పోలీస్ స్టేషన్‌లో 'జైలర్' విల‌న్ ర‌చ్చ‌..అరెస్ట్

'జైలర్' చిత్రంలో అద్భుత‌మైన విల‌నీ పండించిన నటుడు వినాయకన్ తాజాగా వివాదాస్ప‌ద అంశంతో హెడ్ లైన్స్ లోకొచ్చాడు. మద్యం మత్తులో ఉన్న అత‌డు మంగ‌ళ‌వారం సాయంత్రం ఎర్నాకుళం టౌన్ నార్త్ పోలీస్ స్టేషన్‌లో గందరగోళం సృష్టించాడు. త‌న‌ అపార్ట్‌మెంట్‌లో భార్యతో వివాదం కార‌ణంగా పోలీసులు అతడిని స్టేష‌న్ కి పిలిపించారు. అనంత‌రం పోలీసు స్టేషన్ వద్ద భారీ రచ్చ సృష్టించార‌న్న‌ ఆరోపణలపై పోలీసులు అత‌డిని అరెస్టు చేశారు.

వినాయ‌కన్ కి అవసరమైన వైద్య పరీక్షల కోసం సమీపంలోని ఆసుపత్రికి తీసుకెళ్లారు. తరువాత పోలీసులు అతడిని తగిన ప్రక్రియ తర్వాత బెయిల్‌పై విడుదల చేశారు. కాగా వైద్య పరీక్షల అనంతరం ఆసుపత్రి నుంచి పోలీసులతో బయలుదేరిన వినాయకన్ విలేకరులతో మాట్లాడుతూ.. తనను ఎందుకు అరెస్టు చేశారో తెలియడం లేదని అన్నారు.

సెప్టెంబర్ 27 నుండి సూపర్ స్టార్ రజనీకాంత్ న‌టించిన జైలర్ ప్రైమ్ వీడియోలో స్ట్రీమింగ్ అవుతోంది. సన్ పిక్చర్స్ నిర్మించిన ఈ చిత్రానికి నెల్సన్ దిలీప్‌కుమార్ దర్శకత్వం వహించారు. జైలర్ గా రజనీకాంత్ ప్రధాన పాత్రలో నటించ‌గా, విల‌న్ గా వినాయ‌గ‌న్ అద‌ర‌గొట్టార‌న్న టాక్ వ‌చ్చింది. ఈ కథ రిటైర్డ్ జైలర్ టైగర్ ముత్తువేల్ పాండియన్ (రజినీకాంత్) చుట్టూ తిరిగే క‌థ‌. అతను తన కుమారుడిని చంపిన‌ హంతకుల కోసం వెతకడానికి వేట సాగిస్తాడు. అయితే ఈ పోరాటంలో ముత్తువేల్ ని స‌వాల్ చేసేవాడిగా వినాయ‌క‌న్ న‌ట‌న ఎంతో వైవిధ్యంగా ఆక‌ట్టుకుంది. ఇందులో రమ్య కృష్ణన్, యోగి బాబు, వినాయకన్, తమన్నా భాటియా, మాస్టర్ రిత్విక్ త‌దిత‌రులు న‌టించారు. ఈ చిత్రంలో మలయాళ సూపర్ స్టార్ మోహన్ లాల్, కన్నడ సూపర్ స్టార్ శివ రాజ్ కుమార్, బాలీవుడ్ స్టార్ జాకీ ష్రాఫ్ ప్రత్యేక అతిధి పాత్రల్లో న‌టించారు.