ఐపీఎల్ ఫీవ‌ర్ ఉన్నా? వెన‌క్కి త‌గ్గ‌ని స్టార్లు!

ఐపీఎల్ సీజన్ లో పెద్ద సినిమాలేవీ బాక్సాఫీస్ బరిలోకి దిగడానికి సాహసించవు. క్రికెట్ ఫీవర్ వల్ల ప్రేక్షకులు థియేటర్లకు రావడం తగ్గుతుందనే భయంతో స్టార్ హీరోలు తమ చిత్రాలను వాయిదా వేసుకుంటుంటారు. అయితే ఈ వేసవిలో మాత్రం అందుకు భిన్నమైన వాతావరణం కనిపిస్తోంది. క్రికెట్ సందడి ఎంత ఉన్నా? ప్రేక్షకులను అలరించడానికి చిన్న , మీడియం రేంజ్ సినిమాలు ఏమాత్రం వెనక్కి తగ్గకుండా క్యూ కడుతున్నాయి. ఐపీఎల్ కంటే తమ కంటెంట్‌పైనే ఎక్కువ నమ్మకం ఉంచుతూ మేకర్స్ ధీమాగా ముందుకు వస్తున్నారు.

ఏప్రిల్ నెలలో టాలీవుడ్ నుంచి ఆసక్తికరమైన ప్రాజెక్టులు బాక్సాఫీస్ బరిలో నిలుస్తున్నాయి. అడవి శేష్ యాక్షన్ డ్రామా డెకాయిడ్ తో ఏప్రిల్ 10నే థియేటర్లకు వస్తున్నాడు. విభిన్నమైన కథాంశాలను ఎంచుకోవడంలో దిట్ట అయిన శేష్ ఈసారి కూడా ఓ సరికొత్త కాన్సెప్ట్‌తో ప్రేక్షకుల ముందుకు రావ‌డం ఇంట్రెస్టింగ్. అలాగే ఏప్రిల్ 17న నాగశౌర్య రొమాంటిక్ కామెడీ బ్యాడ్ బాయ్ కార్తీక్ అదృష్టాన్ని పరీక్షించుకోబోతున్నాడు. ఈ రెండు సినిమాలు యువతను టార్గెట్ చేస్తూ వస్తుండటంతో క్రికెట్ ప్రభావం తక్కువగా ఉంటుందని మేకర్స్ భావిస్తున్నారు.

ఇక మే నెల ప్రారంభంలో బాక్సాఫీస్ వద్ద అసలైన సందడి మొదలుకానుంది. మే 1వ తేదీన భారతీయ చలనచిత్ర పరిశ్రమలోని ముగ్గురు దిగ్గజాల సినిమాలు ఒకేసారి పోటీకి దిగుతుండటం విశేషం. మలయాళ సూపర్ స్టార్స్ మమ్ముట్టి , మోహన్ లాల్ కలిసి న‌టిస్తోన్న‌ భారీ మల్టీ స్టారర్ పాట్రియాట్ ఆ రోజే విడుదల కానుంది. చాలా కాలం తర్వాత ఇద్దరు లెజెండరీ నటులు కలిసి నటిస్తుండటంతో సౌత్ ఇండియా మొత్తం ఈ సినిమా కోసం ఎంతో ఆసక్తిగా ఎదురు చూస్తోంది.

అలాగే తెలుగు ప్రేక్షకులకు ఎంతో ఇష్టమైన సాయి పల్లవి నటించిన ఏక్ దిన్ కూడా మే 1న విడుదల కానుంది. సాయి పల్లవికి ఇది బాలీవుడ్ డెబ్యూ కావడంతో పాటు అమీర్ ఖాన్ కుమారుడు జునైద్ ఖాన్ ఇందులో హీరోగా నటిస్తుండటం విశేషం. జాతీయ స్థాయిలో ఈ సినిమాపై ఇప్పటికే భారీ హైప్ నెలకొంది. మరోవైపు మరాఠీ స్టార్ హీరో రితేష్ దేశ్‌ముఖ్ తన ప్రతిష్టాత్మక చిత్రం రాజా శివాజీ తో ప్రేక్షకుల ముందుకు వస్తున్నారు. ఇలా విభిన్న భాషలకు చెందిన క్రేజీ సినిమాలు మే 1వ తేదీని లాక్ చేసుకున్నాయి.

ఐపీఎల్ మ్యాచ్‌లు సాయంత్రం వేళల్లో జరుగుతుంటాయి. కానీ మేకర్స్ ప్లాన్ ప్రకారం కంటెంట్ బలంగా ఉంటే మార్నింగ్ , మ్యాట్నీ షోలకు ప్రేక్షకులు ఖచ్చితంగా వస్తారనే నమ్మకంతో ఉన్నారు. పైగా సమ్మర్ సెలవులు కావడంతో ఫ్యామిలీ ఆడియన్స్ థియేటర్లకు వచ్చే అవకాశం మెండుగా ఉంది. గతంలో కూడా క్రికెట్ సీజన్‌లో విడుదలైన కొన్ని చిన్న సినిమాలు బ్లాక్ బస్టర్ హిట్స్ సాధించిన దాఖలాలు ఉన్నాయి. అదే స్ఫూర్తితో ఈ ఏడాది కూడా స్టార్లు తమ సినిమాలను విడుదల చేసేందుకు సిద్ధమయ్యారు.

మొత్తానికి సమ్మర్ లో ఐపీఎల్ హోరు ఉన్నప్పటికీ వినోదానికి మాత్రం ఎలాంటి ఢోకా లేదని అర్థమవుతోంది. అడవి శేష్ యాక్షన్, నాగశౌర్య రొమాన్స్, మమ్ముట్టి-మోహన్ లాల్ ల పవర్ ఫుల్ పర్ఫార్మెన్స్, సాయి పల్లవి నటన.. ఇలా అన్ని వర్గాల ప్రేక్షకులకు కావాల్సిన అంశాలు సినిమాల్లో ఉన్నాయి. క్రికెట్ బెట్టింగులు, స్కోర్ల గోల మధ్య ఈ సినిమాలు బాక్సాఫీస్ వద్ద ఏ రేంజ్ వసూళ్లు రాబడతాయో చూడాలి. ఏది ఏమైనా స్టార్లు వెనక్కి తగ్గకుండా సినిమా విడుదల చేయడం ఇండస్ట్రీకి శుభపరిణామమే.