ప్రపంచవ్యాప్తంగా థియేటర్లలో సందడి చేయనుంది.
ఎన్టీఆర్ తన సినిమాలతో ప్రేక్షకులను అలరించడమే కాకుండా, తన పేరు మీద ఎవరూ మోసపోకూడదనే ఉద్దేశంతో ఇలాంటి హెచ్చరికలు జారీ చేయడం అభినందనీయం. అభిమానం ఉండాలి కానీ అది అజ్ఞానంగా మారకూడదు. మీ అభిమాన హీరో పేరు చెప్పి ఎవరైనా డబ్బులు అడిగితే వెంటనే అధికారులకు ఫిర్యాదు చేయండి.ఇక ప్రజల్లో మార్పు వస్తేనే ఇలాంటి మోసాలకు అడ్డుకట్ట వేయడం సాధ్యమవుతుంది.