ఇండియన్ 2... మెగా ఫ్యాన్స్ కి గుడ్‌ న్యూస్‌

యూనివర్శిల్‌ స్టార్‌ కమల్‌ హాసన్‌ తో దర్శక దిగ్గజం శంకర్ రూపొందిస్తున్న ఇండియన్ 2 సినిమా షూటింగ్ ఎట్టకేలకు పూర్తి అయింది. తమిళ మీడియా వర్గాల ద్వారా అందుతున్న సమాచారం ప్రకారం సినిమా షూటింగ్‌ ను ముగించిన శంకర్‌ రాబోయే మూడు నెలల పాటు వీఎఫ్‌ఎక్స్ వర్క్‌ చేయించబోతున్నాడు.

ఇండియన్ 2 సినిమా ను ఈ ఏడాది సమ్మర్ కానుకగా ఏప్రిల్‌ లేదా మే నెలలో విడుదల చేసే విధంగా ప్లాన్ చేస్తున్నట్లుగా సమాచారం అందుతోంది. ఇండియన్ 2 సినిమా చాలా కాలం క్రితం ప్రారంభం అయ్యి కొన్ని కారణాల వల్ల షూటింగ్ ఆగి పోయి మళ్లీ ప్రారంభం అయ్యింది.

రామ్ చరణ్ తో గేమ్‌ చేంజర్ సినిమాను మొదలు పెట్టిన శంకర్‌ మధ్యలో ఇండియన్‌ 2 ను మళ్లీ మొదలు పెట్టాడు. దాంతో గేమ్‌ చేంజర్ కంటే కూడా ఎక్కువగా ఇండియన్ 2 పై శంకర్ దృష్టి పెడుతున్నాడు అంటూ చాలా మంది విమర్శలు చేస్తూ వచ్చారు.

ఎప్పుడో పూర్తి అవ్వాల్సిన గేమ్‌ చేంజర్‌ ను ఇండియన్ 2 వల్ల ఇంత ఆలస్యం చేస్తూ వచ్చారు. ఎట్టకేలకు ఇండియన్ 2 పూర్తి అవ్వడం వల్ల ఇక శంకర్ పూర్తి దృష్టిని గేమ్‌ చేంజర్ పై పెట్టే అవకాశాలు ఉన్నాయి అంటూ కొందరు సోషల్‌ మీడియా ద్వారా మాట్లాడుకుంటూ ఉన్నారు.

గేమ్ చేంజర్ సినిమాను ఈ ఏడాది కచ్చితంగా విడుదల చేసే విధంగా ప్లాన్‌ చేస్తున్నారు. చరణ్‌ మరియు కియారా అద్వానీ జంటగా నటిస్తున్న ఈ సినిమాను దసరా లేదా దీపావళి కానుకగా విడుదల చేయాలని నిర్మాత దిల్‌ రాజు భావిస్తున్నట్లుగా తెలుస్తోంది. మరి శంకర్‌ అప్పటి వరకు రెడీ చేస్తాడా చూడాలి. ఎందుకంటే ఇండియన్ 3 కూడా ఉందని ఆయన ఆ మధ్య ప్రకటించాడు..!